مىسىردا بيلىكتى اسكەريلەر ءوز قولىنا العانى بەلگىلى. بۇل ءجايت ەلدە جاپپاي نارازىلىق اكتسياسىن تۋىنداتتى. ەگيپەت حالقى بيلىك شۇعىل تۇردە ازاماتتىق ۇكىمەتكە بەرىلۋى ءتيىس دەپ ەسەپتەسە, اسكەريلەر ءوز بيلىگىن كەلەسى جىلدىڭ سوڭىنا دەيىن ساقتاپ, وكىلەتتىگىن ازاماتتىق ۇكىمەتكە سودان كەيىن عانا وتكىزبەك.
ەگيپەت استاناسى – كاير قالاسىنىڭ تاحرير الاڭىنداعى نارازىلىق اكتسياسى 19 قاراشا كۇنى باستالعان بولاتىن. پوليتسيا مەن اسكەريلەر الاڭدى ەرەۋىلشىلەردەن تازارتۋعا ارەكەتتەنۋى سالدارىنان قاقتىعىس تۋىندادى. ماسەلەن, كەشە اتالعان الاڭداعى جانجال شارىقتاۋ شەگىنە جەتىپ, سونىڭ سالدارىنان 13 ادام وپات بولسا, مىڭنان استامى جارالاندى. كاير قالاسىنداعى نارازىلىق شارالارى ەلدەگى ەكىنشى ءىرى قالا – الەكساندريادا دا بوي كورسەتتى.
كوپشىلىك داۋىسقا يە بولدى
وتكەن جەكسەنبى كۇنى يسپانيادا بولعان پارلامەنتتىك سايلاۋدا وڭشىلتسەنتريستىك حالىقتىق پارتيا جەڭىسكە جەتتى. بيۋللەتەندەر 100 پايىز ءوڭدەلگەننەن كەيىنگى مالىمەت بويىنشا, حالىقتىق پارتيا 44,62 پايىز داۋىس العان. ەندى بۇل كورسەتكىش وعان پارلامەنتتەگى 350 ورىننىڭ 186-سىن يەلەنۋگە مۇمكىندىك بەرەدى. ەندى سايلاۋداعى جەڭىس حالىقتىق پارتياعا ۇكىمەت جاساقتاۋعا جاعداي تۋعىزسا, ونىڭ كوشباسشىسى ماريانو راحوي پرەمەر-ءمينيستردىڭ ورىنتاعىنا جايعاساتىن بولادى. ال بيلىككە 2004 جىلى كەلگەن سوتسياليستىك پارتيا وتكەن سايلاۋدا 28,73 پايىز عانا داۋىس الا الدى. ءسويتىپ, ولارعا جاڭا شاقىرىلىمداعى پارلامەنتتەن 110 ورىن عانا تيەتىن بولدى. حالىقتىق پارتيا ءۇشىن 44,62 پايىز ونىڭ تاريحىنداعى ەڭ ۇلكەن كورسەتكىش بولسا, 28,73 پايىز سوتسياليستەر ءۇشىن ونىڭ تاريحىنداعى ەڭ از كورسەتكىش بولىپ وتىر.قىزىل كحمەرلەرگە سوت جالعاستى
كەشە كامبودجانىڭ توتەنشە تريبۋنالى ادامزاتقا قارسى قىلمىس جاسادى دەپ ايىپتالعان ءۇش قىزىل كحمەرلەر سەركەسىنىڭ ءىسىن قاراۋعا كىرىستى. ەل استاناسى – پنومپەن قالاسىندا باستالعان پروتسەسكە 85 جاستاعى نۋون چەا, 80 جاستاعى كحيەۋ سامپحان جانە بۇرىنعى سىرتقى ىستەر ءمينيسترى 86 جاستاعى يەنگ ساري شاقىرىلعان. ولارعا 1975-1979 جىلدارى, ياعني پول پوت بيلىگى كەزىندە 1,7 ميلليون ادامنىڭ گەنوتسيدىنە الىپ كەلگەن قاندى قىرعىنعا تىكەلەي قاتىستارى بار دەگەن ايىپ تاعىلعان. بۇل قىزىل كحمەرلەر سەركەلەرىنە بايلانىستى ەكىنشى سوت پروتسەسى بولىپ تابىلادى. وتكەن جىلى 20 مىڭ تۇتقىننىڭ ولىمىنە جاۋاپتى سانالعان كانگ كەك لەۋ 30 جىلعا باس بوستاندىعىنان ايىرىلعان بولاتىن. ونىڭ اپەللياتسياسىن قاراۋ 2012 جىلدىڭ اقپانىندا اياقتالادى دەپ كۇتىلۋدە.پوليتسيا لاڭكەستىكتىڭ الدىن الدى
اقش پوليتسياسى لاڭكەستىك جاساۋعا دايىندىق جۇرگىزدى دەگەن كۇدىكپەن تۇتقىنداعان حوسە پيمەنتەل مانحەتتەندە تۇراتىن جۇمىسسىز بولىپ شىققان. ول سونداي-اق مۇحامماد يۋسۋف دەگەن اتپەن دە بەلگىلى ەكەن. بۇل تۋرالى كەشە وتكەن ءباسپاسوز ءماسليحاتىندا نيۋ-يورك قالاسىنىڭ مەرى مايكل بلۋمبەرگ مالىمدەدى. بلۋمبەرگتىڭ سوزىنە قاراعاندا, 27 جاستاعى پيمەنتەل «ءال-كايدانىڭ» يدەولوگياسىن جانىنا جاقىن تۇتاتىن ادام رەتىندە اقش-تىڭ پوليتسياسى مەن پوشتا بولىمشەسىن شابۋىلداۋدى جوسپارلاپتى. سونداي-اق اۋعانستان مەن يراكتان ورالعان امەريكالىق اسكەريلەر دە ونىڭ لاڭكەستىگىنىڭ قۇرباندىقتارى بولۋى ءتيىس ەكەن. قاۋىپسىزدىك كۇشتەرى كۇدىكتىنىڭ ىزىنە وسىدان ءبىر جىل بۇرىن تۇسسە كەرەك. پيمەنتەل – دومينيكان رەسپۋبليكاسىندا تۋعان اقش ازاماتى.لۋجكوۆ تەرگەۋدەن سوڭ سۇحبات بەردى
ماسكەۋدىڭ بۇرىنعى مەرى يۋري لۋجكوۆ رەسەي ىشكى ىستەر مينيسترلىگىنىڭ تەرگەۋ دەپارتامەنتىندە جاۋاپتاسىپ شىققاننان كەيىن باق وكىلدەرىنە سۇحبات بەرگەن. ونىمەن تەلەفون ارقىلى جۇرگىزىلگەن اڭگىمەنى «دوجد» تەلەارناسى جازىپ الىپتى. لۋجكوۆ ءوزىنىڭ سۇحباتىندا «ماسكەۋ بانكىندەگى» ۇرلىق بويىنشا قوزعالعان قىلمىستىق ىسكە جاۋاپ بەرۋگە كەلگەن سەبەبى – ءوزىنىڭ كىناسىزدىگىنە سەنىمدى بولعاندىعى ەكەنىن جاريا ەتىپتى. سونىمەن قاتار, ول ەل باسشىلىعىنىڭ وعان قاۋىپسىزدىك كەپىلدىگىن بەرگەنى تۋرالى اقپاراتتى تەرىسكە شىعاردى. بۇل جونىندە ەشقانداي ۋاعدالاستىق بولعان ەمەس, دەپ مالىمدەگەن لۋجكوۆ. تەرگەۋدىڭ قۇپيالىعىنا سىلتەمە جاساعان بۇرىنعى مەر وعان قانداي سۇراقتار قويىلعانى تۋرالى ايتۋدان دا باس تارتقان.قاستاندىق سىرى انىقتالۋدا
باكۋدە جازۋشى جانە پۋبليتسيست رافيك تاگيگە قاستاندىق جاسالدى. پىشاق جاراقاتىن العان زارداپ شەگۋشى شۇعىل اۋرۋحاناعا جەتكىزىلگەن. جەرگىلىكتى «ازادلىگ» («ازاتتىق») راديوسىنىڭ اقپاراتىنا قاراعاندا, وعان شابۋىل ءۇيىنىڭ جانىندا جاسالعان. تاگي العان جاراقاتىنا قاراماستان, ۇيىنە جەتىپ قۇلاعان. سودان كەيىن جەدەل جاردەم شاقىرىلعان. وعان وپەراتسيا جاسالىپتى. جاعدايى اۋىر كۇيىندە قالىپ وتىرعانىمەن, ءدارىگەرلەر ومىرىنە قاۋىپ جوق دەيتىن كورىنەدى. شابۋىلعا قاتىستى قىلمىستىق ءىس قوزعالعان. باق-تاردا جازۋشىعا شابۋىل ونىڭ يسلامعا قاتىستى سىني سوزدەر ايتۋىنا بايلانىستى كەك الۋ ارەكەتى بولۋى دا ىقتيمال دەگەن بولجام ايتىلۋدا.قىسقا قايىرىپ ايتقاندا:
كاباردين-بالقار استاناسى – نالچيك قالاسىنداعى تۇرعىن ءۇيدى شابۋىلداۋ كەزىندە جاسىرىن قارۋلى بانداعا قاتىسى بار دەپ تابىلعان ءۇش كۇدىكتى ولتىرىلگەن. وپەراتسيا بارىسىندا قۇقىق قورعاۋ ورگاندارى مەن بەيبىت تۇرعىندار اراسىندا قازا تاپقاندار جوق كورىنەدى. رەسەيدىڭ ءبىرىنشى پرەزيدەنتى بوريس ەلتسيننىڭ نەمەرە تۋىسقانى ستانيسلاۆ گلەبوۆ رەسەي فەدەراتسياسى كوممۋنيستىك پارتياسىنىڭ قاتارىنا وتكەن. وعان مۇشەلىك بيلەتتى مەملەكەتتىك دۋما دەپۋتاتتىعىنا كانديدات پاۆەل دوروحين تاپسىرعان. ەلتسيننىڭ كومپارتيا قاتارىنان ەڭ العاشقى بولىپ شىققانى بەلگىلى.ينتەرنەت ماتەريالدارى نەگىزىندە ازىرلەندى.
