«Qazaqstan» رترك باسقارما توراعاسى ەرلان قارين ايتقانداي, «ۇلتتىق» دەگەن انىقتاما اتاۋىنىڭ ءوزى تەلەارنانىڭ بار بولمىسىن ايعاقتايدى. ۇلتتىق كورپوراتسيا ءوزىنىڭ مەرەيلى 60 جاسىنا اياق باسىپ وتىر. تەلەارنانىڭ 60 جىلدىعىنا ارنالعان «Qazaqstan» – ەلىمىزدىڭ تەلەەپوپەياسى: ۇلتتىق ارنانىڭ دامۋ مودەلى» اتتى حالىقارالىق عىلىمي-تاجىريبەلىك كونفەرەنتسيا مەن سالتاناتتى شارالار جيىنتىعى كەشە ءال-فارابي اتىنداعى قازۇۋ-دە كەڭىنەن اتالىپ ءوتتى.
كەڭ اۋقىمدى باعدارلاماعا سايكەس, شارالار لەگى وسى ۋاقىتقا دەيىن قالىپتاسقان داستۇرمەن ساباقتاسا كەلىپ, جۋرناليستيكا فاكۋلتەتىنىڭ جانىنان ۇلتتىق ارنانىڭ «Qazaqstan» وقۋ-شىعارماشىلىق زەرتحاناسىنىڭ اشىلۋىمەن باستالدى. بۇعان دەيىن فاكۋلتەتتە «ەگەمەن قازاقستان» گازەتى مەن «حابار» تەلەارناسى ءوز زەرتحانالارىن اشقان بولاتىن. زەرتحانانىڭ اشىلۋ سالتاناتىندا قازۇۋ رەكتورى, اكادەميك عالىمقايىر مۇتانوۆ پەن «Qazaqstan» رترك باسقارما توراعاسىنىڭ ءبىرىنشى ورىنباسارى ءلاززات ءجۇنىسوۆا لەنتا قيىپ, تەلەۆيزيا سالاسىنىڭ مايتالمان ارداگەرلەرى قۇسمان يگىسىنوۆ پەن لاسكەر سەيىتوۆ اقساقالدىق اق باتاسىن بەردى. بولاشاقتا بۇل زەرتحانا زاماناۋي تالاپتارعا جاۋاپ بەرە الاتىن, اقپارات پەن تسيفرلى تەحنولوگيا ءتىلىن مەڭگەرگەن ماماندار دايارلاۋدىڭ بىرەگەي ۇستاحاناسىنا اينالاتىنى ءسوزسىز. سونداي-اق ل.ءجۇنىسوۆا جۋرناليستيكا فاكۋلتەتىندەگى تەلەۆيزيا ىسىنە ماماندانىپ جۇرگەن ستۋدەنتتەر ءۇشىن جاريالانعان ەڭ ۇزدىك ستۋدەنتتىك ماتەريالداردىڭ بەس جەڭىمپازىنا شاكىرتاقى تابىس ەتتى. بۇدان سوڭ كونفەرەنتسيا قوناقتارى مەن قاتىسۋشىلارى «قازاقستانداعى تەلەجۋرناليستيكانىڭ دامۋى مەن قالىپتاسۋى» اتتى «Qazaqstan» تەلەارناسىنىڭ 60 جىلدىعىنا ارنالعان ءباسپاسوز ماتەريالدارى, كىتاپ جانە فوتوكورمەنى تاماشالادى.
كونفەرەنتسيا قاتىسۋشىلارىنا ۇلتتىق ارنانىڭ تاريحىن باياندايتىن بەينەجازبا – دەرەكتى فيلم كورسەتىلدى. بۇگىندە تەلەارنادا مۋزىكا مەن ەسترادانى ناسيحاتتايتىن «مەن – قازاقپىن», «Hit-Qazaqstan», «سازگەر», ەلىمىزدىڭ كورىكتى جەرلەرىمەن تانىستىراتىن «ەل ىشىندە», «24 ساعات تابيعات قۇشاعىندا», «كيەلى قازاقستان», « ۇلى دالا ۇلاعاتى», سونداي-اق «الاشتىڭ اماناتى», «تاريحتىڭ تامىرىندا» كورەرمەنگە جول تارتتى. كوپشىلىكتىڭ كوڭىلىنەن شىققان اقپاراتتىق-ساياسي «اپتا», «اقپارات», «1 ستۋديا», «مەنىڭ قازاقستانىم», «قارەكەت», «كەلبەت», «جارقىن بەينە» سىندى دەرەكتى, تانىمدىق, الەۋمەتتىك, رۋحاني باعىتتاعى باعدارلامالار جالعاسىن تاۋىپ جاتىر.
كونفەرەنتسيا جۇمىسى «Qazaqstan» ارناسىنىڭ اعا بۋىن وكىلدەرى قۇسمان يگىسىنوۆ, فاتيما بەگەنباەۆا, گۇلماريا بارمانبەكوۆا, مارس وماروۆتىڭ جانە بۇگىنگى كورەرمەننىڭ ىقىلاسىنا بولەنىپ جۇرگەن بەيسەن قۇرانبەك, نارتاي ارالباي ۇلى, مەيىرجان الىبەك, بايان باقكەلدى, المات ءابدىرامان, ەرلان اتامباي سياقتى جاس بۋىننىڭ جۋرناليستيكا فاكۋلتەتىنىڭ ستۋدەنتتەرىنە ارنالعان شەبەرلىك ساباقتارىمەن ۇشتاستى.
ايگۇل احانبايقىزى,
«ەگەمەن قازاقستان»
الماتى
