بيۋرودا ماجىلىستەن تۇسكەن زاڭ جوبالارى ءبولىنىپ بەرىلدى. حالىقارالىق قاتىناستار, قورعانىس جانە قاۋىپسىزدىك كوميتەتى قازاقستان مەن اقش ۇكىمەتتەرى اراسىنداعى اۋعانستان يسلام رەسپۋبليكاسىنىڭ تۇراقتىلىعى جانە قالپىنا كەلتىرۋ جونىندەگى ءىس-قيمىلعا اقش-تىڭ قاتىسۋىنا بايلانىستى قازاقستان اۋماعى ارقىلى ارنايى جۇكتىڭ كوممەرتسيالىق تەمىرجول ءترانزيتىن قامتاماسىز ەتۋ تۋرالى كەلىسىمگە وزگەرىس ەنگىزۋ تۋرالى حاتتامانى; قازاقستان مەن تاجىكستان ۇكىمەتتەرى اراسىنداعى ديپلوماتيالىق وكىلدىكتەردىڭ عيماراتتارىن سالۋ ءۇشىن جەر ۋچاسكەلەرىن ءوزارا بەرۋ تۋرالى كەلىسىمدى; تمد-عا قاتىسۋشى مەملەكەتتەردىڭ اقپاراتتىق قاۋىپسىزدىك سالاسىنداعى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى زاڭ جوبالارىن پىسىقتاۋ جانە قورىتىندى ازىرلەۋ جونىندە جاۋاپتى بولىپ بەلگىلەندى.
الەۋمەتتىك-مادەني دامۋ جانە عىلىم كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرگە ارحيۆ ءىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا باس كوميتەت بولىپ بەلگىلەندى.
بيۋرودا پالاتانىڭ 29 ناۋرىزدا وتەتىن كەزەكتى جالپى وتىرىسىنىڭ كۇن ءتارتىبى بويىنشا ۇسىنىستار دا ەنگىزىلدى.
سەناتورلار قازاقستان مەن بەلارۋس اراسىنداعى تابىس پەن م ۇلىككە قوسارلانعان سالىق سالۋدى بولدىرماۋ تۋرالى ۇكىمەتارالىق كەلىسىمگە وزگەرىستەر مەن تولىقتىرۋلار ەنگىزۋ تۋرالى; زاڭناماعا جەر قاتىناستارىن رەتتەۋ تۋرالى; حالىقتىڭ جۇمىسپەن قامتىلۋى جانە كوشى-قون ماسەلەلەرى بويىنشا تۇزەتۋلەر ەنگىزۋ تۋرالى زاڭ جوبالارىن قارايتىن بولدى.
بيۋرو سوڭىندا سەنات توراعاسى ق.توقاەۆ قازاقستان پرەزيدەنتى ن.ءا.نازارباەۆتىڭ بەس الەۋمەتتىك باستاماسىن ءتۇسىندىرۋ ماقساتىندا سەناتورلار 30 ناۋرىز بەن 4 ءساۋىر ارالىعىندا ايماقتارعا اتتاناتىنىن ايتتى.
