ازيا-تىنىق مۇحيت ايماعى كينووندىرۋشىلەر فەدەراتسياسىن 1954 جىلى گونكونگتىڭ تانىمال كينەماتوگرافيسى, مەتسەنات, مەدياماگنات, قىتاي كينووندىرىسىنىڭ باستاۋىندا تۇرعان شاۋ يفۋ قۇرعان. فەدەراتسيانىڭ نەگىزگى باعىتى – كينووندىرىستى دامىتۋداعى ىقپالداستىق, ازيا-تىنىق مۇحيت ايماعىنداعى ەلدەر كينوگەرلەرى اراسىندا دوستىق قارىم-قاتىناستى نىعايتۋ, سونىمەن قاتار, ازياداعى ەڭ ءىرى كينوفەستيۆالدى ءداستۇرلى تۇردە وتكىزىپ تۇرۋ. كينەماتوگرافياسى دامىعان, الەم مويىنداعان جاپونيا, قىتاي, ءۇندىستان, وڭتۇستىك كورەيامەن قاتار, فەدەراتسيا قۇرامىنا, كينوونەرى قارقىندى دامىپ كەلە جاتقان اۋستراليا, جاڭا زەلانديا, مالايزيا, تايلاند, ۆەتنام, يندونەزيا, سينگاپۋر, فيليپپين, يران, پاكىستان سەكىلدى 24 مەملەكەت مۇشەلىككە ەنگەن. قازاقستان كينەماتوگرافيستەرى ءۇشىن بۇل جاڭاشا دامۋ, جاڭا باعىت. بۇل كينووندىرىستەگى جاڭا تەحنولوگيالاردى يگەرۋ ءۇشىن جانە فەدەراتسيا مۇشەلىگىندەگى ەلدەرمەن بىرلەسكەن جوبالاردى ىسكە اسىرۋ ارقىلى سول ەلدىڭ كينونارىعىنا ەنۋ ءۇشىن تاپتىرماس مۇمكىندىك.
ايتا كەتەلىك, سوڭعى جىلدارى حالىقارالىق ىنتىماقتاستىق باعىتىندا كينوستۋديا بىرنەشە جوبانى ورايلى جۇزەگە اسىرا باستادى. 2017 جىلى «قازاقفيلم» ۇندىستاندىق كينەماتوگرافيستەرمەن بىرلەسكەن جوبانى ىسكە اسىرعان بولاتىن. «قازاقفيلمنىڭ» قاتىسۋىمەن ەلىمىزدىڭ كورىكتى جەرلەرى كورىنىس تاپقان رەجيسسەر ساچيندرا شارمانىڭ «Love you family» اتتى تۋىندىسى العاش رەت تەك قازاق تىلىنە ءتارجىمالانىپ, «تۋعان ءۇيىم – تىرەگىم» اتتى اتاۋمەن وتاندىق كينوپروكاتقا جىبەرىلدى.
سونداي-اق كينوستۋديانىڭ وندىرىسىندە ازيا-تىنىق مۇحيت ەلدەرى كينووندىرۋشىلەرى فەدەراتسياسىنا تاعى ءبىر مۇشە مەملەكەت – قىتايمەن جوباسى بار. «كومپوزيتور» ءفيلمى ەكىنشى دۇنيەجۇزىلىك سوعىستا الماتىدا ءومىر سۇرگەن قىتايلىق كومپوزيتور سي سين حاي مەن قازاقتىڭ ۇلى كومپوزيتورى باقىتجان بايقاداموۆتىڭ دوستىعى تۋرالى باياندايتىن كوركەم تۋىندى.
ازيا-تىنىق مۇحيت ايماعى ەلدەرىنىڭ كينووندىرۋشىلەر فەدەراتسياسىنا مۇشە بولۋ «قازاقفيلمگە» بىرلەسكەن جوبالاردى ىسكە اسىرۋعا مۇمكىندىك بەرەدى. بۇگىندە بۇل كينوستۋديانىڭ باسىمدىق بەرىپ وتىرعان باعىتتارىنىڭ ءبىرى.
ايگۇل احانبايقىزى,
«ەگەمەن قازاقستان»
الماتى
