باستامالار اياسىندا ۇسىنىلعان باعدارلامالار مەن ءىس-شارالار ەلدىڭ ەڭسەسىن كوتەرەرى ءسوزسىز. اتاپ ايتسام, باسپانا الۋدىڭ جاڭا مۇمكىندىكتەرى بويىنشا ۇسىنىلعان «7–20–25» باعدارلاماسى بۇگىنگى باسپاناسىز جۇرگەن تالاي وتباسىنا ۇلكەن كومەك. اسىرەسە بولاشاعىنا سەنىم تۋدىرۋ ءۇشىن جاس وتباسىلارعا جاسالىپ جاتقان جاقسى جاعداي دەپ ايتۋعا بولادى. ەلىنە ءوز ۇلەسىن قوسۋ ءۇشىن ەڭبەك ەتىپ ەتىپ جۇرگەن ءبىلىمدى جاستار بارشىلىق. الايدا كوبىندە وتباسىلىق-تۇرمىستىق جاعدايلارى ناشار بولىپ كەلەدى. وسىلايشا كۇيبەڭ تىرشىلىكتەن ارىلا الماي جۇرگەن جاستار ەندى قولجەتىمدى باسپانامەن قامتاماسىز ەتىلەدى دەپ ويلايمىن. جالاقىسى ماردىمسىز ازاماتتارعا سالىق تولەمىن ازايتۋ جونىندەگى باستاما دا ورىندى. سالىقتى ازايتۋ ارقىلى ولاردىڭ جالاقىسىن كوتەرۋ كوزدەلگەن. باستامادا حالىققا الەۋمەتتىك تۇرعىدا قولداۋ كورسەتىلەتىندىگى كوڭىلگە سەنىم ۇيالاتادى.
ەڭ باستىسى, جوعارى ءبىلىم الۋدىڭ ساپاسى مەن قولجەتىمدىلىگىن كوتەرۋ باستاماسى قانشاما جاستاردى تىعىرىقتان شىعارارى ءسوزسىز. ەلباسى ۇسىنعان تەحنيكا سالاسىنداعى مەملەكەتتىك گرانتتى كوبەيتۋ ەل ەكونوميكاسىن ارتتىرۋداعى قاجەتتى ماماندىقتارعا كوڭىل ءبولۋدى بىلدىرەدى. وسى ماماندىقتارعا جاستاردى تارتۋ ءۇشىن ولارعا جاعداي تۋعىزۋ كەرەكتىگىن اتاپ كورسەتكەن ەلباسى جوعارى وقۋ ورنى مەن كوللەدجدەردە جاتاقحانا ماسەلەسىن شەشۋ كەرەكتىگىن باسا ايتتى. وسى باستاما بويىنشا سالىناتىن زاماناۋي تۇرعىداعى جاڭا جاتاقحانالار پاتەر جالداپ جۇرگەن ستۋدەنتتەردىڭ ماسەلەسىن شەشەدى. ولاردىڭ تولىققاندى ءبىلىم الۋىنا جاعداي جاسالاتىنى قۋانتادى. ەلدىڭ ەڭسەسىن كوتەرگەن باستامالاردىڭ ءبىرى – شاعىن نەسيە بەرۋ كولەمىن كەڭەيتۋ. بۇل ءوز كاسىبىن باستاپ, شارۋاشىلىعىن كەڭەيتۋدى كوزدەگەن ءار كاسىپكەرگە تاپتىرماس كومەك. قارجىلاي كومەكتى قاجەت ەتەتىن ءاربىر كاسىپكەر ءوز شارۋاشىلىعىن كەڭەيتۋدە مەملەكەت تاراپىنان جاسالعان بۇل قولداۋدى قۋانىشپەن قارسى الىپ جاتىر دەپ ويلايمىن. ەلدى كوگىلدىر وتىنمەن قامتاماسىز ەتۋدى كوزدەگەن بەسىنشى باستاما حالىق تۇرمىسىندا قوردالانىپ قالعان تالاي ماسەلەنى شەشەرى داۋسىز. ىستىق سۋ ماسەلەسى, وتىن تاپشىلىعى سياقتى قاراپايىم دۇنيەلەر اسىرەسە ءبىزدىڭ كوكشەتاۋ قالاسى بويىنشا قولجەتىمدى بولار ەدى. وسى باستامالاردى ازاماتتىق تۇرعىدان قولدايمىن جانە جاقىن ارادا جۇزەگە اساتىنىنا سەنەمىن.
شاتتىق قاراسارتوۆا,
م.عابدۋللين اتىنداعى №3 كوپ تىلدە وقىتاتىن كاسىبي مەكتەپ-گيمنازيانىڭ قازاق ءتىلى مەن ادەبيەتى ءپانى مۇعالىمى
اقمولا وبلىسى
