قىمباتقا باعالانعان ءمۇيىزى سورىنا اينالىپ, تالاي قاسكويلەر اشكوزدىكپەن قىرعانى سونشالىق, كەزىندەگى ءۇيىر-ءۇيىر كيىكتەردىڭ شوعىرى كوزدەن بۇل-بۇل ۇشتى. بيىل عانا كيىكتەر يندەر اۋدانىنىڭ اۋماعىنا كەلە باستادى. مامانداردىڭ سوزدەرىنە سەنسەك, قازىر اۋدان كولەمىندە مىڭنان استام كيىك تىرشىلىك ەتەدى.
– ەلىمىزدە كيىكتەردىڭ شوعىرى بەتپاقدالادا, ءۇستىرت, ورال ايماقتارىندا شوعىرلانعان. بىلتىرعى ساناق بويىنشا ەلىمىزدە 152 مىڭ كيىك ەسەپكە الىنسا, سونىڭ جارتىسىنان كوبى وسى باتىس وڭىرىندە. مەملەكەتتىڭ قامقورلىعى ناتيجەسىندە كيىكتەردىڭ باسى كوبەيە باستاعاسىن جاڭا قونىستارعا شىعۋدا. وسىعان ساي نەگىزگى شوعىرى بولعان باتىس قازاقستان وبلىسى كولەمىنەن يندەر اۋدانى اۋماعىنا كيىكتەر قونىس اۋدارا باس-
تادى. ولاردى قورعاۋعا باسا نازار اۋدارىلىپ وتىر, – دەيدى «وحوتزووپروم» رەسپۋبليكالىق مەملەكەتتىك كاسىپورنىنىڭ ءبولىم باسشىسى نۇربەك بەكمانوۆ.
اتالعان مەكەمەنىڭ عىلىمي قىزمەتكەرى باقتيار تاشەنوۆ تە دالا تاعىسىن قورعاۋعا مەكەمەنىڭ مۇمكىندىگى كۇشەيتىلگەنىن ايتادى. مىسالى, «وحوتزووپروم» رەسپۋبليكالىق مەملەكەتتىك كاسىپورنىندا باسقا مامانداردى ەسەپتەمەگەندە 250 ينسپەكتور جۇمىس ىستەيدى, جول تالعامايتىن قازىرگى زامانعى كولىكتەر الىنعان. ۇشاق پەن تىكۇشاقتار دا باقىلاۋعا پايدالانىلادى. كيىكتىڭ كارتاسى جاساقتالىپ, ءجۇرىپ وتكەن جەرلەرىنىڭ ءبارى قاداعالانىپ وتىر.
تاعى ءبىر جايت – ەلىمىزدىڭ باتىس ولكەسىندە قارا قاسقىرلار كەزدەسە باستاعان. «بۇل كەزىندە كاۆكاز جاعىنداعى سوعىس قيمىلدارىنىڭ زاردابىنان بىزگە قاراي قونىس اۋدارعاندارى بولۋى كەرەك. ولار كوبى كەرى كەتكەنمەن جەرگىلىكتى قاسقىرلارمەن شاعىلىسىپ قالعاندارى دا بار», دەيدى ب.تاشەنوۆ.
سالامات بازارباەۆ
اتىراۋ وبلىسى
