ۇلى قورقىت بابانىڭ ونەرىن كەيىنگى ۇرپاققا اماناتتاۋدا ايرىقشا ەڭبەك سىڭىرگەن ايگىلى قوبىزشى ىقىلاس دۇكەن ۇلى ەكەنى داۋسىز. عاسىرلار توعىسىندا ءومىر سۇرگەن قوبىزشىنىڭ داڭقى بۇگىندە ۇرپاقتار جادىندا. ىقىلاس بابامىزدان قالعان جادىگەرلەردىڭ ءبارى دە قۇندى بولعانىمەن, اسىرەسە ونىڭ سايىن دالانىڭ دەگدار بولمىسىن بويىنا تارتقان قوبىزىنىڭ قۇدىرەتى ءبىر توبە. جالپى, ىقىلاس دۇكەن ۇلى جايلى دەرەكتەر سارىسۋ وڭىرىندە كوپتەپ كەزدەسەدى. اۋداننىڭ بايقادام اۋىلىنا كىرەبەرىستەگى كۇيشىنىڭ قۇرمەتىنە قويىلعان مازارىنىڭ قوبىز تەكتەس كوشىرمەسى دە اۋىق-اۋىق قوبىز ءۇنىن شىعارىپ تۇراتىنىن تۇرعىنداردىڭ تالاي رەت ايتقانى بار.
بۇگىندە جامبىل وبلىستىق تاريحي-ولكەتانۋ مۋزەيىندە ىقىلاس دۇكەن ۇلىنىڭ قوبىزى ساقتاۋلى تۇر. تاريحي دەرەكتەر بويىنشا, بۇل قوبىزدى كۇيشى ءوز قولىمەن ويىپ جاساعان ەكەن. قوبىزشىنىڭ تىرلىگىندە اينىماس سەرىگى بولعان بۇل اسپاپتى اۋەلى كىشى ۇلى اقىنباي مەن كەلىنى ءرازيا كوزدىڭ قاراشىعىنداي ساقتاپ كەلىپتى. كەيىننەن اقىنباي دۇنيە سالعان سوڭ ءرازيا اجە بۇل قوبىزدى وتكەن عاسىردىڭ سەكسەنىنشى جىلدارىنا دەيىن ەشبىر جانعا كورسەتپەپتى. بۇل كىسى دە ءومىرىنىڭ سوڭىندا كۇيشى قوبىزىن ۇلى داۋلەت پەن كەلىنى التىنعا اماناتتايدى.
مۋزەي ديرەكتورى گۇلنۇر ەمبەرديەۆا بۇل قۇندى جادىگەردى قورعا سارىسۋ اۋدانى, جايلاۋكول اۋىلىنىڭ تۇرعىنى, قوبىزشىنىڭ شوبەرە كەلىنى التىن اقىنباەۆا وتكىزگەنىن ايتادى. ال ۇلى قوبىزشىنىڭ قولىندا تالاي ۋاقىت بويى قازاق دالاسىن كۇيمەن تەربەتكەن قارا قوبىزدىڭ وقىس جاعدايدا دىبىس شىعاراتىن قاسيەتى دە تىلسىمعا تولى. بۇگىندە بۇل ەرەكشە قوبىز كۇيشى ۇرپاقتارىنىڭ ۇقىپتىلىعى ارقاسىندا ءبىر عانا اۋلەتتىڭ ەمەس, تۇتاس قازاقتىڭ قۇندى جادىگەرىنە اينالىپ وتىر. قازاقتىڭ كۇي ونەرىن, كونە اسپاپتاردى زەرتتەۋشى ماماندار ءۇشىن دە, بولاشاقتا ىقىلاستانۋشى جاستار ءۇشىن دە بۇل تاپتىرماس ولجا.
حاميت ەسامان,
«ەگەمەن قازاقستان»
جامبىل وبلىسى
