تاۋەلسىزدىكتىڭ 20 جىلدىعى قارساڭىندا كوپتەگەن جاڭا كاسىپورىندار مەن الەۋمەتتىك-مادەني نىساندار پايدالانۋعا بەرىلىپ, ءوڭىردىڭ ەكونوميكالىق الەۋەتىن ارتتىرا تۇسۋدە. جاقىندا اقتوبە قالاسىندا تاعى ءبىر تىڭ جوبا جۇزەگە اسىرىلىپ, پوروللون جانە قايتالاما پوروللون بۇيىمدارىن شىعاراتىن زاۋىت ىسكە قوسىلدى. بۇل كاسىپورىن ەل تاۋەلسىزدىگىنىڭ 20 جىلدىعىنا وراي وبلىستىڭ ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا پايدالانۋعا بەرىلدى. جوبانى «يۋجپرومسناب» جشس جۇزەگە اسىردى. سەرىكتەستىك ديرەكتورى سۆەتلانا زوتكينانىڭ مالىمدەۋىنشە, بۇل زاۋىت باتىس قازاقستانداعى تەڭدەسى جوق بىرەگەي كاسىپورىن. جوبانى جۇزەگە اسىرۋعا سەرىكتەستىك ءوزىنىڭ 82,4 ملن. تەڭگە قارجىسىن سالىپتى. جوبالىق قۋاتى جىلىنا 10 مىڭ توننا ءونىم وندىرۋگە مۇمكىندىك بەرەتىن زاۋىتتا جاڭادان 10 جۇمىس ورنى اشىلدى. زاۋىتتىڭ قوندىرعىلارى دا, شيكىزاتى دا رەسەيدىكى. مۇندا جۇمىس ىستەيتىن مامان جۇمىسشىلار رەسەيدىڭ يجەۆسك قالاسىندا تاجىريبەدەن وتكەن. كاسىپورىن ءوزىن ءۇش جىلدا اقتايدى دەپ كۇتىلۋدە. زاۋىتتا شىعارىلاتىن جۇمساق پەنوپوليۋرەتان جيھاز, اۆتوموبيل ءجانە اۋە كولىكتەرىنىڭ ورىندىقتارى ءوندىرىسىنە تاپتىرمايتىن ماتەريال, سونداي-اق, ونى جۇمساق ويىنشىقتار مەن سپورتتىق توسەنىشتەر جاساۋعا پايدالانۋعا دا بولادى. زاۋىتتىڭ تۇساۋكەسەرىندە ءسوز العان اقتوبە قالاسىنىڭ اكىمى نۇرمۇحامبەت ءابدىبەكوۆ بۇل جوبانى شاعىن جانە ورتا كاسىپكەرلىكتى دامىتۋدىڭ تاماشا ۇلگىسى رەتىندە باعالادى. شاھار باسشىسى جىل اياعىنا دەيىن وسىنداي 20 نىسان پايدالانۋعا بەرىلەتىنىن, 800-دەن استام جۇمىس ورىندارى اشىلاتىنىن جەتكىزدى. زاۋىتتىڭ باس تەحنولوگى الەكساندر بۋدانوۆ ءوندىرىس ۇدەرىسىمەن تانىستىرىپ, العاشقى ءونىمدى شىعارىپ, ۇسىندى. بۇعان دەيىن پوروللوندى رەسەيدەن الىپ كەلگەن اقتوبەلىك جيھاز قۇراستىرۋشىلار ەندى بۇل ءونىمدى الىستان اربالاماي, وزىمىزدەن الا الاتىن بولدى. شاعىن بولسا دا ونىمدەرىنە سۇرانىس جوعارى كاسىپورىننىڭ تولىق قۋاتىندا جۇمىس ىستەپ كەتەتىنىنە سەنىم مول.
ساتىبالدى ءساۋىرباي.
اقتوبە وبلىسى.
