قازاقتاردىڭ وڭ جامباسىنا كەلەتىن جەتى دەگەن سان ءبىزدى قۋانىشقا بولەي العان جوق. وليمپيادانىڭ جەتىنشى كۇنى جەرلەستەرىمىز الا-قۇلا ونەر كورسەتتى. ۇكىلەپ قوسقان مەدال الادى دەگەن الەكسەي پولتورانين كلاسسيكالىق تاسىلمەن سپرينتەرلىك قاشىقتىقتىڭ ىرىكتەۋ سايىسىندا ون ءۇشىنشى ناتيجە كورسەتىپ, شيرەك فينالعا شىققاندا بوركىمىزدى اسپانعا اتىپ قۋانىپ ەدىك, اسىققان ەكەنبىز, نەبارى ءتورتىنشى ورىنمەن جارتىلاي فينالعا قاتىسا المادى. ال تاعى ءبىر جەرلەسىمىز 51-ورىندى قاناعات تۇتقان ەلەنا كولومينا, ۆالەريا تولەنوۆا كوشتىڭ سوڭىنا جايعاستى. شورت-ترەكشىلەر دە بىلگەندەرىنەن جاڭىلىپ قالعانداي اسەرگە بولەدى. الەم كۋبوگى كەزەڭدەرىندە ءتاپ-ءتاۋىر ناتيجە كورسەتىپ جۇرگەن مادىعالي قارسىبەكوۆ شاكىرتتەرىنىڭ جولى بولماي-اق تۇر. نۇربەرگەن جۇماعازيەۆ, ابزال اجعاليەۆ جانە ەركەبۇلان شامۇحانوۆ ەستافەتالىق جارىستا ءۇشىنشى ناتيجەمەن فينالعا وتە المادى. ال كونكيشىلەرىمىز دەنيس كۋزين مەن فەدور مەزەنتسەۆتىڭ كورسەتكىشتەرى دە ناشار, جارىستى ەرتە اياقتادى.
شىنىندا دا, ەندى كىمنەن مەدال كۇتۋگە بولادى. كىم ءبىلسىن, الەكسەي پولتورانين ەلۋ شاقىرىمدىق كلاسسيكالىق مارافوندا بار كۇشىن سالىپ, نامىستى قولدان بەرمەۋگە تىرىسار. الايدا ونىڭ قارسىلاستارى كىلەڭ مىقتىلار. شورت-ترەكشىلەردىڭ شاماسى بەلگىلى بولىپ قالدى. كورەيا مەملەكەتىنەن اتتاي قالاپ الدىرعان شورت-ترەكشى كيم يونگ ا بالكىم قۋانتىپ قالار. بياتلونشىلاردىڭ ىشىنەن جالعىز سەمەيلىك گالينا ۆيشنەۆسكايا العاشقى التىلىققا ەنۋ ءۇشىن تىرىسىپ باعار.
وسى ورايدا مىنا ءبىر وي مازانى الادى. كىلەڭ ءبىر دارىنسىز, ءتىپتى العاشقى وندىققا نەمەسە جيىرمالىققا ەنبەيتىن شاڭعىشى, كونكيشىلەر نەمەسە باسقا سپورت تۇرلەرى شەبەرلەرىن اسا جاۋاپتى دوداعا الىپ بارۋدىڭ قاجەتى بولار ما ەكەن؟ ۇكىمەت ولاردىڭ شەتەلدەردە دايىندالۋىنا, ساپارعا شىعۋلارىنا زور قارجى بولەدى. بىراق تا وليمپيادادا ناتيجە جوق. ونىڭ ۇستىنە بىزدە رەزەرۆ ازىرلەۋگە جەتە كوڭىل بولىنبەيدى. ەلەنا كولومينا كەزىندە ءسوز جوق, جاقسى ناتيجە كورسەتىپ كەلگەن. ازيا ويىندارىندا, باسقا دا حالىقارالىق جارىستاردا ەل نامىسىن ابىرويمەن قورعاپ كەلدى. بىراق تا جاسى وتىز بەسكە كەلگەن سپورتشىدان جوعارى ناتيجە كۇتكەن ءجون ەمەس.
كادرلار ازىرلەيتىن ورىن جوق ەمەس, بار. شىعىس قازاقستان وبلىسىنىڭ تابيعاتى تامىلجىعان, جەتى اي بويى اپپاق قار جاتاتىن ريددەر قالاسىندا وسىدان ون بەس جىل بۇرىن سپورتتاعى دارىندى بالالارعا ارنالعان وليمپيادالىق مەكتەپ-ينتەرنات قۇرىلعان ەدى. سوڭعى ءۇش جىلدان بەرى مەكتەپ-ينتەرنات, كوللەدج دەگەن اتاقتى يەلەندى. مۇندا ءبىلىم الۋعا بارلىق جاعداي جاسالعان, بەس مەزگىل تاعام بەرىلەدى. ۇزدىك وقىعاندار ستيپەنديا الادى. سوڭعى جىلدارى شىعىستاعى وقۋ ورنىنا سوناۋ اقتوبە, سولتۇستىك قازاقستان, اقمولا وبلىستارىنان, استانادان قىزىعى كوپ قىسقى سپورتتان باعىن ىزدەگەن تالاپتىلار كەلىپ تۇسە باستادى. ولار قازاق جانە ورىس تىلدەرىندە ءبىلىم الادى. كوللەدجدى بىتىرگەندەر ءارى قاراي وقۋىن جالعاستىرسا, قالعاندارى مەكتەپتەردە قىسقى سپورت تۇرلەرىنەن ساباق بەرە الادى. مىنە, ريددەردەگى سپورت مەكتەپ-ينتەرناتىنا كومەككە, قارجىعا ءزارۋ, جاڭا وقۋ كورپۋسى, جازدا روليكپەن جاتتىعاتىن الاڭ اۋاداي قاجەت. سونىمەن بىرگە بۇل جەردە بياتلونمەن جاتتىعۋعا دا قارجى كوزى كەرەك.
جۋرناليستەر وسى جولى پحەنچحان وليمپياداسىنىڭ بۇرق-سارق ەتكەن ويىندارىنان ايتارى جوق, تاماشا جەدەل رەپورتاجدار بەرىپ, جانكۇيەرلەرىن قۋانتىپ جاتىر. وليمپيادا ويىندارىندا ولارمەن ءجيى كەزدەسىپ جۇردىك. الايدا ءبىزدى 200 مىڭنان استام وقىرمانى بار وتانىمىزدىڭ باس گازەتى – «ەگەمەن قازاقستاننىڭ» بىردە-ءبىر ءجۋرناليسى بولماۋى تاڭعالدىردى. تاۋەلسىزدىك العالى «ەگەمەننىڭ» تىلشىلەرى وليمپيا ويىندارىنان رەپورتاجداردى ۇزدىكسىز بەرىپ كەلگەن. ءتىپتى سوناۋ ايشىلىق الىستاعى سيدنەيدەن «ەگەمەننىڭ» ءتورت بىردەي ءجۋرناليسى بەكزات, ولگا, ەرماحاندار التىن القا العان كەزدە جۇرەكتەرى جارىلارداي قۋانىپ, ەڭ ءبىرىنشى بولىپ گازەت وقىرماندارىنان ءسۇيىنشى سۇراعان. گازەتتىڭ تيراجى 200 مىڭنان اساتىنىن, ونىڭ ءبىر ميلليوننان استام وقىرمانى بار ەكەنىن ەسكەرسەك, ۇلتتىق وليمپيادا كوميتەتى باسشىلارىنىڭ قازاق ءتىلدى وقىرمانداردى مەنسىنبەگەنى مە دەگەن وي كەلەدى. الدە ولار انا تىلىنەن ماقۇرىم با؟
وسى جولداردىڭ اۆتورى وتكەن جىلدىڭ قازان ايىندا ۇوك باسشىلارىنىڭ ءبىرىنىڭ قابىلداۋىندا بولىپ, «ەگەمەن قازاقستاننىڭ» تىلشىسىنە اككرەديتاتسيا بەرمەگەندەرىڭىز قالاي دەپ ساۋال تاستاعاندا, ولار بىزگە ءوتىنىش جاساعان جوق, ەندى كەشىگىپ قالدى دەپ جاۋاپ قايتاردى. ال شىنىندا گازەت تىلشىسىنە تىركەۋ بولادى دەپ حابارلانعان. ال ءوزىم جايلى ايتاتىن بولسام, رەسپۋبليكالىق «قازاق سپورتى» گازەتىنىڭ شىعىس قازاقستان وبلىسىنداعى مەنشىكتى ءتىلشىسى قىزمەتىن اتقارعانىما ءتورتىنشى جىل. ال مەنى تىركەي الاسىزدار ما دەگەن ساۋالعا ول باياعىدا, قىركۇيەكتە اياقتالعان دەگەن جاۋاپ الدىق. دەمەك, رەسپۋبليكالىق گازەت تىلشىلەرى قول جەتكىزە الماي ارمانعا اينالعان اككرەديتاتسيا وڭىرلەردەگى سپورت جۋرناليستەرىنىڭ تۇسىنە دە كىرمەس.
وڭداسىن ەلۋباي,
جۋرناليست, ارنايى «ەگەمەن قازاقستان» ءۇشىن پحەنچحاننان (وڭتۇستىك كورەيا)
