سيرياداعى قاندى قاقتىعىس تىيىلار ەمەس. ەل پرەزيدەنتى باشار اساد قانداي جاعدايدا دا بيلىكتەن ايىرىلمايتىن سىڭايلى. وعان ءتىپتى اراب مەملەكەتتەرى ليگاسىنىڭ ەكونوميكالىق سانكتسيا قابىلداۋ تۋرالى شەشىمى دە ءتيىستى دەڭگەيدە اسەر ەتە قويعان جوق.
سيريا باسشىلىعىنىڭ ءىس-ارەكەتىنە قاتىستى تۇركيا ۇكىمەتىنىڭ باسشىسى تايىپ رەدجەپ ەردوعان دا قاتتى-قاتتى سوزدەر ايتتى. قانداي مەملەكەت باسشىسى دا ءوز حالقىنا قارسى وق اتسا, اياعى جاقسىلىققا اپارمايتىنىنان ناقتى-ناقتى مىسالدار كەلتىرە سويلەدى. ولاي ايتاتىن دا ءجونى بار. سيريادا ەل باسشىلىعىنا قارسى اكتسيالار باستالعالى بەرى 3500-دەي ادام كوز جۇمىپ ۇلگەردى.
بۇرىنعى ماگاتە باسشىسى ۇسىنىلدى
ەگيپەتتىڭ جوعارى اسكەري كەڭەسى ماگاتە-ءنىڭ بۇرىنعى ديرەكتورى موحامەد ءال-بارادەيگە ەل پرەمەر-ءمينيسترى ورىنتاعىنا وتىرۋدى ۇسىنعان. مۇنداي ۇسىنىس كەڭەستىڭ كەشەگى وتكەن جانە مىسىردىڭ ساياسي پارتيالارى وكىلدەرى شاقىرىلعان شۇعىل ماجىلىسىندە جاسالعان.
اسكەر باسشىلىعىنداعى دەرەك كوزىنىڭ ايتۋىنشا, بارادەي ازىرشە ۇسىنىسقا ناقتى جاۋاپ قايتارماعان. ويتكەنى, ول پرەمەر بولعان جاعدايدا ءوز ءىس-ارەكەتىنىڭ قانشالىقتى تاۋەلسىز بولاتىنىنا جەتكىلىكتى دەڭگەيدە كەپىلدىك الماسا كەرەك. جالپى, حۋسەين تانتاۋي باسىندا تۇرعان مىسىردىڭ جوعارى اسكەري كەڭەسى حالىق قىسىمىنا شىداس بەرە الماعان سەكىلدى. سوڭعى كۇندەرى جاپپاي نارازىلىق سالدارىنان كاير مەن الەكساندريا قالالارىندا 30-دان استام ادام قازا تاپقان ەدى.
بەيبىتشىلىككە قارسى قىلمىسكەرلەر كىم؟
مالايزيانىڭ جالعان تريبۋنالى اقش-تىڭ ەكس- پرەزيدەنتى كىشى دجوردج بۋش پەن ۇلىبريتانيانىڭ بۇرىنعى پرەمەر-ءمينيسترى توني بلەردى بەيبىتشىلىككە قارسى قىلمىسكەرلەر دەپ تانيتىنىن جاريالادى. اتالعان ەكەۋگە ءبىرىنشى كەزەكتە مۇنداي ايىپ يراكتاعى سوعىسقا بايلانىستى تاعىلىپ وتىر.
سوت ءماجىلىسى ءتورت كۇنگە سوزىلسا, ايىپتالعاندار دا جازاعا سىرتتاي كەسىلگەن. ۇزاق ۋاقىتقا سوزىلعان پىكىرتالاستان كەيىن تريبۋنالدىڭ 7 مۇشەسى ايىپتىلاردى ءبىراۋىزدان كىنالى دەپ تاۋىپ, بۋش پەن بلەردىڭ يراكقا باسا-كوكتەپ كىرۋىن زاڭسىز جانە بۇكىل الەمگە قاتەرلى دەپ اتاعان. اتاپ كورسەتەرلىگى – سوت شەشىمى سيمۆوليكالىق سيپاتقا يە. ويتكەنى, كۋالا-لۋمپۋر تريبۋنالىنىڭ ەشقانداي زاڭدى مارتەبەسى جوق.
رەسەيگە اقپارات بەرۋدى توقتاتادى
اقش بۇدان بىلاي قاراي رەسەيگە ەۋروپاداعى كادىمگى قارۋ-جاراق تۋرالى اقپارات بەرۋدى توقتاتاتىن بولدى. بۇل تۋرالى اقش مەملەكەتتىك دەپارتامەنتىنىڭ رەسمي وكىلى ۆيكتوريا نۋلاند حابارلادى. نۋلاندتىڭ سوزىنە قاراعاندا, ەۋروپاداعى كادىمگى قارۋلى كۇشتەردى رەانيماتسيالاۋ تۋرالى شارتتى قابىلداۋعا جاسالعان ارەكەتتەر ناتيجە بەرمەگەن سوڭ وسىنداي شەشىم الىنعان.
ەندى مۇنداي شەشىمدى اقش-تىڭ ناتو-داعى باسقا دا وداقتاستارى قابىلداۋى ىقتيمال. بۇعان دەيىن قۇراما شتاتتار رەسەيگە ءوزىنىڭ ەۋروپاداعى قارۋ-جاراقتارى تۋرالى ءمالىمەتتەردى ەش كىدىرىسسىز بەرىپ كەلگەن ەدى. ماسكەۋ جوعارىداعى شارتتى ورىنداۋعا موراتوري جاريالاعاننان كەيىن اقش پەن ونىڭ وداقتاستارى دا ەۋروپاداعى كادىمگى قارۋ-جاراق تۋرالى اقپاراتتى بەرۋدى توقتاتۋدى ءجون كورگەن.
بەرلۋسكوني تارپا باس سالىنىپ جاتىر
يتاليانىڭ بۇرىنعى پرەمەر-ءمينيسترى سيلۆيو بەرلۋسكوني ءوزىنىڭ ءتورتىنشى مۋزىكالىق البومىن شىعارعان. «ناعىز ماحاببات» دەپ اتالاتىن كۇيتاباققا 11 ءان ەنگىزىلسە, سولاردىڭ ءسوزىنىڭ ءبارىن س.بەرلۋسكوني جازىپتى جانە جاڭا البومدا ءوزى ءان ايتپايدى ەكەن.
س.بەرلۋسكونيدىڭ وتستاۆكاعا ۇستىمىزدەگى جىلدىڭ 13 قاراشاسىندا كەتكەنى بەلگىلى. بۇگىنگى ميلليونەر جاس كەزىندە كرۋيز جاسايتىن لاينەردە مۋزىكانت بولىپ قوسىمشا اقشا تاۋىپتى. ال ول بيلىكتەن كەتكەن سوڭ تيىسپەۋ تۋرالى يممۋنيتەتى كۇشىن جويعانى بەلگىلى. سوندىقتان بۇگىندە ونىڭ جاساعان-جاساماعان قىلمىستارىنا بايلانىستى ايىپتاۋلار جان-جاقتان كۇش الا ءتۇسىپ وتىر. كەشە ول ايىپتاۋلاردىڭ ءبىرى بويىنشا شاقىرىلىپ, تۇسىنىك بەرۋگە ءماجبۇر بولدى.
تۇتقىندالعان ۇشقىشتار بوساتىلدى
تاجىكستان سوتى بۇعان دەيىن رەسەيمەن اراداعى ايتارلىقتاي كيكىلجىڭگە سەبەپ بولعان, كىنالى دەپ تابىلىپ, 8,5 جىلعا سوتتاعان رەسەيلىك ۆلاديمير سادوۆنيچي مەن ەستونيا ازاماتى الەكسەي رۋدەنكونى بوساتۋ تۋرالى شەشىم قابىلدادى. Rolkan Investments Ltd اۆياكومپانياسىنىڭ ۇشقىشتارى سوت زالىنان بىردەن بوستاندىققا شىعارىلدى.
ەركىندىك العاننان كەيىن ۆ.سادوۆنيچي وزدەرىنە جان-جاقتى قولداۋ كورسەتكەنى ءۇشىن رەسەي بيلىگىنە ريزاشىلىعىن جەتكىزدى. ەكى ۇشقىش ۇستىمىزدەگى جىلدىڭ ناۋرىز ايىنىڭ سوڭىندا تۇتقىندالعان ەدى. ونىڭ سەبەبى گازەتىمىزدە جان-جاقتى جازىلعاندىقتان, وعان توقتالماعاندى ءجون كوردىك. ال ۇشقىشتاردىڭ بوساتىلۋىنا بايلانىستى بولسا كەرەك, رەسەي جاعى دا وزدەرىندە جۇرگەن تاجىكستاندىق ميگرانتتاردى قۋدالاۋدى توقتاتتى.
قىسقا قايىرىپ ايتقاندا:
رەسەي پرەزيدەنتى دميتري مەدۆەدەۆ ەكس-پرەمەر ۆيكتور چەرنومىرديننىڭ ەسىمىن ماڭگى ەستە قالدىرۋ ءۇشىن جاسالىپ جاتقان كورابلدەردىڭ بىرىنە ونىڭ ەسىمىن بەرۋدى ۇسىندى. تايلاند تۇرعىنى امپون تانگنوپپاكۋن ەل كورولى پۋميپون ادۋليادەتتىڭ ار-نامىسىنا تيەتىن SMS تاراتقانى ءۇشىن 20 جىلعا باس بوستاندىعىنان ايىرىلدى. رەسەيدىڭ نيجني نوۆگورود وبلىستىق سايلاۋ كوميسسياسى رەسەي كوممۋنيستىك پارتياسىنا «ەدينايا روسسيا» سەركەسى ۆلاديمير پۋتينگە قاتىستى كوميكستەر سالىنعان كاريكاتۋرالاردى تاراتۋعا تىيىم سالدى. اقش-تىڭ ورەگون شتاتىنىڭ گۋبەرناتورى دجون كيتسحابەر ءوزىنىڭ گۋبەرناتورلىق مەرزىمى اياقتالاتىن 2015 جىلعا دەيىن ءولىم جازاسىنىڭ بارلىق تۇرىنە موراتوري جاريالادى. رەسەيدە ميگرانتتاردىڭ ورىس ءتىلىن بىلەتىندىگى تۋرالى سەرتيفيكات الۋ ءۇشىن وتكىزىلەتىن تەستىلەۋدىڭ قۇنى شامامەن 2,5 مىڭ رۋبل كولەمىندە بەلگىلەندى. اقش-تىڭ ينديانا شتاتىنىڭ تۇرعىنى دەۆيد بوستيك بالالار پورنوگرافياسىن دايىنداپ, تاراتقانى ءۇشىن 315 جىلعا سوتتالدى. ۇكىم شىعارىلعان ازامات قازىر 25 جاستا ەكەن.ينتەرنەت ماتەريالدارى نەگىزىندە ازىرلەندى.
