جالپى, اتالعان باعدارلامانىڭ يدەولوگيالىق جانە ادىستەمەلىك جۇمىستارىن اتقارۋ بارىسىندا 2017 جىلى بىرنەشە «رۋحاني جاڭعىرۋ» كابينەتتەرى اشىلعان بولاتىن. اتاپ كورسەتكەندە, شورتاندى اۋدانىندا – 3, اتباسار اۋدانىندا – 2, بۇلاندى مەن جاقسى اۋداندارىندا ءبىر كابينەتتەن جابدىقتالدى. بۇل رەتتە ساندىقتاۋ مەن بۋراباي اۋداندارىندا جانە كوكشەتاۋ قالاسىندا كابينەتتەردى كەڭ جولاقتى ينتەرنەت پەن مۋلتيمەديالىق قۇرال-جابدىقتار ورناتىلۋدا جانە فيرمالىق ۇلگىدەگى جاراقتارمەن قامتىلۋدا. قولعا الىنىپ جاتقان جوبالاردىڭ ەڭ ماڭىزدىسى, ءوڭىردىڭ ءبىلىم بەرۋ وشاقتارىندا اشىلعان مۇراجايلاردى دامىتۋ. ەگەر 2017 جىلدىڭ جەلتوقسانىندا وبلىستا 194 مۇراجاي جۇمىس ىستەپ تۇرسا, جاڭا جىلدان كەيىن ولاردىڭ سانى 205-كە دەيىن جەتتى. بۇدان باسقا, وبلىستا مەكتەپ وقۋشىلارى مەن ستۋدەنتتەرىنىڭ كاسىپكەرلىككە دەگەن ىنتاسى مەن قىزىعۋشىلىعىن وياتۋ ماقساتىندا اعىمداعى جىلى بيزنەس-الاڭدار ۇيىمداستىرۋ دا قاپەردەن تىس قالمايتىندىعى بەلگىلى بولىپ وتىر.
وعان ناقتى مىسال دا جوق ەمەس. اتاپ ايتقاندا, كوكشەتاۋ قالاسىندا ورنالاسقان «اۋلەت» مەكتەپتەن تىس جۇمىستاردى وتكىزۋ ورتالىعى بازاسىندا 130 بالانى قامتىعان وقۋشىلاردىڭ بيزنەس-كلۋبى جۇمىس ىستەۋدە. سول سياقتى تەحنيكالىق جانە كاسىپتىك ءبىلىم بەرۋ جۇيەسىندە دە ءارتۇرلى ستارتاپتار ىسكە اسىرىلۋدا. وتكەن جىلدىڭ قاراشاسىندا «پروفي. كز» شاراسى كەڭىنەن اتالىپ ءوتىپ, وندا ەڭ ۇزدىك ستارتاپتى انىقتاۋ ءۇشىن بايقاۋ دا جاريالانعانى ەستە. ونىڭ ۇستىنە بيىل قورعالجىن اۋدانىندا قازاقستاندا تۇڭعىش رەت, ال الەمدە بەسىنشى سانالاتىن بالالاردىڭ ورنيتولوگيالىق ورتالىعى جۇمىس ىستەي باستايدى. قازىرگى تاڭدا قورعالجىن قورىعىندا شامامەن قۇستاردىڭ 80 ءتۇرى ۇيا سالاتىنى بەلگىلى. وسى تۇرعىدان كەلگەندە بالالاردىڭ عالىم-ورنيتولوگتارمەن بىرگە زەرتتەۋ جۇمىستارىنا قاتىسۋىنا مۇمكىندىك تۋادى. بۇدان باسقا, اتباسار اۋدانىندا بيىلعى جىلى جىلجىمالى «ماماندىقتار اۆتوبۋسى» دەپ اتالاتىن مامانداندىرۋعا باعىتتالعان ورتالىق جۇمىس ىستەي باستايدى. اتالعان ورتالىقتىڭ نەگىزگى جۇمىسىنىڭ ءبىرى – جاستار مەن جاسوسپىرىمدەردىڭ ماماندىق تاڭداۋداعى باعىتىن ايقىنداۋعا جاردەمدەسۋ. سونىمەن قاتار كوكشەتاۋ قالاسى ءبىلىم بەرۋ ءبولىمى بۋكترەيلەر-جوباسىنا باستاماشى بولدى. وندا قازاقستاندىق جانە شەتەلدىك 130 اۆتوردىڭ كىتاپتارى مۋزىكالىق سازبەن ارلەندىرىلىپ, ءارتۇرلى ەستە قالارلىق جايتتارمەن كومكەرىلىپتى. بۇل دا كوڭىل مارقايتار ءىس ەكەنى ايتپاسا دا تۇسىنىكتى. وسىلايشا وڭىردە ءبىرشاما جۇمىستار اتقارىلىپ جاتىر.
اسقار تۇراپباي ۇلى,
«ەگەمەن قازاقستان»
اقمولا وبلىسى
