ويتكەنى بەس باستاما – ەلدىڭ ەرتەڭى ءۇشىن جۇمىس ىستەيتىن جاستاردىڭ باعىن اشاتىن دۇنيە بولماق. وندا قازىرگى قازاقستاندىق كەز كەلگەن جاستىڭ باس اۋرۋىنا اينالعان باسپانا ماسەلەسى ورىندى كوتەرىلدى. ەلباسى ۇندەۋىندە ءاربىر قازاقستاندىق تۇرعىننىڭ باسپاناعا قول جەتكىزۋى باستى ورىندا دەپ شەگەلەپ ايتتى. يپوتەكالىق نەسيەنىڭ پايىزدىق مولشەرى 7 پايىزدان اسپاۋى كەرەك جانە العاشقى جارنا 20 پايىزدى قۇرايدى دەگەن بولاتىن. بۇل ماسەلە قازىرگى تاڭداعى ەڭ وزەكتى دۇنيە.
زامانداستارىم قالالىق جەرگە بارىپ جۇمىس جاساعىسى كەلەدى. بىراق وكىنىشكە قاراي, ولار قالادا ءومىر ءسۇرۋ ءۇشىن ايلىعى 200 مىڭ تەڭگەدەي بولۋى قاجەت. ال ونداي ايلىق بيۋدجەتتىك جانە مەملەكەتتىك قىزمەتكەر ءۇشىن ارمان. قازىرگى تاڭدا جوعارى ءبىلىمدى جاستىڭ ورتاشا جالاقىسى 60-70 مىڭ تەڭگەنى قۇرايدى. بۇل دەگەنىڭىز كۇندەلىكتى تۇرمىستىق قاجەتتىلىككە عانا جەتەدى. ال قالالىق جەرلەردە جالدامالى پاتەرلەردىڭ ايلىق اقىسى 60-80 مىڭ تەڭگەنى قۇرايدى. بۇل – جاس وتباسىلار ءۇشىن ۇلكەن ماسەلە. مىنە, وسى تۇيتكىلگە وراي پرەزيدەنت ن.نازارباەۆ باسپانا ماسەلەسىن شەشۋدى مىقتاپ قولعا الىپ, ۇكىمەتكە تاپسىرما بەردى. مۇنىڭ ءوزى جاستار ءۇشىن ماڭىزى تەرەڭ دەگىم كەلەدى. يپوتەكالىق نەسيە 7 پايىزدى قۇراسا – جاستار مەن ەل تۇرعىندارىنا باسپاناعا قول جەتكىزۋ جەڭىلدەيدى.
باستامانىڭ ىشىندە تاعى ءبىر كۇرمەۋى قيىن ماسەلە – جوعارى ءبىلىمنىڭ قولجەتىمدىلىگى مەن ستۋدەنتتىك جاتاقحانالاردىڭ بۇگىنگى جايى. ەلباسى كەلەر جىلدارى وقۋ گرانتتارىن تاعى دا ەكى ەسەگە جۋىق كوبەيتۋ كەرەكتىگىن قاپەرگە سالدى. مۇنىڭ ءوزى تاعى دا 20 مىڭعا جۋىق وقۋ گرانتتارى جاستارعا بەرىلەدى دەگەن ءسوز. سوندا ەلىمىزدە تەگىن ءبىلىم الۋشىلار سانى ارتادى. سونداي-اق ەل ەرتەڭىنىڭ كىرپىشى بولىپ قالاناتىن جاستار ءۇشىن ەڭ كەرەكتى جاتاقحانا ماسەلەسى جۋىق ارادا كۇن تارتىبىنەن تۇسەتىنى انىق. ءبىر عانا اقتاۋ قالاسىنىڭ وزىندە 70 مىڭنان استام ستۋدەنت بار.
اقتاۋ قالاسىندا ستۋدەنتتەردىڭ 4 جاتاقحاناسى عانا جۇمىس جاسايدى. بۇل 70 مىڭعا وتە ازدىق ەتەتىن دۇنيە. ول جاتاقحانادا 300-گە جەتەر-جەتپەس ستۋدەنت بار, ال قالعان 95 پايىز ستۋدەنت پاتەر جالداپ كۇن كەشۋدە. وسىناۋ تالاي ستۋدەنتتىڭ بولاشاعىنا ءۇمىت وتىن مازداتقان ەلباسى ۇندەۋىن اۋىل جاستارى ءبىراۋىزدان قولدايدى. ەلباسى ۇندەۋىندە 75 مىڭ ورىنعا شاقتالعان جاتاقحانالار سالىناتىنى ايتىلدى. بۇل ءبىلىمدى جاستاردىڭ ەرتەڭگە دەگەن سەنىمىن ارتتىردى.
«جاستار – ەلدىڭ ەرتەڭى» دەمەكشى, بۇگىنگى ستۋدەنتتىڭ ءومىر ءسۇرۋ فورمۋلاسىن ەلباسى ءوزىنىڭ ۇندەۋى ارقىلى شەشىپ بەردى. تالىمگەرلەرگە بۇدان ارتىق باقىت جوق دەپ بىلەمىن. ال تۇرعىن ءۇي ماسەلەسىندە پرەزيدەنتتىڭ جۇيەلى جوسپارى مەن ءتۇيىندى ماسەلەلەردى تارقاتۋداعى ناقتى شەشىمى جاستار ءۇشىن تىڭ باستاما بولدى دەۋگە بولادى. مۇنىڭ ءوزى ەرتەڭگى كۇنگە دەگەن زور سەنىم مەن ىستىق ىقىلاستىڭ ەرەكشە سيپات الۋىنا سەپ بولادى.
اللابەرگەن قونارباەۆ,
«ماڭعىستاۋ اۋداندىق جاستار رەسۋرستىق ورتالىعى» كمم ديرەكتورى
ماڭعىستاۋ وبلىسى
