قازاقستاننىڭ قىرعىزستانداعى ەلشىسىمەن سۇحباتتاسۋ كەزىندە قىرعىز رەسپۋبليكاسىنىڭ پرەزيدەنتى قىسقا مەزگىل ارالىعىندا استاناعا ەكى رەت رەسمي ساپارمەن, سونىمەن قاتار ءۇشىنشى رەت ورتالىق ازيا مەملەكەتتەرى باسشىلارىنىڭ كەڭەسىنە بارعانىن ەسكە الدى.
«بۇل ساپارلارىمنىڭ كەزىندە ءبىز ماڭىزدى قۇجاتتارعا قول قويدىق, كوكەيكەستى ماسەلەلەردى تالقىلادىق. مەن ءسىزدىڭ قىرعىزستانعا ەلشى بولىپ تاعايىندالعانىڭىزعا وتە قۋانىشتىمىن, بولاشاقتا ءبىزدىڭ مامىلەلەرىمىز تەرەڭدەۋ ۇستىندە عانا بولادى دەپ سەنەمىن, ويتكەنى قىرعىز بەن قازاقتان جاقىن حالىق جوق», – دەدى سوورونباي جەەنبەكوۆ.
ءۇش كەزدەسۋدىڭ دە تاريحي وقيعا ەكەنىن ايتقان قازاقستاننىڭ ەلشىسى كارىم كوكىرەكباەۆ كەزدەسۋلەردە شەكارا, ەكونوميكالىق ىقپالداستىق ماسەلەلەرى وڭ شەشىلىپ, وسىنىڭ ناتيجەسىندە ەكى ەلدىڭ ورتاسىنداعى تاۋار اينالىمىنىڭ ەداۋىر وسكەندىگىن, بيىل قىرعىزستاندا وتكەلى جاتقان زاڭعار جازۋشى شىڭعىس ايتماتوۆتىڭ 90 جىلدىق مەرەكەسى جانە III بۇكىلالەمدىك كوشپەندىلەر ويىندارى ءىس-شارالارىنا قازاقستان قىزىعۋشىلىق تانىتىپ وتىرعانىن مالىمدەدى.
نازاربەك بايجىگىتوۆ,
ۇكىمەتتىك «كىرگىز تۋسۋ» گازەتىنىڭ جاۋاپتى حاتشىسى,
ارنايى «ەگەمەن قازاقستان» ءۇشىن
