جاڭارعان كوپىر

توعىز جولدىڭ تورابىنداعى بۋىرقانعان قاراتال وزەنىندەگى جارتى عاسىر بۇرىن سالىنعان كوپىردىڭ تىرەكتەرى ءمۇجىلىپ, اپاتتى جاعدايدا ەكەندىگى انىقتالىپ, جوندەۋ جۇمىسى باستالعان ەدى. ەندى جاڭارعان كوپىر ەل يگىلىگىنە بەرىلىپ, وبلىس اكىمى اڭسار مۇساحانوۆ تالدىقورعاندىقتاردى قۋانىشىمەن قۇتتىقتادى. كوپىر قۇرىلىسىنا بيۋدجەتتەن 415,9 ملن. تەڭگە بولىنسە, بيىلعى ماۋسىم ايىندا «تالدىقورعان ستروي پروەكت» جاۋاپكەرشىلىگى شەكتەۋلى سەرىكتەستىگى جوبالىق-سمەتالىق قۇجاتتارىن ازىرلەگەن سوڭ جوندەۋ جۇمىستارى باستال­عان. بار جۇمىستى «اسىل جاس» سەرىكتەستىگى بەس ايدا جاڭا تەحنو­لو­گيالاردى قولدانۋ ارقىلى ساپالى اتقاردى. جاڭا كوپىردىڭ ۇزىندىعى – 152, ەنى 3,5 مەترگە كەڭەيتىلىپ, كو­لىك وتكىزۋ, جۇك كوتەرۋ مۇمكىندىگى ەداۋىر ارتقان. وسىلايشا اۆ­تو­كولىك قۇرالدارىنىڭ جانە جاياۋ جۇرگىن­شىلەردىڭ قاۋىپسىزدىگى تولىق قام­تىل­عانىنا تۇرعىندار ءدان ريزا. كولىك جانە جاياۋ جۇرگىنشى جۇرەتىن بولىكتەرى دە كەڭەيتىلىپ, كوپىر قۇرىلىمى بەرىك جانە جا­رىق­تاندىرۋ قۇرىلعىلارىمەن قام­­تىلعان. كوپ جۇمىس جاسالدى. جاڭا كوپىردىڭ ايىرماشىلىعى ەسكىسىنىڭ ەنى 7 مەتر بولسا, قازىرگىسى 12 مەتر. كوپىردىڭ قازىقتارىن اشىپ, بەتونداپ, كەڭەيتىپ, قايتا كوتەردىك. ريگەل تەمىردى قايتا قۇيدىق. بۇل كوكتەمگى تاسقىن كەزىندە دە ەش قيىندىق تۋعىزبايدى, دەدى «اسىل جاس» سەرىكتەستىگىنىڭ ديرەكتورى قازىبەك جۇماگەلديەۆ. جينالعاندار تاقتايداي ءتۇزۋ جولمەن «بارەكەلدى!» دەپ جاقسى تىلەك ايتىپ, ءجۇرىپ ءوتتى. قارسىدان اقجول تىلەگەن پەرىشتە پەيىلدەگى بۇلدىرشىندەر جۇگىرىپ شىقتى. اجەلەر داستۇرگە ساي شاشۋ شاشىپ, جەتى نانىن ۇلەستىردى. جاڭانىڭ اتى قاشاندا جاڭا. اۆتوكولىكتەر ءارى-بەرى جۇيتكىپ ءوتىپ جاتتى. كۇمىسجان بايجان. الماتى وبلىسى.