ەلباسىنىڭ بەس الەۋمەتتىك باستاماسىن جۇزەگە اسىرۋعا بايلانىستى اتقارىلىپ جاتقان جۇمىستار جايىنا ارنالعان كەزەكتى ءباسپاسوز ءماسليحاتى جاتاقحانالار سالۋ ماسەلەسىنە ارنالعان بولاتىن. وعان ءبىلىم جانە عىلىم ۆيتسە-ءمينيسترى بيبىگۇل اسىلوۆا جانە «قارجى ورتالىعى» اق پرەزيدەنتى اسقار يبرايموۆ قاتىستى.
«مەملەكەت باسشىسىنىڭ حالىققا جولداۋىندا جانە كۇنى كەشە عانا جاريالانعان 5 الەۋمەتتىك باستاماسىندا ەلباسى جوعارى ءبىلىم ساپاسىن ارتتىرۋعا جانە ستۋدەنتتەردىڭ باسپانا جاعدايىن جاقسارتۋعا ەرەكشە كوڭىل بولگەن. بۇگىنگى كۇنى ەلدەگى جوو-لاردا ءبىلىم الاتىن 530 مىڭ ستۋدەنتتىڭ 204 مىڭى باسقا قالادان كەلگەندەر. بۇل بارلىق ستۋدەنتتىڭ 38 پايىزى باسپانا ماسەلەسىن شەشۋدى قاجەت ەتەتىنىن بىلدىرەدى. قازىرگى ۋاقىتتا ولاردىڭ ءبىر بولىگى قارجىلىق مۇمكىندىگىنە قاراي جالدامالى پاتەرلەردە تۇرىپ جاتىر, قالعان بولىگى جاتاقحانالارعا ورنالاستىرىلعان», دەدى ۆيتسە-مينيستر ب.اسىلوۆا.
ونىڭ ايتۋىنشا, بەس الەۋمەتتىك باستاما اياسىندا ءبىلىم گرانتتارىنىڭ ۇلعايتىلۋى ەلىمىزدەگى جوو-لاردا ءبىلىم الۋشىلار سانىنىڭ ارتۋىنا, ال بۇل ءوز كەزەگىندە جاتاقحانا ورىندارىن دا كوبەيتۋگە الىپ كەلەدى. «سوندىقتان پرەزيدەنت 2022 جىلدىڭ سوڭىنا دەيىن ستۋدەنتتەر جاتاقحاناسىندا 75 مىڭ جاڭا ورىن قۇرۋدى تاپسىردى. مينيسترلىك بۇل تاپسىرمالاردى ورىنداۋ ماقساتىندا بارلىق مۇددەلى تاراپتارمەن جينالىس وتكىزدى. ناتيجەسىندە قول جەتكەن الدىن الا جوسپار جايىندا ءبىلىم جانە عىلىم ءمينيسترى ۇكىمەت وتىرىسىندا مالىمدەگەن بولاتىن. جالپىلاپ ايتار بولسام, جوو نەمەسە قۇرىلىس جۇرگىزۋشى مەكەمە جاتاقحانا جوباسىن دايىنداپ, ولاردىڭ ءبىرى «قارجى ورتالىعى» اق-پەن كەلىسىمشارت جاسايدى. وعان سايكەس جاتاقحانا پايدالانۋعا بەرىلگەن كۇننەن باستاپ جوو نەمەسە قۇرىلىس جۇرگىزۋشى مەكەمە بەلگىلى ءبىر جىل بويى ءبىر ورىن ءۇشىن اي سايىن تولەم الىپ وتىرادى, ياعني قۇرىلىسقا جۇمسالعان شىعىندار وتەلەدى. سودان سوڭ كەلىسىمشارت نەگىزىندە جوو نەمەسە قۇرىلىس جۇرگىزۋشى ۇيىم بانكتەن نەسيە الىپ, جاتاقحانا سالۋعا كىرىسەدى», دەدى ب.اسىلوۆا. ايتۋىنشا, ستۋدەنت جاستاردىڭ ءومىر ءسۇرۋ جاعدايلارىن جاقسارتۋ ماسەلەسىن جەكەمەنشىك رەسۋرستاردىڭ, ونىڭ ىشىندە جوعارى وقۋ ورىندارىنىڭ, كوللەدجدەردىڭ, ينۆەستورلار مەن باسقا دا سەرىكتەستەردىڭ رەسۋرستارى ەسەبىنەن شەشۋ كوزدەلىپ وتىر.
ب.اسىلوۆا ايتىپ وتكەندەي, قازىرگى كەزدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ستۋدەنت جاستاردىڭ ءومىر ءسۇرۋ جاعدايلارىن جاقسارتۋ, سونىمەن قاتار جان باسىنا شاققانداعى نورماتيۆتىك قارجىلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنىپ جاتىر. جاقىندا ول مۇددەلى مەملەكەتتىك ورگاندارمەن كەلىسۋگە جىبەرىلەتىن بولادى.
بۇدان وزگە, ءبىلىم جانە عىلىم مينيسترلىگى جاتاقحانالار قۇرىلىسى جوبالارىن ارزانداتۋ باعىتىن ۇستانىپ وتىر, سەبەبى بۇگىنگى تاڭدا ۇسىنىلعان جوبالاردىڭ باعاسى ءبىرشاما كوتەرىڭكى.
«الدىن الا جاسالعان ەسەپتەۋلەر بويىنشا جاتاقحانالار سالۋعا شامامەن 118 ملرد تەڭگە بولىنەدى دەپ وتىرمىز. بۇل كەزەڭ-كەزەڭىمەن, ساتىلاپ بەرىلەتىن قاراجات. كەلەسى جىلى 100 ملن تەڭگە بولىنسە, 2022-2026 جىلدارى 15 ملرد تەڭگەدەن بولىنەتىن بولادى», دەدى ۆيتسە-مينيستر. ونىڭ ايتۋىنشا, بۇل جاتاقحانا سالۋداعى ەڭ وڭتايلى جوسپار. ال ەگەر بۇل ماقساتتى قۇرىلىس بولسا, وندا وعان 118 ملرد تەڭگە ەمەس, 225 ملرد تەڭگە ءبولۋ قاجەتتىلىگى تۋىندايتىن ەدى, دەيدى ول. سونىمەن قاتار ب.اسىلوۆا جاتاقحانا سالۋ ءۇشىن بانكتەن نەسيە الۋ ستۋدەنتتەردىڭ وقۋ اقىسىنا ەش اسەرىن تيگىزبەيتىنىن ايتتى.
«بىرىنشىدەن, جوو نەمەسە تاپسىرىس بەرۋشى بانكتەن نەسيە الادى, ال مەملەكەت جاۋاپكەرشىلىكتى ءوز موينىنا الادى. سوندىقتان جاتاقحانا سالعاننان, گرانتتار سانىنىڭ ارتقانىنان وقۋ اقىسى قىمباتتامايدى», دەگەن ۆيتسە-مينيستر ستۋدەنتتەردە تەك بۇرىنعىداي اي سايىنعى جاتاقحانا قۇنىن تولەپ تۇرۋ مىندەتتەمەسى عانا بولاتىنىن جەتكىزدى.
دينارا بىتىك,
«ەگەمەن قازاقستان»
