باعدارلاما ەلىمىزدىڭ ەرتەڭگى تەمىرقازىعى بولعاندىقتان وندا نەگىزگى وزەكتى ماسەلەلەر قولعا الىنادى.
وقو وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق «رۋحاني جاڭعىرۋ» جوبالىق كەڭسەنىڭ باسشىسى باقىتجان اشىربەكوۆ وسى جايلى تولىعىراق باياندادى. ماسەلەن, وبلىستا قاسيەتتى جەرلەردىڭ ءتىزىمىن قالىپتاستىرۋعا ۇسىنىستار ازىرلەيتىن وڭىرلىك جۇمىس توبى قۇرىلىپ, كيەلى جەرلەردىڭ وڭىرلىك كارتاسىنىڭ جوباسى جاسالدى. قازىرگى تاڭدا «قاسيەتتى قازاقستان» ورتالىعىمەن جالپى رەسپۋبليكا بويىنشا 100 نىسان ىرىكتەلىپ الىنسا, ونىڭ ىشىندە وڭتۇستىك قازاقستان وبلىسىنان 25 نىسان ەنگىزىلگەن بولاتىن. وبلىس كولەمىندە باعدارلامالىق ماقالانىڭ باسىمدىقتارىن جۇزەگە اسىرۋ بويىنشا «تۇركىستان – تۇركى الەمىنىڭ مادەني استاناسى» جوباسىن ەرەكشە اتاۋعا بولادى. مۇنىڭ اياسىندا 40-تان استام شارا وتكىزىلدى.
– وبلىستا «تۋعان جەر» ارنايى جوباسى بويىنشا 50 جوبا دايىندالىپ, 150-دەن اسا ءىس-شارا جۇزەگە اسىرىلۋدا. سونداي-اق كاسىپكەرلەر مەن دەمەۋشىلەردىڭ قاتىسۋىمەن 31 ملرد 467 ملن تەڭگەنى قۇرايتىن 577 وڭىرلىك جوبا جۇرگىزىلىپ كەلەدى. ونىڭ ىشىندە 2017 جىلى 6342,8 ملن تەڭگەگە 473 نىسان اياقتالىپ, پايدالانۋعا بەرىلدى. جالپى «رۋحاني جاڭعىرۋ» باعدارلاماسى ەندى جاڭا جوبالار بويىنشا جۇرگىزىلەدى, – دەدى باقىتجان اشىربەكوۆ.
سونىمەن قاتار وبلىس باسشىسى جانسەيىت تۇيمەباەۆتىڭ قولداۋىمەن تاريحي-مادەني مۇرالارىمىزدى ناسيحاتتاپ, جاستارعا پاتريوتتىق تاربيە بەرۋ ماقساتىندا «كونە جەتىگەننىڭ سىرى» اتتى 10 سەريالى تەلەحيكايا, «كيەلى قازىعۇرت», «وتىراردى قورعاۋ», «كۇش اتاسى – قاجىمۇقان» اتتى انيماتسيالىق جانە « ۇلى جىبەك جولىنداعى ەسكەرتكىشتەر» سىندى دەرەكتى فيلمدەر ءتۇسىرىلىپ, ەل نازارىنا ۇسىنىلدى
بۇل رەتتە وبلىستاعى «ساق» كينوستۋدياسىنىڭ ءونىمدى ەڭبەگىن اتاپ وتۋگە بولادى. بىرنەشە حالىقارالىق بايقاۋدا جەڭىمپاز اتانعان كينوستۋديا انيماتسيا سالاسىندا جاقسى دۇنيەلەر ۇسىنىپ ءجۇر.
حالىقارالىق ساراپشىلار «ساق» ستۋدياسى تۋىندىلارىنىڭ نەگىزىندە پاتريوتتىق رۋحتىڭ باسىمدىعىن, ونى ءبىر ۇلتقا تەلىنبەيتىن, دۇنيە جۇزىندەگى بارلىق حالىقتارعا رۋحاني قازىنا ەكەندىكتەرىن ايتقان. ياعني, باعدارلامادا ايتىلعان وتانشىلدىق يدەياسى كينوكومپانيا ونىمدەرىندە كورىنىس تاۋىپ جاتىر.
بۇل باعىتتاعى جۇمىستار وبلىستا كەزەڭ-كەزەڭىمەن جىل بويى جاڭا جوبالارمەن تولىعادى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
