شىركىن, بۇل كورمەدە جاراسىمدى جانۇيانىڭ مەرۋەرتتەي مۇرالارى اسپەتتى قالپىندا جۇرەگىڭىزدى ەزىپ, وزىنە ەلىكتىرە تۇسەدى...
جۇبايلاردىڭ جاراسىمدى جۇبى – يبراگيموۆتار تاشكەنت قالاسىنداعى پ.پ.بەنكوۆ اتىنداعى كوركەمسۋرەت ۋچيليششەسىن ءبىتىردى. يۋنۋس ۋچيليششەنىڭ تەاتر دەكوراتسياسى, زۋحرا ديزاين ءبولىمىن جانە وستروۆسكي اتىنداعى تەاتر-كوركەمسۋرەت ينستيتۋتىنىڭ كىتاپ گرافيكاسى ءبولىمىن وقىپ ءبىتىردى. جۇبايلار قازىرگى ۋاقىتتا سۋرەت جانە كەسكىندەمە ساباقتارى بويىنشا جەكە ۇستازدىق قىزمەت اتقارادى.
ءاربىر سۋرەتشىنىڭ كورمەسى وزىندىك جاڭا كوپ قىرلى شىعارماشىلىق قىزمەتىمەن ەرەكشەلەنەدى. يۋ.يبرايموۆ مونۋمەنتالدى جانە ستانوكتى كەسكىندەمە تەحنيكاسىندا جۇمىس جاسايدى. ءوز شىعارمالارىن پلەنەرگە شىققاندا دا, شەبەرحانادا جاساعاندا دا ول ساۋلە مەن كولەڭكەنىڭ قوزعالىسىن بايقاپ, كەز كەلگەن ءتۇس وزگەرىستەرىن سەزىنۋگە تىرىسادى. سۋرەتشى بارلىق ءوزىنىڭ ىشكى دۇنيەسىن جۇمساق جانە ادەمى بوياۋلار ارقىلى كورسەتەدى. ءوزى تۋعان جەردىڭ تابيعاتىنىڭ سۇلۋلىعىن بەينەلەگەن «قارعالى. كەش», «الەكسەەۆكاعا بارار جول», «ۆەسنوۆكا», «رەميزوۆكا», جىل مەزگىلدەرى – «اقپان», «شىلدە», «كۇز تاياپ قالدى» اتتى كوپتەگەن پەيزاجدىق جۇمىستارى بار.
زۋحرا گرافيكاعا, اعاشقا كۇيدىرىپ ورنەك سالۋعا, ماتاعا كوركەم ويۋ-ورنەكتەر سالىپ اشەكەيلەۋگە – باتيككە, ءوز شىعارماشىلىعىندا ءار ءتۇرلى ادىستەردى, ماتەريالداردى پايدالانىپ, ءجيى سىناقتار جاساۋعا قۇشتار, سونداي-اق ول مايلى كەسكىندەمە تەحنيكاسىندا دا جۇمىس جاسايدى. ونىڭ كارتينالارى, اسىرەسە («بۋتاكوۆكا», «تاڭعى سۋىق», «ىستىقكول», «قىستاعى كۇننىڭ باتۋى») پەيزاجدارى وتە كوركەم جانە ادەمى. سوڭعى جىلدارى جۇبايلار مۇسىنمەن جانە بارەلەفپەن شۇعىلدانۋدا. سۋرەتشىلەر وتباسىمەن پلەنەرلەرگە شىعىپ, كوپتەگەن جۇمىستارىن تابيعات اياسىندا سالعان.
زۋحرا جانە يۋنۋس يبراگيموۆتار وزدەرىنىڭ كورمەلەرىن 2010 جىلى كورەرمەندەر نازارىنا ۇسىنعان. ال بۇگىندە وتباسىلىق جۇپقا ولاردىڭ قىزدارى جاسمين قوسىلدى. كورمەگە جاسمين العاش رەت ءوزىنىڭ اكۆارەل جۇمىستارىن قويدى. ول قاستەەۆ اتىنداعى مەكتەپتىڭ كوركەمسۋرەت بولىمىندە وقيدى, كوپتەگەن بالالار شىعارماشىلىق بايقاۋلارىنىڭ قاتىسۋشىسى: «گۇلدەر الەمى» (1-ورىن), «مەنىڭ قازاقستانىم» (1-ورىن), «بالداۋرەن» جانە ت.ب. لاگەرلەردىڭ ەمبلەماسى ءۇشىن 1-ورىندى يەلەنگەن.
ناۋرىز مەرەكەسىنە وراي شۋاقتى شاڭىراقتىڭ جاراسىمدى شىعارمالارىن جيناقتاعان بۇل كورمەگە 45-تەن استام جۇمىس قويىلعانىن ايتۋىمىز كەرەك.
ساپارباي پارمانقۇل,
«ەگەمەن قازاقستان
الماتى
