كەشە استاناداعى تاۋەلسىزدىك سارايىندا «نۇر وتان» حدپ-نىڭ كەزەكتەن تىس ءحىV سەزى ءوتىپ, پارتيانىڭ سايلاۋ الدىنداعى تۇعىرناماسى مەن پارتيالىق ءتىزىمى انىقتالدى. ونىڭ جۇمىسىنا ەلباسى, پارتيا توراعاسى نۇرسۇلتان نازارباەۆ قاتىسىپ, ءسوز سويلەدى.
سەزگە 850 مىڭعا جۋىق ءمۇشەسى بار «نۇر وتان» حدپ-نىڭ بارلىق وڭىرلەردەگى فيليالدارى مەن بولىمشەلەرىنەن 600-دەن استام دەلەگات قاتىستى. ولاردىڭ كوبى ەلىمىزگە تانىمال, تاۋەلسىز قازاقستاننىڭ ىرگەسىنىڭ نىعايۋىنا ۇلەس قوسقان ادامدار.
سەزد جۇمىسىن پارتيا ءتوراعاسىنىڭ ءبىرىنشى ورىنباسارى نۇرلان نىعماتۋلين كىرىسپە سوزبەن اشتى. ول الدىمەن سەزدىڭ رەسىمدىك ماسەلەلەرىن ورتاعا سالىپ, جۇمىس ءتارتىبىن دەلەگاتتاردىڭ داۋىس بەرۋىمەن بەكىتتىرىپ الدى. سونىڭ ىشىندە ەكى ماسەلەدەن تۇراتىن كۇن ءتارتىبى بەكىتىلدى. ءبىرىنشى ماسەلە – «نۇر وتان» حدپ-نىڭ: «قازاقستان. 2017 جىلعى كەزەڭگە دەيىنگى ماقساتتارى. ۇلتتىق ءىس-قيمىل جوسپارى» اتتى سايلاۋالدى تۇعىرناماسى تۋرالى بولدى. ەكىنشى ماسەلە – پارلامەنت ءماجىلىسى دەپۋتاتتارىنىڭ سايلاۋىنا پارتيا اتىنان تۇسەتىن مۇشەلەردىڭ ءتىزىمىن بەكىتۋگە ارنالدى. دەپۋتاتتاردىڭ ءبىراۋىزدان قولداۋىمەن كۇن ءتارتىبى بەكىتىلدى.
ءبىرىنشى ماسەلە بويىنشا ءسوز قازاقستان رەسپۋبليكاسىنىڭ پرەزيدەنتى, «نۇر وتان» حدپ ءتوراعاسى نۇرسۇلتان نازارباەۆقا بەرىلدى (پرەزيدەنت ن.نازارباەۆتىڭ ءسوزى بولەك بەرىلىپ وتىر).
ەلباسى, پارتيا توراعاسى ن.نازارباەۆ ءسوزىن اياقتاعان سوڭ نۇرلان نىعماتۋلين «نۇر وتان» كوشباسشىسىنىڭ پارتيا الدىنا قويىپ وتىرعان ناقتى تاپسىرمالارى ءسوزسىز ورىندالاتىنىنا دەلەگاتتار اتىنان سەنىم ءبىلدىردى.
جارىسسوزگە العاشقى بولىپ الماتى قالاسىنىڭ اكىمى, پارتيانىڭ قالالىق فيليالىنىڭ ءتوراعاسى احمەتجان ەسىموۆ شىقتى. تاۋەلسىزدىگىمىزدىڭ التىن بەسىگى – الماتى جۇرتشىلىعىنىڭ ىستىق سالەمىن اكەلىپ تۇرمىن, دەپ باستادى ول ءوزىنىڭ ءسوزىن. بۇگىنگى ەلباسى جاريالاعان تۇعىرناما بارشامىزدىڭ كوڭىلىمىزدەن شىعىپ وتىر. ەلدى جاڭا جەڭىستەرگە باستايتىن بۇل تۇعىرنامانى ءبىز تولىعىنان قولدايمىز. ونى جۇزەگە اسىرۋعا ءبىزدىڭ ءمۇمكىنشىلىكتەرىمىز ابدەن جەتەدى. مەملەكەتىمىز نىق, ەكونوميكامىز قۋاتتى, ەلىمىزدى ۇلكەن اسۋلاردان وتكىزەتىن سارا جولىمىز, دانا باسشىمىز بار.
ودان ءارى «نۇر وتان» پارتياسىنىڭ وتكەن پارلامەنتتىك سايلاۋدا بەلگىلەگەن باعدارلاماسىن تولىق جۇزەگە اسىرعانىن ايتا كەلىپ, وسى جوسپار شەڭبەرىندە الماتىدا جۇرگىزىلگەن جۇمىستارعا توقتالدى. سونىڭ ىشىندە ۇدەمەلى يندۋستريالىق-يننوۆاتسيالىق باعدارلامانى ىسكە اسىرۋ ءناتيجەسىندە 90 مىڭ جاڭا جۇمىس ورىندارى اشىلعانىن, ءىجو-ءنىڭ جان باسىنا شاققانداعى كولەمى 19 مىڭ اقش دوللارىنا جەتكەنىن, 2009 جىلى مەملەكەتتىك بيۋدجەتكە تۇسەتىن ءتۇسىم 638 ملرد. تەڭگە بولسا, بىلتىر ول 702 ملرد. تەڭگە قۇراعانىن, ال بيىل 1 ترلن. تەڭگەگە جۋىقتايتىنىن ايتتى. دەمەك, سوڭعى ەكى جىل ىشىندە سالىق ءتۇسىمى دە ءبىر جارىم ەسەگە وسكەن. قالا تۇرعىندارىنىڭ ءال-اۋقاتى جاقسارىپ كەلەدى, ورتاشا ايلىق جالاقىسى 125 مىڭ تەڭگەگە جەتتى. ەكونوميكامىز وركەندەگەن سايىن قوعامدىق تۇراقتىلىقتىڭ ىرگەسى نىعايا تۇسۋدە. «نۇر وتان» پارتياسى وسىنداي يگىلىكتى جۇمىستاردىڭ كوش باسىندا تۇر, دەدى ول. الەۋمەتتىك زەرتتەۋلەر بويىنشا, الماتىلىقتاردىڭ پارتياعا دەگەن سەنىمى 89 پايىزدى قۇرايدى. بۇل ەڭ الدىمەن پارتيا باسشىسى ن.نازارباەۆقا دەگەن بيىك سەنىم كورىنىس.
ودان ءارى شەشەن پرەزيدەنتتىڭ ءاربىر قازاقستاندىقتىڭ قالتاسىندا ءۇش كىلت: جەكەمەنشىك پاتەرىنىڭ, اۆتوماشينەسىنىڭ جانە جۇمىس ورنىنىڭ كىلتتەرى بولۋى كەرەك دەگەن ءسوزىن ەسكە الا وتىرىپ, وسى تالاپتىڭ الماتىدا قالاي ورىندالىپ جاتقانىنا توقتالدى. الدىمەن پاتەر ماسەلەسىنە توقتالايىن, دەدى ول. سوڭعى ءۇش جىلدا قالادا 2,6 ملن. شارشى مەتر تۇرعىن ءۇي پايدالانۋعا بەرىلدى. مۇنداي قۇرىلىس قارقىنى قالا تاريحىندا بۇرىن بولىپ كورمەگەن. قازىر قالانىڭ ءاربىر تۇرعىنىنا 20,3 شارشى مەتر تۇرعىن ۇيدەن كەلەدى. ال اۆتوموبيلمەن قامتاماسىز ەتىلۋگە كەلەتىن بولساق, الماتىنىڭ ءاربىر ەرەسەك تۇرعىنىنا ول 1,6 دانادان كەلەدى. ەندى ءۇشىنشى كىلت, ياعني تۇرعىنداردىڭ جۇمىسپەن قامتاماسىز ەتىلۋىنە كەلەتىن بولساق, 2009 جىلدان بەرى قالادا جاڭادان 90 مىڭ جۇمىس ورنى اشىلدى. قازىر جۇمىسسىزدىق 5,6 پايىزعا دەيىن تومەندەپ, تاۋەلسىزدىك جىلدارىنداعى ەڭ تومەنگى دەڭگەيگە جەتتى.
ماڭعىستاۋ وبلىسى ارداگەرلەر كەڭەسىنىڭ توراعاسى ومىرزاق وزعانباەۆ تاۋەلسىزدىكتىڭ 20 جىلدىعىن ەڭ ۇلى مەرەكە رەتىندە اۋىزعا الدى. ودان ءارى تاۋەلسىزدىكتىڭ ەلەڭ-الاڭىندا ءوزىنىڭ دە مەملەكەتتىك قىزمەتتەردە بولىپ, قىزىعى دا, قيىندىعى دا كوپ 90-شى جىلداردىڭ باسىندا ەلباسىنىڭ كومانداسىندا تىزە قوسىپ بىرگە ەڭبەك ەتكەنىن ايتىپ ءوتتى. سول جىلداردى ءوز ءومىرىمنىڭ ەڭ ءتاتتى جانە ەڭ باقىتتى جىلدارى دەپ سانايمىن, دەي كەلىپ, شەشەن سول ۋاقىتتاردا ەلباسىنىڭ كۇنى-ءتۇنى تىنىم تاپپاي جۇمىس ىستەگەندىگىنىڭ كۋاسى بولعانىن ەسكە الدى. ول ەلىمىزدىڭ بارلىق اۋماقتارى عانا ەمەس, الىس-جاقىن شەت ەلدەردىڭ بارىنە شىعىپ, تاۋەلسىز قازاق ەلىن تانىتىپ, ولاردى ەكونوميكالىق ىنتىماقتاستىققا, ساياسي ارىپتەستىككە شاقىرىپ, تىنىم تاپپاي ءجۇردى. سونىڭ ارقاسىندا ەكونوميكامىزعا ميللياردتاعان دوللار ينۆەستيتسيا قۇيىلىپ, ول جوعارى قارقىنمەن دامىدى, ەلىمىز ساياسي جاعىنان بولجامدى, تۇراقتى ەل رەتىندە الەمگە تانىلدى. ەندى بۇگىنگى كۇنى قازاقستاندى, ونىڭ جاس ەلورداسى – استانانى بىلمەيتىن ادام كەمدە-كەم, دەدى شەشەن.
ودان ءارى ول تاۋەلسىزدىكتىڭ 20 جىلىندا جەتكەن جەتىستىكتەرگە قىسقاشا شولۋ جاساي كەلىپ, ولاردىڭ بۇرىن ەشقاشان دا بولماعان عاجايىپ ەكەندىگىن اتاپ ءوتتى. سونىڭ ىشىندە الەمدىك ساياساتقا ارالاسىپ, بارلىق الەمدى مويىنداتقان باستامالار مەن ۇسىنىستار جاساعانىن, ەۋروپانىڭ اسا بەدەلدى ۇيىمى – ەقىۇ-نىڭ ءتوراعاسى بولعانىن ايتا كەلىپ, بۇل ۋاقىت قازاقستان تاريحىنىڭ «التىن عاسىرى» بولىپ تانىلاتىنى ءسوزسىز ەكەنىن اتاپ كورسەتتى. ءسوزىنىڭ سوڭىندا شەشەن «نۇر وتان» حدپ توراعاسىنىڭ بۇگىن بەلگىلەپ وتىرعان تۇعىرناماسىنىڭ دا مۇلتىكسىز ورىندالارىنا سەنىم ءبىلدىردى.
كەلەسى ءسوز قوستاناي وبلىسى «يۆولگا-حولدينگ» جشس باس ديرەكتورى ۆاسيلي روزينوۆقا بەرىلدى. ءبىزدىڭ ەلىمىز ۇنەمى جاقسىلىققا قاراي وزگەرىپ, ەكونوميكامىز قارىشتى قاتتى دامىپ, ءال-اۋقاتىمىز كۇننەن-كۇنگە ارتىپ كەلەدى. ءبىز – قازاقستاندىقتار تۇراقتىلىق پەن ءوزارا سىيلاستىققا ەشقاشان قاياۋ تۇسىرمەي, اتالارىمىز سالىپ كەتكەن سارا جولدى بەرىك ۇستانىپ كەلەمىز, دەدى ول ءوزىنىڭ سوزىندە. وعان 20 جىلعى تاۋەلسىزدىك جىلدارىمىز كۋا. ءبىز وسى جىلداردا پرەزيدەنت ن.نازارباەۆتىڭ باستاۋىمەن اسىل قازىنالارىمىزدىڭ ىرگەسىن نىعايتا تۇستىك. ودان ءارى شەشەن ءوزىنىڭ شارۋاشىلىعى مەن قول جەتكەن تابىستارىنا توقتالدى. بۇگىنگى كۇنى ءبىزدىڭ ونىمدەرىمىز الەمدىك رىنوكتاعى باسەكەلەستىككە توتەپ بەرە الادى. ەڭ باستىسى – بىزدەر, قازاقستاندىقتار ءوز كۇشتەرىمىزگە سەنىپ, ءوزىمىزدىڭ قولىمىزدان ءىس كەلەتىنىنە كوزىمىزدى جەتكىزدىك, دەدى ول.
ءبىزدىڭ اگرارلىق كاسىپورنىمىزدا 10 مىڭداي ادام قىزمەت ەتىپ, تۇراقتى ەڭبەكاقى الىپ تۇرادى. وسىنىڭ بارىنە پرەزيدەنت نۇرسۇلتان نازارباەۆتىڭ اگرارلىق سالاعا ۇلكەن كوڭىل ءبولىپ, قامقورلىق جاساعاندىعىنىڭ ارقاسىندا قول جەتىپ وتىر. بۇل ورايدا ءوز ۇجىمىمنىڭ پرەزيدەنتكە دەگەن دەگەن شىنايى قۇرمەتىن جەتكىزگىم كەلەدى, دەگەن شەشەن ودان ءارى, بيىل, سوڭعى 50 جىلدا بولىپ كورمەگەن رەكوردتى استىقتىڭ قازاقستان تاۋەلسىزدىگىنىڭ 20 جىلدىعىنا تارتۋ ەكەنىن جانە ونىڭ ەلباسى ن.نازارباەۆقا ارنالاتىنىن مالىمدەدى. ءسوزىنىڭ سوڭىندا «نۇر وتاننىڭ» جاڭا مىندەتتەر جۇكتەپ وتىرعانىن ايتا كەلىپ, ءبىز بۇرىنعى سايلاۋدا بەرگەن ۋادەمىزدى تولىق ورىنداعاندىقتان, سايلاۋشىنىڭ بەتىنە ۇيالماي, تۋرا قاراي الامىز. جاڭا سايلاۋ الدىندا بەلگىلەپ وتىرعان تۇعىرنامانىڭ دا ءسوزسىز ورىندالاتىنىنا ولاردىڭ كۇمانى بولماسىن, دەدى.
مىنبەگە كوتەرىلگەندەردىڭ ءبىرى «اتامەكەن» ۇلتتىق ەكونوميكالىق پالاتاسىنىڭ باسقارما ءتوراعاسى, ساۋدا-ونەركاسىپ پالاتاسىنىڭ پرەزيدەنتى ابىلاي مىرزاحمەتوۆ ءوز سوزىندە مەملەكەت باسشىسىنىڭ ۇدايى قامقورلىق كورسەتۋىنىڭ ارقاسىندا ەلىمىزدە قولايلى كاسىپكەرلىك احۋال قالىپتاسقانىن, سونىڭ ارقاسىندا شاعىن جانە ورتا بيزنەس وكىلدەرى داعدارىستى ەڭسەرىپ قانا قويماي, ەكونوميكامىزدىڭ ورلەۋىنە ءتيىمدى جۇمىس ىستەگەنىن جەتكىزدى. «ءسىز 1999 جىلى «نۇر وتاننىڭ» ءبىرىنشى سەزىندە وتاندىق كاسىپكەرلىكتى قولداۋ باعىتىندا ناقتى تاپسىرمالار جۇكتەگەن ەدىڭىز. ولار مۇلتىكسىز ورىندالىپ كەلە جاتقانىن سالتاناتتى تۇردە ءمالىمدەيمىن. سالىقتاردىڭ ازايتىلۋى, اكىمشىلىك كەدەرگىلەردىڭ جويىلۋى, رۇقسات ليتسەنزيالاردىڭ قىسقارتىلۋى – كاسىپكەرلەر مۇددەسىن ويلاۋدان تۋعان شارالار. ودان بەرگى ۋاقىتتا ەلدىڭ جالپى ىشكى ءونىمىنىڭ ۇزدىكسىز ءوسۋىنە زور ۇلەس قوستى. ول بۇگىنگى تاڭدا 30 پايىزدان استامىن قۇرايدى. قازىر 1,2 ميلليوننان استام شاعىن جانە ورتا كاسىپكەرلىك سۋبەكتىلەرى جۇمىس ىستەيدى».
پالاتا باسشىسى پارتيانىڭ سايلاۋالدى تۇعىرناماسىندا بيزنەس سالاسىن دامىتۋدىڭ جاڭا تەتىكتەرىنىڭ ۇسىنىلعانىن, نىق ماقساتتارعا ۇمتىلدىرۋدىڭ ناقتى مىندەتتەرى قاراستىرىلعانىن اتادى. ەلدە كۇشتى كاسىپكەرلىك كلاستى قالىپتاستىرۋ – باسىم باعىتتاردىڭ ءبىرى. ەكونوميكامىزدىڭ قوزعاۋشى كۇشى رەتىندە الەۋەتىن كۇشەيتۋ جولدارىن بەلگىلەۋ ەكونوميكالىق ءوسۋدىڭ باستى ناتيجەسى تابىستىڭ ارتۋىنا ىقپالدىلىعى ارتا تۇسەتىن بولادى.
«بيزنەستىڭ جول كارتاسى-2020» باعدارلاماسىن ورىنداۋ وڭىرلىك كاسىپكەرلىكتى دامىتىپ, تەڭگەرىمدى وسۋىنە جانە جاڭا جۇمىس ورىندارىن قۇرۋعا اكەلەدى. الداعى جىلدارى 1,5 ميلليونداي ادامدى جۇمىسپەن قامتۋعا مۇمكىندىك بەرەدى. ءوزىن-ءوزى جۇمىسپەن قامتاماسىز ەتكەندەردىڭ ۇلەسى ەكونوميكالىق بەلسەندى حالىقتىڭ جالپى سانىندا 33,3 پايىزدان 26 پايىزعا دەيىن ازايتىلادى. جاڭا پارلامەنتتىك مەرزىمدە اتقارىلاتىن ىستەر پرەزيدەنتتىڭ 2020 جىلعا دەيىنگى دامۋ ستراتەگيالىق باعدارلاماسىمەن تىعىز ساباقتاس. ا.مىرزاحمەتوۆ ويىن تۇيىندەي كەلىپ, كاسىپكەرلەر الداعى ۋاقىتتا دا بار كۇش-قايراتىن ەلدىڭ, حالىقتىڭ يگىلىگىنە ارنايتىنىنا سەنىم ءبىلدىردى.
«قازفوسفات» مينەرالدى تىڭايتقىشتار جشس-ءنىڭ اعا اۋىسىم شەبەرى بولاتحان كوپتىلەۋوۆ قازاقستاننىڭ جەتىستىكتەرىن ن.نازارباەۆتىڭ ەسىمىمەن تىكەلەي بايلانىستىراتىنىن, اتقارىلىپ جاتقان ۇلان-عايىر جۇمىستارعا حالىقتىق پارتيانىڭ سايلاۋالدى مىندەتتەمەلەرى تىكەلەي ىقپال جاساعانىن تىلگە تيەك ەتتى. «مەن قاراپايىم جۇمىسشىمىن. قۇرمەتتى نۇرسۇلتان ءابىش ۇلى, مەن دە ءسىز سياقتى ەڭبەك جولىمدى وندىرىستەن باستادىم. مىنەزىمدى ءوندىرىس شىڭدادى دەپ ەدىڭىز بىردە. بىزگە از سويلەۋ, كوپ ءىس تىندىرۋ ءتان. ءسىز توراعالىق ەتەتىن «نۇر وتان» پارتياسى دا ناقتى ءىس-قيمىل ۇيىمى ەكەنىن سان ءمارتە دالەلدەپ كەلەدى. كەزىندە حالىقتىق تۇعىرنامانىڭ بارلىق باپتارى ۋاقىتىنان بۇرىن ورىندالدى. ميلليوننان استام وتانداستارىمىز جۇمىسقا ورنالاستى. زاۋىتتار مەن فابريكالار سالىنىپ جاتىر. حالىق تىرشىلىگى ءبىرشاما جاقساردى. ءبىر سوزبەن ايتقاندا, ايتىلدى ما – ىستەلدى! سوندىقتان دا, ءبىز ارقاشان, ەلباسى پارتياسى «نۇر وتاندى» قولدايمىز! جيىرما جىلدا جەتكەن جەتىستىكتەرىمىز ۇلان-عايىر. پارتيامىزدىڭ ناقتى ءارى ايقىن ءىس-ارەكەت جوسپارى, مەملەكەتىمىزدىڭ ءاربىر ازاماتىنىڭ مۇددەسىن قورعايتىن تۇعىرناماسى – الداعى سايلاۋداعى شىنايى جەڭىسىمىزدىڭ, بولاشاق جەتىستىگىمىزدىڭ كەپىلى», دەپ ءسوزىن «ەلىن سۇيگەن ەلباسىمەن بىرگەمىز!» دەگەن جىر جولدارىمەن اياقتادى.
كوكشەتاۋ ۋنيۆەرسيتەتىنىڭ ماگيسترانتى الەنا گەراسيموۆا ءوزىن نۇروتاندىقتار ساپىندا بولعانىن مارتەبە, قۇرمەت سانايتىنىن, 2007 جىلى سايلاۋعا العاش قاتىسقاننان بەرى «جاستار ساياساتى» باعدارلاماسىنا, پارتيانىڭ ساياسي شارالارىنا ۇزبەي اتسالىسىپ كەلە جاتقانىن ايتىپ بەردى. وتكەن پرەزيدەنتتىك سايلاۋدا 85 مىڭعا تارتا جاس كومەكشىلەر قاتارىنان تابىلىپ, ءومىرىندە ۇمىتىلماستاي ساقتالىپ قالىپتى. «ءسىزدىڭ باستاۋىڭىزبەن حالقىمىز تالاي سىنداردان ءمۇدىرمەي ءوتتى. قانشا قيىندىق كەزىكسە دە مۇقالمادى, مويىمادى. تىعىز بىرلىكتىڭ, اسقان ۇيىمشىلدىقتىڭ ۇلگى-ونەگەسىن كورسەتتى. قوعامداعى تاتۋلىق العا جەتەلەپ, شىنايى جەڭىستەرگە باستادى. ءبارىمىز «قازاقستان – وتانىم» دەگەن ءبىر عانا اسقاق ۇعىممەن ءومىر سۇرەمىز. كەڭ-بايتاق ەلىمىزدىڭ ەندىگى تاريحىن ءبىز – جاستار جاسايتىن بولامىز. ءسىزدىڭ جارقىن باستامالارىڭىز بەن العا قويعان ماقساتتارىڭىزدىڭ بارلىعى ءتۇپتىڭ-تۇبىندە جاستار يگىلىگىن كوزدەيدى. ءبىز وعان لايىقتى ىستەرمەن جاۋاپ بەرۋگە ارقاشان دايىنبىز. پارتيانىڭ سايلاۋالدى باعدارلاماسى ومىرلىك ماڭىزدى ماسەلەلەردى العا تارتۋمەن قۇندى», دەدى.
زىلتەمىر كوتەرۋدەن پەكيندە وتكەن ءححىح جازعى وليمپيادا ويىندارىنىڭ جانە الەمنىڭ ءۇش دۇركىن چەمپيونى يليا يلين مىنبەرگە كوتەرىلگەندە, زال ءىشىن دۋ شاپالاق كومىپ كەتتى. جينالعاندار جۋىردا وتكەن الەم چەمپيوناتىندا قازاقستاننىڭ ءانۇرانىن ويناتىپ, كوك بايراعىن كوككە جەلبىرەتكەن باتىر وعلانىنا رياسىز قۇرمەتىن وسىلاي ءبىلدىردى.
ول ءوز ءسوزىن كوتەرىڭكى ۇنمەن باستادى. ونىڭ جوعارى ەموتسيالىق كوڭىل-كۇيىن تۇسىنۋگە بولادى. جانى جابىرقاپ, قينالعان شاقتاردا تىكەلەي ەلباسىدان قولداۋ تاپقانىن ءوزى دە جاسىرمادى. «مەن سپورتتىق جەتىستىكتەرىممەن ەمەس, نۇرسۇلتان ءابىش ۇلىنداي پرەزيدەنتى بار تاۋەلسىز ەلىممەن ماقتانامىن. وسىنداي ەلدە تۇرعانىمدى ۇلكەن باقىت سانايمىن. پاريج تورىندە التىننان القا تاققاندا قۇتتىقتاۋىڭىزدى الىپ, توبەم كوككە جەتكەندەي بولدى. سول جەڭىسىمدى پرەزيدەنتىمە, ەلىمە ارنادىم», دەگەندە زال تاعى دا دۇركىرەتە قول سوقتى.
داڭقتى سپورتشى شەتەلدەرگە ءجيى شىعاتىنىن, وتانىنا دەگەن ماحاببات, قازاقستاندىقتاردىڭ قولداۋلارى جىگەرىنە جىگەر قوسىپ, ۇنەمى جەڭىستەرگە جەتەلەيتىنىن ايتا كەلىپ, كەلەسى جەڭىسىمىز الداعى سايلاۋ بولسىن, دەگەن اق تىلەگىن جولدادى.
سەزدە سويلەگەندەردىڭ ەڭ سوڭعىسى جاستار سىيلىعىنىڭ لاۋرەاتى, اكتەر نۇرلان ءالىمجانوۆ بولدى. ول ءوزىنىڭ كينودا ەلباسى نۇرسۇلتان نازارباەۆتىڭ وبرازىن سومداعانىن اۋىزعا الدى. ونىڭ قانشالىقتى شەبەرلىكپەن ورىندالعانىنا باعا بەرۋ, البەتتە, كورەرمەننىڭ ەنشىسىندە. الايدا سول كەزدەردە بويىمدى كەرنەگەن سەزىمدەر تۋرالى ايتىپ بەرەيىن, دەي كەلىپ, شەشەن وبرازدى اشۋ بارىسىندا جاس نۇرسۇلتاننىڭ ءومىرى مەن ىستەرىن زەرتتەگەنىن جانە سول كەزدەردە ونىڭ جاستايىنان ىسكەر, ارقاشاندا تاباندى ءارى باتىل شەشىمدەر قابىلداۋعا دايىن تۇرعانىنا ءتانتى بولعانىن جەتكىزدى. ءسىزدىڭ قازاقستان سەكىلدى الىپ ەلدى باسقارىپ, ونى كەمەل بولاشاققا جەتكىزەتىنىڭىز سول كەزدە-اق بەلگىلى بولعانى انىق. سوندىقتان دا ءبىز سەكىلدى جاستار ءسىزدىڭ سوڭىڭىزدان ەرىپ, بولاشاعىن ءسىز باسقارىپ وتىرعان پارتيامەن بايلانىستىرادى, دەدى ول.
وسىدان كەيىن سەزد جۇمىسىن جۇرگىزىپ وتىرعان ن.نىعماتۋلين ءجارىسسوز توقتاتىلسىن دەگەن ۇسىنىس تۇسكەنىن جاريا ەتتى. ۇسىنىس داۋىسقا قويىلىپ, ءبىراۋىزدان قابىلداندى. ءسويتىپ, سەزد ەكىنشى ماسەلەنى تالقىلاۋعا كوشتى. پارتيانىڭ ساياسي كەڭەسىندە ۇزاق تالقىلانىپ, دايىندالعان ءماجىلىس سايلاۋىنا ۇسىنىلاتىن كانديداتتاردىڭ پارتيالىق ءتىزىمىن ورتالىق اپپارات جەتەكشىسىنىڭ ورىنباسارى قۇمار اقساقالوۆ وقىپ بەردى. 127 ادامنان تۇراتىن تىزىمدە ەلگە بارىنشا بەلگىلى قايراتكەرلەر, تانىمال تۇلعالار كوپ بولىپ شىقتى. ءماجىلىستىڭ بۇرىنعى دەپۋتاتتارى دا از ەمەس. دەلەگاتتار تىزىمگە تولىعىمەن داۋىس بەرىپ, ونى بەكىتتى. ءسويتىپ, پارتيانىڭ كەزەكتەن تىس سەزى ءوز جۇمىسىن اياقتادى.
-----------------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
