كەنشىلەر كومانداسىنىڭ تىزگىنىن ۇستاعان 31 جاستاعى الىبەك ورازعاليەۆتىڭ ەسىمى فۋتبول سالاسىنا ءۇش قايناسا سورپاسى قوسىلمايدى دەيتىن-اق مامان. ءومىرى دوپ تەۋىپ كورمەگەن, بۇل سالادا قانداي دا ءبىر قىزمەت اتقارماعان. بىراق وبلىستىق دەنەشىنىقتىرۋ جانە سپورت باسقارماسىنىڭ باسشىسى ناتاليا سۋحورۋكوۆانىڭ ايتۋىنشا, الىبەك ساكەن ۇلى قانى جەرگە تامبايتىن قارجىگەر ەكەن. «قارجىنى باقىلاۋ – ءدال قازىرگى ۋاقىتتا ءبىز ءۇشىن سوڭعى ءىس ەمەس», دەيدى ول. ياعني سۋحورۋكوۆا حانىمدى «شاحتەردىڭ» الداعى ماۋسىمداعى شابىسى مەن تابىسى ەمەس, ۇجىمنىڭ تيىن-تەبەندى ۇنەمدەپ جاراتقانى كوبىرەك تولعاندىراتىن سياقتى.
«شاحتەردىڭ» بيىلعى بيۋدجەتى 2 ملرد تەڭگەنى قۇرايدى. باسقا امال جوق, كلۋب وسى قارجىعا ىلدەبايلاپ كۇن كورۋى قاجەت. ءتىپتى سۋحورۋكوۆا حانىم كوماندانىڭ الدىنا اقشا تابۋدى ۇيرەنۋ كەرەك دەگەن مىندەت قويىپ وتىر. بىلتىر جوعارى توپتان «ۇشىپ» كەتە جازداپ, اۋپىرىممەن امان قالعان, بيىلدىڭ وزىندە شالاجانسار جانى بار «شاحتەر» ونى قايدان, قالاي تاباتىنىن جەرگىلىكتى سپورتتىڭ باسشىسى بىلمەسە, وزگە جۇرتقا بەيمالىم...
ءيا, كەزىندە «شاحتەر» قاتارىنان ەكى دۇركىن ەل چەمپيونى بولىپ, ەۋروپا كۋبوكتارىندا تابىستى ونەر كورسەتكەندە بيۋدجەتتەن ايانباي بولىنگەن كول-كوسىر اقشانىڭ استىندا قالدى. قارنى توق, كيىمى كوك بولعان سوڭ فۋتبولشىلار دا ايانباي وينادى, «شاحتەردىڭ» قۇرامىندا ونەر كورسەتۋگە مىقتى دەگەن لەگيونەرلەردىڭ ءوزى قۇلشىنىپ تۇردى. ءبىر وكىنىشتىسى, سول كەزدەرى اقشانى وڭدى-سولدى شاشقان باسشىلار ۇستانعان تەرىس ساياساتتىڭ كەسىرىنەن كوماندا ءالى كۇنگە دەيىن قارجىلىق ماسەلەسىن وڭالتا الماي كەلەدى.
ەندى «شاحتەردىڭ» باس باپكەرلىگىنە كەلگەن بەلارۋس مامانى تۋرالى از-كەم ايتساق. وبالى نەشىك, جاڭا جاتتىقتىرۋشىنىڭ ويىنشى ءھام باپكەر رەتىندەگى وتكەنىنە قاراپ وتىرساق, ءبىرتالاي بەلەستى باعىندىرعان ەكەن. ۆلاديمير جۋراۆەل 1989 جىلدان 2005 جىلعا دەيىن جاسىل الاڭدا قورعاۋشى رەتىندە دوپ تەپكەن. «دينامو» (ەرەۆان), «حاپوەل» (يەرۋساليم), «دينامو» (مينسك) جانە «جەمچۋجينا» (سوچي) سىندى كوماندالار ساپىندا ونەر كورسەتىپتى. قول جەتكىزگەن تابىسى دا از ەمەس: بەلارۋس ەلىنىڭ بىرنەشە دۇركىن چەمپيونى, ەل كۋبوگىنىڭ يەگەرى جانە يزرايل كۋبوگىنىڭ ءفيناليسى. باپكەرلىك قىزمەتتى 2005 جىلى ۋەفا-نىڭ جاتتىقتىرۋشىلىق ليتسەنزياسىن «Pro» دارەجەسى بويىنشا العاننان كەيىن بەلارۋس كوماندالارىندا باستاعان.
2010 جىلدان 2014 جىلعا دەيىن كيشينەۆتىڭ «داچيا» كومانداسىن جاتتىقتىرىپ, ەل چەمپيوناتىندا بىرنەشە دۇركىن كۇمىس جۇلدە الدى. بىلتىرعى ماۋسىمدا «دينامومەن» (برەست) بىرگە بەلارۋس چەمپيوناتىندا «ۇلكەن ۇشتىكتى» (باتە, «دينامو» (مينسك), «شاحتەر») عانا العا جىبەرىپ, تۋرنير قورىتىندىسىندا ءتورتىنشى ورىنعا تابان تىرەگەن. بۇعان قوسا كوماندا 10 جىل ۇزىلىستەن كەيىن ەل كۋبوگىن جەڭىپ الىپ, برەست قالاسىنا سىيعا تارتتى.
قازىرگى تاڭدا تۇركيادا وقۋ-جاتتىعۋ جيىنىندا جۇرگەن «شاحتەردىڭ» قۇرامىنا جەرگىلىكتى 12 فۋتبولشى ەنگەن. ال لەگيونەرلەردىڭ تاعدىرى ءالى بەلگىسىز. «مۇنى اقشا شەشەدى. كىم ولارعا جاقسى جاعداي ۇسىنادى, ولار سول جاققا تارتادى. سوندىقتان بىلتىر كوماندانىڭ نەگىزگى قۇرامىن جاساقتاعان ويىنشىلاردى بيىل الاڭنان كورمەيتىن بولامىز. ماسەلەن, يۋليۋس سزوكە مەن ماركو ستانوەۆيچ كوماندامەن قوش ايتىستى», دەيدى باس جاتتىقتىرۋشى.
الداعى ۋاقىتتا كوماندا قۇرامىنا شاقىرىلاتىن لەگيونەرلەردى جاتتىقتىرۋشىلار شتابى شەشپەك. جاتتىقتىرۋشىلار دەمەكشى, جۋراۆەل بەلارۋس ەلىنەن جالعىز ءوزى كەلدى. وعان وتكەن ماۋسىمدا كوماندادا جاتتىقتىرۋشىلىق قىزمەت اتقارعان اندرەي فينونچەنكو مەن يگور سولوشەنكو كومەكتەسەتىن بولادى.
قايرات ءابىلدا,
«ەگەمەن قازاقستان»
قاراعاندى وبلىسى
