قالمۇحانبەت قاسىموۆ ءبىرىنشى كەزەكتە ەلباسى جولداۋىنىڭ نەگىزگى مىندەتتەرى تالقىلانعان وبلىس اكىمى قىرىمبەك كوشەرباەۆتىڭ حالىققا ەسەپ بەرۋ كەزدەسۋىنە قاتىستى.
ءتۇسىندىرۋ جۇمىستارى شەڭبەرىندە وتكىزىلگەن وبلىس اكتيۆىمەن كەزدەسۋ بارىسىندا مينيستر باستى قۇجاتتا كورسەتىلگەن نەگىزگى باسىم باعىتتارعا سيپاتتاما بەرىپ, العا قويعان ماقساتتاردى ىسكە اسىرۋ بويىنشا ەل ۇكىمەتى قابىلداپ جاتقان شارالار تۋرالى اڭگىمەلەدى. كەزدەسۋدە زاماناۋي قۇقىقتىق جانە قاۋىپسىز قوعام قۇرۋ ماسەلەلەرىنە باسا نازار اۋدارىلدى.
بۇدان سوڭ ق.قاسىموۆ ازاماتتارعا جەكە قابىلداۋ وتكىزىپ, ءوڭىر تۇرعىندارىنىڭ ناقتى ماسەلەلەرىمەن تانىستى, سونىمەن بىرگە ازاماتتاردى الاڭداتقان ماسەلەلەردى جەدەل شەشۋ جونىندە تاپسىرما بەردى.
ساپار بارىسىندا مينيستر ىشكى ىستەر, توتەنشە جاعدايلار جانە قىلمىستىق اتقارۋ جۇيەسى دەپارتامەنتتەرىنىڭ جەكە قۇرامىمەن كەزدەستى. بۇل كەزدەسۋدە ق.قاسىموۆ جولداۋدان تۋىندايتىن مىندەتتەردى ىسكە اسىرۋ ءۇشىن ىشكى ىستەر ورگاندارى قابىلدايتىن نەگىزگى شارالارعا ناقتىراق توقتالىپ, باسىم باعىتتاردى پىسىقتادى.
«قازىرگى زامان تالاپتارىنا ساي بولۋ ءۇشىن پرەزيدەنت ن.ءا.نازارباەۆتىڭ قازاقستان حالقىنا جولداۋى ىشكى ىستەر ورگاندارى قىزمەتىن جاڭعىرتۋعا جانە تەحنولوگيالىق دامۋىنا جاڭا سەرپىن بەرۋى ءتيىس», دەپ اتاپ ءوتتى ىشكى ىستەر ءمينيسترى.
كەلەسى كەزەكتە ق. قاسىموۆ جەرگىلىكتى پوليتسيا قىزمەتىنىڭ, كەزەكشى ءبولىمنىڭ جانە قاجەتتى قۇرالدارمەن قامتاماسىز ەتىلگەن كوشپەلى پوليتسيا بەكەتىنىڭ جۇمىسىمەن تانىستى. مينيستر عيماراتى تولىق قايتا قۇراستىرۋدان وتكەن قىلمىستىق-اتقارۋ جۇيەسىنىڭ مەكەمەسىندە بولدى. مۇندا بۇرىنعى جاپسىرمالاپ سالىنعان ءۇي-جايدىڭ ورنىنا حالىقارالىق ستاندارتتارعا سايكەس سوتتالعانداردى كامەرالار بويىنشا ۇستاۋعا ارنالعان جاتاقحانالار تۇرعىزىلعان. سونىمەن بىرگە مينيستر سوتتالعانداردىڭ كاسىپتىك ءبىلىم الۋى جانە ءوڭىردىڭ بيزنەس قۇرىلىمدارىن تارتا وتىرىپ, قوسىمشا جۇمىس ورىندارىن قۇرۋ ماسەلەلەرىن تالقىلادى.
مينيستر نازارىنا ءىىد وقۋ-جاتتىعۋ ورتالىعىنىڭ, جالاعاش ءاىىب جانە ارال اۋدانىنداعى سەكسەۋىل پوليتسيا ءبولىمى قۇرىلىستارىنىڭ جوبالارى ۇسىنىلدى.
سونىمەن قاتار ق. قاسىموۆ وتكەن جىلى رەسپۋبليكا بويىنشا ۇيىمداستىرىلعان سلەتتىڭ جەڭىمپازدارى بولعان جول قوزعالىسىنىڭ جاس ينسپەكتورلارىمەن كەزدەسىپ, ولارعا جول قاۋىپسىزدىگى ەرەجەلەرىن جەتىك يگەرگەندەرى ءۇشىن العىسىن ءبىلدىردى.
«ەگەمەن-اقپارات»
