بۇل جەڭىل اۆتوكولىكتەر ساناتىنا كىرگەنىمەن, سالماعى اجەپتاۋىر ەكەنى ەكىنىڭ بىرىنە بەلگىلى. سوعان قاراماستان اتالعان ايرىقشا باسەكە كەزىندە وعان قاتىسقان ايەلدەر ەر-ازاماتتاردىڭ بويىنان تابىلا بەرمەيتىن كۇش-جىگەر كورسەتكەنى كوپشىلىكتىڭ ەرەكشە قىزىعۋشىلىعى مەن ىقىلاسىن تۋعىزدى. اتاپ ايتقاندا مادينا نۇرماعامبەتوۆا, نۇرجانات قاۋمەشوۆا جانە گۇلباقىت جۇماعازينا سىندى ايەل-انالار «نيۆانى» ون مەتر جەرگە دەيىن سۇيرەپ جەتكىزدى. مىنە, كۇش-قايرات قايدا دەپ ۇلكەندى-كىشىنىڭ ءبارى بۇعان سۇيىسپەنشىلىك تانىتىپ تۇرعان كەزدە «نيۆانى» سۇيرەۋ كەزەگى زەينەت جاسىنداعى كوپ بالالى انا, اقشاتاۋ اۋىلىنىڭ تۇرعىنى قانزيباش نۇرعازيناعا كەلدى. ول بىردەن اۆتوكولىكتى بەينە ءبىر قول شاناداي زىرىلداتىپ العا قاراي سۇيرەپ الا جونەلدى. 57 جاستاعى كۇش-قايراتى مەن ەرىك-جىگەرى مول ەگدە ايەلدىڭ بۇل ءىس-ارەكەتى جۇرتتىڭ ءبارىن تاڭعالدىردى. بۇل «نيۆا» كولىگىن سۇيرەۋدەن سايىسقا تۇسكەن ايەلدەر اراسىنداعى قايتالانباس ەڭ جوعارى كورسەتكىش دەپ باعالاندى. مۇنى گيننەستىڭ رەكوردتار كىتابىنا جازۋ كەرەك دەپ تارقاستى ناعىز نار قىزعا ءتان ونەر كورسەتكەن جاسى ۇلعايعان انانىڭ شالت قيمىلىنا ريزا بولعاندار.
تەمىر قۇسايىن,
«ەگەمەن قازاقستان»
اقتوبە وبلىسى,
ويىل اۋدانى
