بىرقاتار ماڭىزدى قۇجاتتار قابىلداندى

كەشە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ توراعالىق ەتۋىمەن كوميسسيانىڭ وتىرىسى ءوتتى. وتىرىستا قازاقستان رەسپۋبليكاسى پارلامەنتى ءماجىلىسى دەپۋتاتتارى مەن ءماسليحاتتارى دەپۋتاتتارىن سايلاۋ بويىنشا سايلاۋ ناۋقاندارىن ۇيىمداستىرۋعا قاتىستى بىرقاتار ماڭىزدى قاۋلىلار قابىلداندى. قابىلدانعان قۇجاتتاردىڭ قا­تارىندا سەنىم بىلدىرىلگەن ادام­داردى تىركەۋ ءتارتىبى شارتتارى تۋرالى نۇسقاۋلىق, سونداي-اق داۋ­ىس بەرۋگە ارنالعان جاشىك­تەر­دى پلومبالاۋ نەمەسە مورلەۋ ءتار­تىبى تۋرالى نۇسقاۋلىق بار. بۇل قۇجاتتار نەگىزىنەن تەحنيكالىق سيپاتقا يە جانە سايلاۋ كوميس­سيا­لارىنا سايلاۋ راسىمدەرىن وتكىزۋ ءتارتىبىن ءتۇسىندىرۋ ءۇشىن قاجەت. ال سەنىم بىلدىرىلگەن ادام­داردى تىركەۋ ءتارتىبى مەن شارتتارى تۋرالى نۇسقاۋلىق ساياسي پارتيالار مەن كانديدات­تار­دىڭ سەنىم بىلدىرىلگەن ادامدارى رەتىندە تىركەلە ال­ماي­تىن ادامدار توبىن بەلگىلەيدى. ولار – قا­زاقستان رەسپۋبليكا­سى­نىڭ ازاما­تى بولىپ تانىلمايتىن ادامدار, سايلاۋ كوميسسيالارى­نىڭ مۇشە­لەرى جانە ساياسي مەملەكەتتىك قىزمەتشىلەر. وتىرىستا قابىلدانعان قۇ­جات­تاردىڭ تاعى ءبىرى – سايلاۋ بيۋللەتەندەرىن دايىنداۋ, جەتكىزۋ جانە ەسەپكە الۋ ءتارتىبى تۋرالى نۇسقاۋلىق. بۇل قاۋلىنىڭ ماڭىز­دى­لىعى الداعى سايلاۋدى ۇيىم­داس­تىرۋ مەن ماتەريالدىق-تەحني­كا­لىق قامتاماسىز ەتۋدە جاتىر. وتىرىستا سونداي-اق ورتالىق سايلاۋ كوميسسياسى پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىندا جانە ءماس­لي­حاتتار دەپۋتاتتارىنىڭ كەزەكتى سايلاۋىندا شەتەلدىك بۇقارالىق اقپارات قۇرالدارىنىڭ وكىلدەرى سايلاۋدى بايقاۋدى قازاقستان رەسپۋبليكاسى سىرتقى ىستەر مينيسترلىگى بەرگەن اككرەديتتەۋ تۋرالى كۋالىگى بولعان جاعدايدا جۇزەگە اسىرۋعا قۇقىلى دەپ بەلگىلەدى. بۇل رەتتە حالىقارالىق بايقاۋشىعا, سونداي-اق شەتەلدىك بۇقارالىق اقپارات قۇرالدارى­نىڭ وكىلىنە جەكە باسىن كۋا­لان­دىراتىن قۇجاتىن كورسەتكەن كەزدە وعان ءبىر اۋدارماشى ىلەسىپ جۇرە الادى. ورتالىق سايلاۋ كوميسسياسى­نىڭ قاۋلىسىمەن سايلاۋ تۋرالى زاڭمەن كوزدەلگەن ءتارتىپ بوي­ىن­شا سايلانعانعا دەيىنگى كەزەڭگە ماڭعىستاۋ, شىعىس قازاقستان, الماتى وبلىستارىنىڭ وبلىس­تىق سايلاۋ كوميسسيالارىنىڭ جانە الماتى قالاسىنىڭ اۋماق­تىق سايلاۋ كوميسسياسىنىڭ جاڭا مۇشەلەرى دە تاعايىندالدى. وتىرىستان كەيىن وتكەن بريفينگتە ورتسايلاۋكوم توراعاسى قۋاندىق تۇرعانقۇلوۆ الداعى ساي­لاۋدا سايلاۋشىلار ءارتۇرلى ءۇش بيۋللەتەن الاتىنىن اتاپ ءوتتى. توراعانىڭ ايتۋىنشا, ولار­دىڭ بىرەۋى قازاقستان رەسپۋب­لي­كاسى پارلامەنتى ءماجىلىسى دە­پۋتاتتارىنىڭ سايلاۋىندا ساياسي پارتيا ءۇشىن داۋىس بەرۋگە ارنال­عان. ەكىنشى بيۋللەتەن – وب­لىس­تىق ءماسليحات دەپۋتاتتىعىنا كان­ديدات ءۇشىن داۋىس بەرۋگە, ال ءۇشىنشى بيۋللەتەن – اۋداندىق نەمەسە قالالىق ءماسليحاتتىڭ دە­پۋتاتتىعىنا كانديدات ءۇشىن داۋىس بەرۋگە ارنالعان بيۋللەتەن بولىپ تابىلادى. استانا مەن الماتى قالالارىنىڭ سايلاۋ­شى­لارى ەكى بيۋللەتەن الادى. ويتكەنى, بۇل قالالاردا اۋداندىق ءماسليحاتتار جوق. سوندىقتان وندا سايلاۋ­شىلار ءوز داۋىسىن ساياسي پارتياعا بەرۋى جانە قالالىق ءماسليحاتتىڭ دەپۋتاتىن سايلاۋعا ءتيىس بولادى. قازىرگى ۋاقىتتا ورتالىق سايلاۋ كوميسسياسى بارلىق قاجەتتى دايىندىق شارالارىن وتكىزۋدە. الداعى سايلاۋعا ءتيىمدى اقپا­رات­تىق قولداۋ كورسەتۋگە, سونىمەن قاتار, سايلاۋدى ۇيىمداس­تى­رۋ­شى­لاردى وقىتۋعا كۇش جۇمىل­دى­رىپ وتىر. سايلاۋدى ۇيىمداس­تى­رۋشىلار ءۇشىن رەسپۋبليكالىق سەمينار-كەڭەستەن باسقا وڭىرلىك سەمينارلار دا وتكىزىلەتىن بولادى. ءاليسۇلتان قۇلانباي.