كەزدەسۋدىڭ ءبىر دەمدە, جەڭىل لەپتە وتۋىنە وڭىرىمىزدەگى ىرگەلى وقۋ ورىندارىنىڭ بىرىنە جاقىندا عانا تاعايىندالعان مۇحتار ادىلبەك ۇلىنىڭ: «قىسىلماڭىزدار. ەمىن-ەركىن پىكىر الماسايىق. ۋنيۆەرسيتەتتەگى ءتۇيىندى ماسەلەلەردى بىرلەسە تالقىلايىق» دەگەن ءسوزى دە تۇرتكى بولعانى انىق. بايقاعانىمىز, ستۋدەنتتەردىڭ كوڭىلىن الاڭداتىپ جۇرگەن ماسەلەلەر از ەمەس ەكەن. ستۋدەنت ءادىل قابانباەۆ ۋنيۆەرسيتەتتە ءارتۇرلى بايقاۋلار ۇيىمداستىرىلعانىمەن, سول بايقاۋعا ازىرلەنەتىن جەرلەرىنىڭ ءجوندى بولماي تۇرعانىن, №3 وقۋ عيماراتىنىڭ تەرەزەلەرىنەن جەل ۇرلەسە, №2 وقۋ عيماراتىندا اسحانانىڭ جوقتىعىنان وزدەرىنىڭ كەي كۇندەرى اش قۇرساق ءجۇرىپ قالاتىنىن جەتكىزدى. وقۋ ورنىنىڭ جۋرناليستيكا ماماندىعىنىڭ ستۋدەنتى جادىرا ماجىباەۆا ءوزىنىڭ №3 جاتاقحانادا تۇراتىنىن, الايدا جاتاقحانادا ستۋدەنتتەرگە ورتاق اس پىسىرەتىن بولمە جوقتىعىن, اركىم ءوز بولمەسىندە ەسكى توق پەشتەردى قوساتىندىعىن, سونىڭ كەسىرىنەن كەيدە ءورت شىعاتىندىعىن, جۋىناتىن بولمەنىڭ دە جاعدايى سونشالىقتى ءماز ەمەس ەكەندىگىن, كىر جاياۋعا ارنالعان بولمە بولا تۇرا, ونىڭ پايدالانۋعا بەرىلمەي وتىرعاندىعىن ايتتى.
ال ستۋدەنت داۋلەتبەردى جەكەي مەملەكەتارالىق دەڭگەيدە شەشىلەتىن سالماقتى ماسەلەنى ورتاعا تاستادى. «2015 جىلعا دەيىن موڭعوليانىڭ بايان-ولگي ايماعىندا ءبىزدىڭ ۋنيۆەرسيتەتتىڭ فيليالى جۇمىس ىستەپ تۇرعان ەدى. سول ارقىلى وسى جاققا 100-دەن استام قازاق جاسى وقۋعا كەلىپ تۇراتىن. بۇگىندە بۇل بولىمشە جابىلدى. بولىمشەنى قايتادان اشىپ, قازاق جاستارىن وقۋعا تارتۋ ويلارىڭىزدا بار ما؟ ەكىنشى ساۋالىم, جاتاقحاناداعى اتا-اناسىنىڭ قامقورلىعىنسىز قالعان بالالاردىڭ جاعدايى نە بولماق؟ ولار بۇرىن تەگىن تۇرىپ كەلسە, بيىل اقىسىن تولەي باستاعان ەكەن», - دەدى ول.
سونىمەن قاتار كەزدەسۋدە ء«دىلمار» دەبات كلۋبىنىڭ جەتەكشىلەرى ارايلىم پانابەك پەن ءادىل ماناپباي, «اۆانگارد» ستۋدەنتتەر تەاترىنىڭ جەتەكشىسى نيكيتا دەريابين وزدەرىنىڭ دايىندالاتىن اۋديتوريالارىنىڭ, ۋنيۆەرسيتەت جانىنان قۇرىلعان جوعارعى كوللەدج ستۋدەنتتەرىنىڭ ۆولەيبولشىلارى جارىسقا ازىرلەنەتىن سپورت زالىنىڭ جوقتىعىن العا تارتتى. ستۋدەنتتەردىڭ سۇراقتارىن مۇقيات تىڭداعان ۋنيۆەرسيتەت رەكتورى كوتەرىلگەن ماسەلەلەردىڭ ورىندى ەكەندىگىن اتاپ ءوتىپ, ارقايسىسى ءوز رەتىمەن شەشىم تاباتىندىعىن اتاپ ءوتتى. سونىمەن قاتار ءساۋىر-مامىر ايلارىندا ارنايى دەلەگاتسيامەن موڭعولياعا بارۋدى جوسپارلاپ وتىرعانىن ءسوز ەتىپ, بايان-ولگيدەگى بولىمشە ماسەلەسى سول كەزدە تالقىعا تۇسەتىنىن تىلگە تيەك ەتتى.
ازامات قاسىم,
«ەگەمەن قازاقستان»
وسكەمەن
