ارنايى جيىندا وبلىس باسشىسى اماندىق باتالوۆ مەملەكەت باسشىسىنىڭ تاپسىرماسىمەن ينۆەستورلار تارتۋعا, سونىڭ ىشىندە تۋريزم سالاسىن دامىتۋعا وڭىردە ەرەكشە نازار اۋدارىلىپ وتىرعانىن ايتتى.
- وتكەن جىلدىڭ قورىتىندىسى بويىنشا جالپى وندىرىستەگى شاعىن جانە ورتا بيزنەستىڭ ۇلەسى 43 پايىزعا جەتتى. بيىلعى جىلى وبلىس بويىنشا شاعىن جانە ورتا بيزنەستىڭ 100 نىسانىن اشقالى وتىرمىز. ولاردىڭ ىشىندە تەك شاعىن كاسىپورىندار عانا ەمەس, سونىمەن قاتار قىزمەت كورسەتۋ, ياعني تۋريستىك نىساندار دا بار. ماسەلەن, بيىلعى جىلى وڭىردە 25 مىڭ جاڭا جۇمىس ورنىن اشۋ كوزدەلسە, سونىڭ 12 مىڭى شاعىن جانە ورتا بيزنەستىڭ ۇلەسىندە بولادى, - دەدى ا. باتالوۆ.
كەزدەسۋدە ءسوز العان «Kazakh Tourism» ۇلتتىق كومپانياسى» اق باسقارما توراعاسى راشيد كۇزەمباەۆ تۋريستەرگە كورسەتىلەتىن قىزمەت پەن ۇسىنالاتىن تاۋارلار كەشەنىن قالىپتاستىرۋ مەن ىلگەرىلەتۋ, ينۆەستورلار تارتۋ, تۋريستىك بيزنەسكە قولايلى جاعداي جاساۋ ماسەلەلەرى جونىندە ىنتىماقتاستىق ورناتۋدىڭ ماڭىزى زور ەكەنىن اتاپ ءوتتى.
قالماحانبەت مۇقامەتقالي,
«ەگەمەن قازاقستان».
الماتى وبلىسى.
