2017 جىلى اتىراۋ وبلىسىندا 36 تۇرعىن ءۇي, 1977 پاتەر پايدالانۋعا بەرىلدى. 2018 جىلى 3892 پاتەرلىك 44 كوپ قاباتتى تۇرعىن ءۇيدىڭ جوبالاۋ-سمەتالىق قۇجاتتاماسى جاسالدى. جەكە سالۋشىلار "نۇرلى جەر" باعدارلاماسى بويىنشا تۇرعىن ءۇي قۇرىلىسىن جۇرگىزۋگە بەلسەندى قىزىعۋشىلىق تانىتۋدا, بۇل جوبالانعان تۇرعىن ءۇي سانىنىڭ ارتۋىنا ىقپال ەتىپ وتىر.
گۇلزيا وماروۆا وسى باعدارلامانى پايدالانۋشىلاردىڭ ءبىرى. تۇرعىن ءۇي قۇنىنىڭ قاجەت 30% جيناعان ول باستاپقى تولەمدى جاساپ, نۇرسايا ىقشاماۋدانىنان ءبىر بولمەلى پاتەرگە قونىستاندى.
-"نۇرلى جەر" باعدارلاماسى تۋرالى حابارلاندىرۋدى الەۋمەتتىك جەلىدەن كوردىم. تالاپتارى كوڭىلىمنەن شىقتى, اي سايىن ءۇي قۇنىنىڭ ون پايىزىن عانا تولەيمىن, قالعانىن مەملەكەت تولەيدى, -دەيدى گۇلزيا. -بانككە كوميسسيا تولەمدەرى دە جوق, قۇجاتتار وڭاي, تەز رەسىمدەلدى. بۇرىن پاتەرگە قول جەتكىزۋ الىس ارمان سەكىلدى كورىنەتىن, قازىر قولجەتىمدى ەكەنىن ءبىلدىم.
"نۇرلى جەر" يپوتەكالىق نەسيەلەۋ باعدارلاماسىنان بولەك وڭىردە مەملەكەت باسشىسى ۇسىنعان "7-20-25" باعدارلاماسى بويىنشا پاتەر بەرىلە باستايدى. جەرگىلىكتى اتقارۋشى بيلىك ايماقتىڭ ينۆەستيتسيالىق كليماتىن جاقسارتۋ جولىندا بەلسەندى جۇمىس جۇرگىزىپ جاتىر. جىل سايىن اتىراۋ وبلىسىندا بيزنەس جۇرگىزۋگە نيەتتى كومپانيالار كوبەيىپ كەلەدى.
ايماقتا كوممۋنالدىق جانە جالعا بەرىلەتىن تۇرعىن ۇيلەر دە سالىنىپ جاتىر, ولار مەملەكەتتەن پاتەر الۋعا قۇقىلى ازاماتتاردىڭ 13 ساناتى بويىنشا بەرىلەدى.
كلارا جۇماشەۆا الەۋمەتتىك از قامتىلعان وتباسى رەتىندە مەملەكەتتەن پاتەر الۋ كەزەگىنە تۇرعان. كەزەگى كەلگەن سوڭ ول ءۇش بولمەلى پاتەرگە قول جەتكىزىپ, ناۋرىز مەيرامىن ءوز ۇيىندە قارسىلادى.
-جىلدار بويى ءۇي جالداپ, قينالىپ جۇردىك. اقشا ۇنەمى جەتپەيتىن. وتكەن جىلى قاراشا ايىندا كەزەگىمىز جاقىنداعانىن, پاتەر كىلتى بەرىلەتىنىن حابارلادى, - دەيدى كلارا جۇماشەۆا. – بيىل ناۋرىزدى ءوز ۇيىمىزدە قارسى الدىق, قوناق شاقىردىق, بارلىق اعايىن-تۋىس ءبىر داستارحان باسىنا جينالدى.
