اتاپ ايتقاندا, پارلامەنت سەناتى توراعاسىنىڭ ورىنباسارى بەكتاس بەكنازاروۆ جانە سەناتورلار سەرىك بەكتۇرعانوۆ پەن جەڭىس نۇرعاليەۆ قوستاناي وڭىرىندە بولدى. ولار وبلىس ورتالىعىنداعى جاڭا شاعىن اۋداندا «نۇرلى جەر» باعدارلاماسىنىڭ ىسكە اسۋى بارىسىمەن تانىستى جانە قۇرىلىس مەكەمەلەرىنىڭ باسشىلارىمەن كەزدەسۋدە ەلباسى ن.نازارباەۆتىڭ بەس الەۋمەتتىك باستاماسىن جۇزەگە اسىرۋ ماسەلەلەرىن تالقىلادى. ايماققا ساپار اياسىندا دەپۋتاتتار وبلىستىق سوتتىڭ جاڭا عيماراتىنىڭ قۇرىلىسىن كورىپ, مەشىت جانە كۇشتىك سپورت تۇرلەرى اكادەمياسىنا باردى. سونداي-اق وبلىس اكىمى ارحيمەد مۇحامبەتوۆپەن كەزدەسۋ بارىسىندا ايماقتىڭ الەۋمەتتىك-ەكونوميكالىق دامۋى جانە پرەزيدەنتتىڭ بەس الەۋمەتتىك باستاماسىن ىسكە اسىرۋ جوسپارلارى تالقىلاندى.
* * *
ال پاۆلودار وبلىسىنداعى ماي اۋدانىندا بولعان سەناتور ماناپ كوبەنوۆ ەلىمىزدىڭ وڭتۇستىك وڭىرلەرىنەن كەلگەن جاس ماماندارمەن كەزدەسىپ, ولاردىڭ تۇرعىن جاعدايلارى جانە ەڭبەكاقى مولشەرى جايىندا اڭگىمە ءوربىتتى.
ەلباسى ن.نازارباەۆتىڭ بەس الەۋمەتتىك باستاماسىن جۇرتشىلىققا ءتۇسىندىرۋ اياسىندا دەپۋتات اۋدان اكتيۆىمەن كەزدەسۋدە ءبىلىم بەرۋ, تۇرعىن ءۇي قۇرىلىسى, نەسيە بەرۋ, سالىق اۋىرتپالىعىن تومەندەتۋ ماسەلەلەرىن تالقىلادى.
ماي اۋدانىنىڭ تۇرعىندارى پرەزيدەنت ۇندەۋىنە تولىقتاي قولداۋ ءبىلدىردى, ال مەملەكەتتىك ورگاندار بۇگىنگى تاڭدا ەلباسىنىڭ اۋقىمدى الەۋمەتتىك باستامالارىن ىسكە اسىرۋعا ءازىر.
* * *
سەنات دەپۋتاتتارى مۇرات باقتيار ۇلى مەن بەكمىرزا ەلامانوۆ قىزىلوردا وبلىسىنىڭ قارماقشى, جالاعاش جانە جاڭاقورعان اۋداندارىندا بولىپ, ارداگەرلەر كەڭەسى, شارۋا قوجالىقتارى وكىلدەرى, اۋداندىق ءماسليحات دەپۋتاتتارى, مەديتسينا سالاسىنىڭ قىزمەتكەرلەرىمەن كەزدەستى.
كەزدەسۋ كەزىندە ەلباسى ۇندەۋىنىڭ باسىمدىقتارىن ناتيجەلى جۇزەگە اسىرۋ جان-جاقتى تالقىلانىپ, سەناتورلار جينالعان جۇرتتى ەلىمىزدى وركەندەتۋ جولىندا جۇمىلا جۇمىس جاساۋعا شاقىردى.
* * *
ال سەناتور عۇمار دۇيسەمباەۆ اتىراۋ قالاسىنداعى «نورت كاسپيان وپەرەيتينگ كومپاني ن.ۆ» كومپانياسىنىڭ ەڭبەك ۇجىمىمەن كەزدەسۋىندە پرەزيدەنتتىڭ بەس باستاماسىنا سايكەس ءاربىر وتباسىنىڭ باسپانا الۋدا جاڭا مۇمكىندىكتەرى بار ەكەنىن, سونداي-اق جوعارى ءبىلىم, شاعىن نەسيە بەرۋدى كوبەيتۋدە جانە ەڭبەكاقى مەن سالىق سالاسىندا دا اۋقىمدى جاڭالىقتار بولاتىنىن ايتتى.
ع.دۇيسەمباەۆ سونداي-اق «اتىراۋ» الەۋمەتتىك كاسىپكەرلىك كورپوراتسياسىنىڭ, «Caspian Royal Fish» جشس جانە اتىراۋداعى مۇناي ماشينالارىن جاساۋ زاۋىتىندا دا ەڭبەك ۇجىمىمەن كەزدەسۋ وتكىزدى.
* * *
موڭعوليادان كوشىپ كەلگەن قانداستار وزدەرىنىڭ شەشىلمەگەن الەۋمەتتىك ماسەلەلەرىنە الاڭدايدى. سەنات دەپۋتاتى سەرگەي ەرشوۆتىڭ قاراعاندى وبلىسىنداعى وساكاروۆ اۋدانىندا جەرگىلىكتى تۇرعىندارمەن كەزدەسۋى بارىسىندا ورالمانداردىڭ جۇمىسقا ورنالاسۋى مەن تۇرعىن ۇيمەن قامتاماسىز ەتۋ ماسەلەلەرى اڭگىمە بولدى. سەناتور پرەزيدەنت ن.نازارباەۆتىڭ بەس الەۋمەتتىك باستاماسىن ىسكە اسىرۋ بارىسىندا كوپتەگەن ماسەلەلەردىڭ شەشىمى تابىلاتىنىنا سەنىم ءبىلدىردى.
* * *
جەرگىلىكتى اتقارۋشى ورگاندارمەن بارلىق قىزمەتتەردىڭ تىعىز جۇمىس ىستەۋى جانە توتەنشە جاعدايلاردى بولجاۋ جۇمىستارى دا جەتىلدىرۋدى قاجەت ەتەدى. پارلامەنت سەناتىنىڭ دەپۋتاتى دۇيسەنعازى مۋسين شىعىس قازاقستان وبلىسىندا جۇمىس بابىنداعى ساپاردا بولعان كەزىندە ايماقتاعى تاسقىن سۋعا بايلانىستى احۋالعا وراي وسىلاي دەدى.
د.مۋسين اۋىلشارۋاشىلىق داقىلدارىن سۇرىپتاۋ-سىناۋدىڭ شىعىس قازاقستان وبلىستىق ينسپەكتسياسىندا دا بولىپ, ەلباسى ن.نازارباەۆتىڭ بەس الەۋمەتتىك باستاماسى تۋرالى جان-جاقتى اڭگىمەلەپ بەردى.
* * *
ءماجىلىس توراعاسىنىڭ ورىنباسارى, «نۇر وتان» فراكتسياسىنىڭ جەتەكشىسى گۇلميرا يسيمباەۆا, دەپۋتاتتار گۇلنار يكسانوۆا مەن زاۋرەش امانجولوۆا الماتىداعى ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى جانە قازاق ۇلتتىق اگرارلىق ۋنيۆەرسيتەتىندە بولدى.
دەپۋتاتتار ءبىلىم بەرۋ مەكەمەلەرىنىڭ جاتاقحانالارىن ارالاپ, ستۋدەنتتەردىڭ تۇرمىس جاعدايىمەن تانىستى.
كەزدەسۋ بارىسىندا ۆيتسە-سپيكەر گ.يسيمباەۆا جوعارى ءبىلىم ستاندارتتارىنا سايكەس ءبىلىم بەرۋ جۇيەسىن قۇرۋ, وقۋشىلاردىڭ وقۋ جانە تۇرۋ جاعدايىنا نازار اۋدارۋ قاجەتتىلىگىنە توقتالدى.
* * *
پارلامەنت ءماجىلىسى توراعاسىنىڭ ورىنباسارى ۆلاديمير بوجكو مەملەكەت باسشىسى بەلگىلەپ بەرگەن بەس الەۋمەتتىك باستامانىڭ باستى باعىتتارىن ءتۇسىندىرۋ ءۇشىن اقتوبە وبلىسىنا كەلدى. ول اپتانىڭ اياعىنا دەيىن سوزىلاتىن ساپارىنىڭ العاشقى كۇنى شالعايداعى ىرعىز اۋدانىنىڭ جاي-كۇيىمەن تانىستى. ۆيتسە-سپيكەر «نۇرلى جەر» باعدارلاماسى اياسىنداعى مەملەكەتتىك تۇرعىن ءۇي باعدارلاماسى جۇيەلى تۇردە جۇزەگە اسىپ كەلە جاتقانىنا كوز جەتكىزدى. بۇل رەتتە ۆ.بوجكو تۇرعىن ۇيلەردى يەلەنۋگە باعىتتالعان جاڭا الەۋمەتتىك يپوتەكالىق باعدارلامانىڭ ءتيىمدى تۇستارى جونىندە ەگجەي-تەگجەيلى ايتىپ بەردى. سونداي-اق پارلامەنت ءماجىلىسى توراعاسىنىڭ ورىنباسارى وبلىس ورتالىعىنداعى «مەيىرىم» الەۋمەتتىك بەيىمدەۋ مەكەمەسى, العا اۋدانىنداعى الەۋمەتتىك جانە وندىرىستىك نىسانداردى ارالاپ, كەيبىر ءتۇيىندى تۇستارعا كوڭىل اۋداردى.
* * *
دەپۋتاتتاردىڭ وڭىرلەردەگى ساپارى اياسىندا ءماجىلىس دەپۋتاتى ساۋىتبەك ابدراxمانوۆ اقمولا وبلىسىنىڭ ارشالى اۋدانىندا سايلاۋشىلارمەن جۇزدەسۋى بارىسىندا پرەزيدەنت ن.نازارباەۆتىڭ بەس باستاماسى الەۋمەتتىك مەملەكەتتىڭ الەۋەتىن الەمگە ايگىلەگەن, ەلىمىزدە ءبارى دە ادام يگىلىگىنە جاسالاتىنىن كەلىستى كورسەتكەن شەشىم بولىپ شىققانىن ناقتى دالەلدەپ ايتتى. ەلباسى باستامالارىنىڭ ءمان-ماڭىزىن جان-جاقتى اشقان دەپۋتات ولاردىڭ جۇزەگە اسىرىلۋىنىڭ تەتىكتەرى جونىندە دە اسەرلى اڭگىمەلەپ, جۇرتشىلىقتىڭ سۇراقتارىنا جاۋاپ بەردى.
* * *
ءماجىلىس دەپۋتاتتارى باقتىقوجا ىزمۇحامبەتوۆ پەن جەكسەنباي دۇيسەباەۆ, سەنات دەپۋتاتى عۇمار دۇيسەمباەۆ جۇمىس ساپارىمەن اتىراۋ وبلىسىنىڭ ماحامبەت اۋدانىندا جايىق وزەنى ۇستىنەن سالىنىپ جاتقان كوپىر قۇرىلىسىن بارىپ كوردى. جاڭا نىسان ماحامبەت, يندەر اۋداندارى اراسىنداعى كولىك قاتىناسىن رەتتەپ, وبلىس ورتالىعىنداعى كەپتەلىستى ازايتاتىن بولادى. حالىق قالاۋلىلارى, سونداي-اق ماحامبەت اۋدانى تۇرعىندارىمەن كەزدەسىپ, مەملەكەت باسشىسىنىڭ بەس الەۋمەتتىك باستاماسىن جۇزەگە اسىرۋدىڭ باستى قاعيدالارىن تالقىلادى.
* * *
تومەنگى پالاتا وكىلدەرى سەرىك سەيدۋمانوۆ پەن ەرجان قۇدايبەرگەنوۆ الماتىدا شاعىن جانە ورتا بيزنەس وكىلدەرىمەن كەزدەستى. اڭگىمەگە ارقاۋ بولعان پرەزيدەنتتىك بەس باستاما كاسىپكەرلەر تاراپىنان قولداۋ تاپقان. «دامۋ» كاسىپكەرلىكتى دامىتۋ قورى» اق عيماراتىندا وتكەن كەزدەسۋدە «نۇر وتان» فراكتسياسىنىڭ مۇشەلەرى باستامانىڭ شاعىن نەسيەلەۋ كولەمىن كوبەيتۋ باعىتىندا كەڭىنەن اڭگىمەلەدى.
