اتاپ وتەيىك, نۇرجان التاەۆ اتىراۋداعى 7 ادام قازا تاپقان ۆاحتالىق قالاشىقتاعى ءورت جاعدايى سالدارىن انىقتايتىن ۇكىمەتتىك كوميسسيانى باسقاردى. 3 ناۋرىز, سەنبى كۇنى, اتىراۋ وبلىسىنىڭ قاراباتان ستانتسياسىندا گاز تۋربينالىق ەلەكتر ستانتسياسىنىڭ قۇرىلىس الاڭىندا بولعان توتەنشە جاعدايدىڭ ءمان-جايىن انىقتاۋ ءۇشىن كوميسسيا كەلدى.
كوميسسيا قۇرامىنا ىشكى ىستەر مينيسترلىگى, دەنساۋلىق ساقتاۋ مينيسترلىگى, توتەنشە جاعدايلار كوميتەتى مەن اتىراۋ وبلىستىق اكىمدىك وكىلدەرى كىردى.
قاراباتان ستانتسياسىندا ورىن العان وقيعانى تەكسەرۋدەن كەيىن ەڭبەك جانە الەۋمەتتىك قورعاۋ ۆيتسە-ءمينيسترى اتىراۋ وبلىستىق اۋرۋحاناسىنىڭ حيرۋرگيالىق بولىمىندە ەم الىپ جاتقان ەكى زارداپ شەگۋشىگە باردى. بۇگىندە ولاردىڭ جاعدايى تۇراقتى, جۇمىسشىلار وقيعا ورنىنان تومەن جاعدايداعى كۇيىكپەن اۋرۋحاناعا جەتكىزىلىپ, ءتيىستى ەم قابىلداۋدا.
ەڭبەك جانە الەۋمەتتىك قورعاۋ ۆيتسە-ءمينيسترىنىڭ ايتۋىنشا, توتەنشە جاعداي ورىن العان جەردە بولعان كومپانيانىڭ بارلىق قىزمەتكەرلەرى ساقتاندىرىلعان, سوندىقتان تەرگەۋ اياقتالعاننان كەيىن زارداپ شەككەن قىزمەتكەرلەر مەن قازا بولعان قىزمەتكەرلەردىڭ تۋىستارى قارجىلىق كومەك الادى.
- زاڭنامادا بەلگىلەنگەن راسىمدەر بار, كىمنىڭ كىناسى - جۇمىس بەرۋشىلەردىڭ نەمەسە جۇمىسشىلاردىڭ وزدەرىنىڭ كىناسى بولعانىن انىقتاۋ ءۇشىن بارلىق راسىمدەردى جۇرگىزۋىمىز كەرەك. ءبىز قازىر بارلىق ساقتاندىرۋ كەلىسىمشارتتارىن كوتەرىپ, قىزمەتكەرلەرگە قانداي وتەماقى تولەنەتىنىن قاراستىرامىز. بۇدان باسقا, توتەنشە جاعداي ورىن العان نىساندى تەكسەرگەننەن كەيىن, بارلىق جاتاقحانالار جۇمىسىن توقتاتا تۇرۋ تۋرالى شەشىم قابىلداندى», - دەدى نۇرجان التاەۆ.
سونداي-اق, ۆيتسە-ءمينيستردىڭ ايتۋىنشا, قازىرگى ۋاقىتتا كومپانيانىڭ باسقا قىزمەتكەرلەرى تەرگەۋ اياقتالعانعا دەيىن ۇيلەرىنە جىبەرىلدى. ولار ءۇشىن جالاقى ساقتالادى. بارلىق كونتەينەرلىك ۇلگىدەگى جاتاقحانالار قاۋىپسىزدىكتىڭ ستاندارتتارىنا جانە تالاپتارىنا تولىق سايكەستەندىرىلگەننەن كەيىن, جۇمىسشىلار قايتا كەلىپ, جۇمىسىن جالعاستىرا الادى.
