ەڭسەلى عيماراتتىڭ سالتاناتتى اشىلۋ راسىمىنە جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى نۇرسەرىك شاكىروۆ, اقمولا وبلىستىق سوتىنىڭ توراعاسى دوسجان ءامىروۆ, اقمولا وبلىسى اكىمىنىڭ ورىنباسارى اسقاربەك ۇيسىمباەۆ, جارقايىڭ اۋدانىنىڭ اكىمى مۇرات بالپان, سونداي-اق وڭىردەگى مەملەكەتتىك جانە قۇقىق قورعاۋ ورگاندارىنىڭ باسشىلارى, ارداگەرلەر, سۋديالار مەن سوت جۇيەسىنىڭ قىزمەتكەرلەرى, اۋدان تۇرعىندارى مەن باق وكىلدەرى قاتىستى.
جينالعان قاۋىم الدىندا ءسوز العان ن.شاكىروۆ جارقايىڭ اۋداندىق سوتىنىڭ جاڭا عيماراتى قۇرىلىسىنىڭ اياقتالۋى بۇكىل اقمولا ءوڭىرى ءۇشىن جاعىمدى وقيعا ەكەنىن ەرەكشە اتادى. جوعارعى سوت ورگانى الداعى ۋاقىتتا دا ءوز ايبىنىمەن زاڭ ۇستەمدىگىنىڭ سالتانات قۇرۋىنا ىقپال ەتەتىن سوتتار عيماراتتارىن سالۋدى جانە جوندەۋدى ماقسات ەتىپ وتىرعانىن جەتكىزدى.
سونداي-اق جينالعان قاۋىم الدىندا ءسوز العان وبلىستىق سوت توراعاسى د.ءامىروۆ ارىپتەستەرىن قونىس تويىمەن قۇتتىقتاي كەلە, بۇل يگىلىكتى ءىس ەلباسىنىڭ سوت مارتەبەسىن كوتەرۋ جونىندەگى تاپسىرماسى اقمولا وبلىسىندا جۇيەلى ورىندالىپ جاتقانىنىڭ ايعاعى ەكەنىن جەتكىزدى.
ءوز كەزەگىندە وبلىس اكىمىنىڭ ورىنباسارى اسقاربەك ۇيسىمباەۆ سوت تورەلىگى ۇستەمدىك قۇراتىن جاڭا سارايدىڭ اشىلۋى ايرىقشا وقيعا ەكەندىگىن ەرەكشە اتادى. رەتى كەلگەندە وبلىس اكىمىنىڭ ورىنباسارى يگىلىكتى ءىس باستاماشىسى بولعان جوعارعى سوتقا جانە اقمولا وبلىستىق سوتىنا العىسىن جەتكىزە كەلىپ, يگى تىلەگىن ءبىلدىردى.
اۋداننىڭ بەدەلدى اقساقالدارىنىڭ ءبىرى بەرىكتاس بايمولدينوۆ اق باتاسىن بەرگەننەن كەيىن جاڭا عيماراتتىڭ لەنتاسى قيىلىپ, ءىشى كوپشىلىككە كورسەتىلدى.
نەگىزىنەن, سوت عيماراتىندا اۋديو-بەينەتىركەۋ جۇيەسىمەن جانە جاڭا تەحنيكالىق قۇرال-دارمەن جابدىقتالعان ەكى سوت زالى بار ەكەن. سونىمەن قاتار سۋديالارعا, پروكۋرورلار مەن ادۆوكاتتارعا, سوت ورىنداۋشىلارىنا ارنالعان كابينەتتەر قاراستىرىلعان. بۇدان باسقا, كەڭەسۋ بولمەلەرى, مۇراعاتتاعى ىستەرمەن تانىسۋعا ارنالعان ورىن جانە كۇتۋ زالىمەن جابدىقتالىپتى. جانە دە سوت زالىنىڭ كەز كەلگەن جەرىنەن قۇجاتتاردى كورنەكى تۇردە كورسەتۋگە ارنالعان ىڭعايلى بەينەپروەكتور ورناتىلعان. كىرەبەرىستە مۇمكىندىگى شەكتەۋلى ازاماتتار ءۇشىن ارنايى پاندۋس ورناتىلىپ, ەدەن توسەمەلەرى كەدەرگىلەرسىز جانە تابالدىرىقسىز ەتىپ جاسالىپتى.
اسقار تۇراپباي ۇلى,
«ەگەمەن قازاقستان»
اقمولا وبلىسى
