ءباسپاسوز تۋرى بارىسىندا جەرگىلىكتى بيلىك وكىلدەرى جۋرناليستەرگە قالاداعى تاسقىنعا قاتىستى جاعداي مەن جۇرگىزىلىپ جاتقان الدىن الۋ شارالارى ايتىپ بەردى.
وتىن-ەنەرگەتيكالىق كەشەن جانە كوممۋنالدى شارۋاشىلىق باسقارماسى جەتەكشىسى ورىنباسارىنىڭ مىندەتىن اتقارۋشى يگور الەكسەەۆتىڭ ايتۋىنشا, بۇگىنگى تاڭدا ەلوردادا 27 ۋچاسكەگە سۋ باسۋ قاۋپى ءتونۋى مۇمكىن. نەگىزىنەن بۇل ۇركەر, كوكتال, ءوندىرىس تۇرعىن ءۇي الاپتارى مەن جاڭا تەمىرجول ۆوكزالى اۋدانىنىڭ كوشەلەرى.
ء«ار ۋچاسكە بويىنشا جاسالاتىن جۇمىستار, قاجەتتىڭ ماتەريالدىڭ كولەمى, قارجىلاندىرۋ كولەمى مەن جاۋاپتى تۇلعالار انىقتالعان. سونىمەن قاتار, قالا اكىمى اسەت يسەكەشەۆ وسى جىلعا ارنالعان تاسقىن سۋدى وتكىزۋدى ۇيىمداستىرۋ جونىندەگى كەشەندى جوسپاردى بەكىتتى», - دەپ مالىمدەدى ي.الەكسەەۆ.
ونىڭ ايتۋىنا قاراعاندا, استانا سۋ قويماسى مەن كونتررەتتەۋىش ءجىتى باقىلاۋدا.
«بۇگىن سۋ كولەمى 282 ملن تەكشەنى قۇرايدى. بۇل جوبالىق تولتىرىلۋدىڭ 67%. سۋ قويماسىنا سەكۋندىنا 18 كۋب سۋ كەلەدى. ءبىز قازىر سەكۋندىنا 5 كۋب سۋدى اعىزىپ جاتىرمىز. كونتررەتتەۋىشتە ۇزىندىعى 2,5 شاقىرىمدى قۇرايتىن قوسىمشا بەرمالاردى ورناتۋ جۇمىستارى اياقتالدى. قازىرگى تاڭدا كونتررەتتەۋىشتە 2,6 ميلليون كۋب سۋ بار. جوبا قۋاتتىلىعى – 450 ميلليون كۋب سۋعا دەيىن», - دەدى ول.
حالىقارالىق «نۇرسۇلتان نازارباەۆ» اۋەجايى مەن نۇرا-ەسىل ارناسى اۋداندارىندا قالا اكىمدىگى تازارتۋ جۇمىستارىن جۇرگىزدى.
«ەسىل وزەنىنىڭ ارناسى بويىنشا بارلىق شارالار ورىندالدى. ءبىز قازىر ەسىل وزەنىنىڭ سول جانە وڭ تارماعى بىرىگەتىن «گازماشاپپاراتۋرا» اۋدانىندامىز. بۇل جەردە وزەننىڭ ەسكى ارناسىن سالۋ جۇمىستارى جۇرگىزىلدى. بۇل ءوز كەزەگىندە ءۇش ساياجاي الابى ۋچاسكەلەرىنىڭ سۋ استىندا قالۋىنا جول بەرمەيدى. سالىنعان بوگەتتەردىڭ ۇزىندىعى 200 مەتردى قۇرايدى», - دەپ ءتۇسىندىردى ي. الەكسەەۆ.
ونىڭ مالىمەتىنشە, كىشى تالدىكول كولى اۋدانىندا اتالمىش باعىتتاعى جۇمىستار قاجەتتىلىك تۋىنداعان جاعدايدا جۇرگىزىلەتىن بولادى. ۇركەر تۇرعىن ءۇي الابىندا ۇزىندىعى 500 مەتردى قۇرايتىن بوگەت قالپىنا كەلتىرىلدى.
بيىلعى قىسقى كەزەڭدە قالا سىرتىنا شىعارىلعان قار كولەمى 3,1 ميلليون تەكشەنى قۇرادى. بۇل باعىتتاعى جۇمىستارعا ارنايى تەحنيكانىڭ 260 بىرلىگى جۇمىلدىرىلدى.
