جاڭا باسسەين سۋدى جىلىتاتىن جانە تازارتاتىن زاماناۋي تەحنولوگيالىق قۇرال-جابدىقپەن قامتاماسىز ەتىلگەن. بارلىق ستاندارتتارعا ساي ەتىلىپ جاسالعان باسسەيننىڭ ۇزىندىعى 25 مەتردى, ەنى 11 مەتردى قۇرايدى. مۇندا ءبىر مەزگىلدە 50-گە تارتا ادام قاتار جۇزە الادى.
قازىرگى تاڭدا بۇل جەردە 25 ادام ەڭبەك ەتەدى. باسسەيننەن بولەك, عيماراتتا جاتتىعۋ جانە تەننيس زالدارى, دەمالىس ورنى, كيىم اۋىستىراتىن جانە جۋىناتىن بولمەلەر بار. باعاسى دا قاراپايىم حالىقتىڭ قالتاسى كوتەرەتىن دەڭگەيدە.
ابايلىقتاردى قۋانىشقا بولەگەن بۇل سپورتتىق كەشەننىڭ قۇرىلىسىنا وبلىستىق جانە اۋداندىق بيۋدجەتتەن 430 ملن تەڭگە جۇمسالدى. باسسەين قۇرىلىسىن مەردىگەر كومپانيا «نالادوچنىي تسەنتر تەميرتاۋ» جشس جۇرگىزىپ, ساپالى ەتىپ بىتىرگەن.
ايتا كەتۋ كەرەك, بۇل عيماراتتىڭ بوي كوتەرۋىنە اۋداندىق ارداگەرلەر ۇيىمى مەن اقساقالدار كەڭەسىنىڭ ەلباسىنىڭ اتىنا جازعان حاتى سەبەپشى بولعان ەدى. سونىڭ ارقاسىندا 2014 جىلى سپورت كەشەنىنىڭ جوبالاۋ-سمەتالىق قۇجاتتاماسى دايىندالىپ, قۇرىلىس جۇمىستارى جۇرگىزىلە باستاعان بولاتىن.
جالپى, اباي اۋدانىندا بۇقارالىق سپورتتى دامىتۋعا, سالاماتتى ءومىر سالتىن قالىپتاستىرۋعا ايرىقشا كوڭىل بولىنەدى. مۇندا تۇرعىنداردىڭ سپورتپەن شۇعىلدانۋى ءۇشىن بارلىق جاعداي جاسالعان دەۋگە بولادى. اۋداننىڭ سپورتتاعى جەتىستىكتەرى دە اۋىز تولتىرىپ ايتارلىقتاي. مىسالى, ابايلىق سپورتشىلار وبلىس كولەمىندەگى سپارتاكيادا جارىستارىندا ۇنەمى ۇزدىك ۇشتىكتىڭ ىشىندە جۇرەدى. سونداي-اق وسى اۋدانداعى سپورت مەكتەبىنىڭ تۇلەكتەرى حالىقارالىق ارەنادا قازاقستاننىڭ نامىسىن لايىقتى قورعاپ, تولايىم تابىستارعا قول جەتكىزگەن. اتاپ ايتار بولساق, سەرىك نۇرقازوۆ, سەرىك ساپيەۆ, ابىلايحان ءجۇسىپوۆ جانە باسقا دا سپورت ساڭلاقتاردىڭ اباي بوكس مەكتەبىنىڭ جاقسى اتىن ايداي الەمگە جايعانى تاريحي شىندىق.
«اۋداندا سپورتقا دەگەن كوزقاراس ەرەكشە. سالاماتتى ءومىر سالتىن ۇستانعان تۇرعىندارىمىزعا قولدان كەلگەن جاعدايدىڭ ءبارىن جاساۋعا تىرىسامىز. كەلەشەكتە 320 ورىندىق دەنەشىنىقتىرۋ-ساۋىقتىرۋ كەشەنىن سالۋ جوسپاردا بار», دەيدى اباي اۋدانىنىڭ اكىمى باۋىرجان اسانوۆ.
قايرات ءابىلدا,
«ەگەمەن قازاقستان»
قاراعاندى وبلىسى,
اباي اۋدانى
