گۇلدەنسە اۋىل – گۇلدەنەمىز ءبارىمىز!
90-شى جىلدارى لەنين كەڭشارىنىڭ بولىمشەسى سانالىپ كەلگەن دايىندىق اۋىلى 11 ميلليون تەڭگە قارىزعا بەلشەدەن باتقاندا باسقارۋعا ەشكىمنىڭ جۇرەگى داۋالامادى. تۇرعىندار اۋىلدىڭ بولاشاعىنان كۇدەر ءۇزىپ, جان-جاققا كەتە باستادى. ۇيلەر قاڭىراپ, ءتۇتىن سانى 38-گە دەيىن قۇلدىرادى. ءبىرجان شايمەردەنوۆ باسشىلىققا وسىنداي سىن ساتتە جەرلەستەرىنىڭ وتىنىشىمەن وبلىس ورتالىعىنداعى قىزمەتى مەن جايلى پاتەرىن تاستاپ كەلدى. سودان بەرى ارادا 15 جىل وتە شىقتى. وسى جەردە ءبىر كەزدەرى تاراۋدىڭ از-اق الدىندا قالعان ەلدى مەكەن بولدى دەگەنگە سەنۋ قيىن. دايىندىق ادام تانىماستاي وزگەرىپ, ۇلگىلى اۋىلعا اينالدى. ال ءبىرجان قۇرعان وسى اتتاس سەرىكتەستىك قىزىلجار وڭىرىندەگى ىرگەلى شارۋاشىلىقتىڭ ءبىرى سانالادى. ماشينا-تراكتور پاركى تۇگەلدەي جاڭارىپ, سوڭعى جىلدارى عانا 12 «متز -82» تراكتورى, 4 «دجون دير» كومباينى, 2 سەبۋ كەشەنى, كەڭ الىمدى جاتكا, دارىشاشقىش ساتىپ الىندى. ءسويتىپ, وزىق اگروتەحنولوگيالار كەڭىنەن قولدانىلاتىن بولدى. ەگىنشىلىك مادەنيەتىن جاقسارتۋ باعىتىندا جاقسى تاجىريبەلەر قالىپتاسقان. 850 گەكتار استىقتى القاپ 10 ەسەگە دەيىن ۇلعايىپ, جىل وتكەن سايىن شىعىمدىلىق ارتىپ كەلەدى. 2009 جىلى گەكتار بەرەكەسى 34 تسەنتنەردى قۇرادى.
بىلتىرعى قۋاڭشىلىقتىڭ وزىندە 17 تسەنتنەردەن ءونىم الدى. بيىل 39 تسەنتنەردەن اينالىپ, وبلىستا جارىس كوشىن باستادى. قازىر دايىندىقتا 58 ءتۇتىن بار. وسى جىلدار ىشىندە مادەنيەت ءۇيىن جوندەۋگە 5,5 ميلليون تەڭگە جۇمسالدى. 7 ميلليون تەڭگەگە مەشىت سالىندى. 2,5 ميلليون تەڭگەگە سەرىكتەستىك كەڭسەسى, 12 ورىندى مونشا, فاپ بوي كوتەردى. كىتاپحانا قايتادان جۇمىس ىستەي باستادى. الەۋمەتتىك-مادەني نىساندار جيھازدارمەن, قاجەتتى قۇرال-جابدىقتارمەن تولىقتىرىلدى. بىلتىر موڭعوليادان كوپ بالالى وتباسىلاردى الدىرىپ, جۇمىسپەن, باسپانامەن قامتاماسىز ەتتى. ولاردىڭ 11 بالاسى ساباققا بارىپ ءجۇر.
ءسويتىپ, نەگىزگى مەكتەپ مارتەبەسىن ساقتاپ قالدى. 90 ادام تۇراقتى جۇمىس ىستەيدى. ورتاشا ايلىق جالاقى 80 مىڭ تەڭگەنى قۇرايدى. جۋىردا ءوز كۇشتەرىمەن 4 ءۇي سالىپ, كوپ بالالى وتباسىلاردى قونىستاندىردى. ءبىرجان ءابدىلمان ۇلى مەكتەپكە دەگەن قامقورلىعىن ەش اياعان ەمەس. عيماراتتى كۇردەلى جوندەۋدەن وتكىزىپ, جەڭىل كولىك سىيلادى. باستاۋىش سىنىپ وقۋشىلارى تەگىن تاماقتانادى. 500 مىڭ تەڭگە ءبولىپ, شاعىن ورتالىق ۇيىمداستىردى. 250 مىڭ تەڭگە قاراستىرىپ, ءورت دابىلىن ورناتتى. كەشەگى قان مايداننان ورالماعان بوزداقتار مەن بەيبىت ومىردە ەڭبەك ەتىپ, قايتىس بولعان 97 ادامنىڭ اتى-جوندەرى جازىلعان ەڭسەلى ەسكەرتكىش ورناتتى. ونىڭ جانى ساياباققا اينالدىرىلىپ, اعاش كوشەتتەرى ەگىلدى.
تاۋەلسىزدىكتىڭ ون جىلدىعى قارساڭىندا جشس-دە ەڭبەك ەتەتىن 10 وزات جۇمىسشىعا 50 پايىزدىق جەڭىلدىكپەن جەڭىل كولىك اپەرىلسە, سودان بەرگى كەزەڭدە ونداي قۇرمەتكە بولەنگەندەردىڭ قاتارى 50-گە جەتتى. بيىل 20 جىلدىق مەرەيتويدى ءوز ءسان-سالتاناتىمەن اتاپ ءوتۋ ماقساتىمەن قوماقتى قارجى ءبولىنىپ وتىر. «دايىندىق» جشس 2002 جىلدان بەرى بانكتەن نەسيە الىپ كورمەپتى. ءىستىڭ كوزىن تاۋىپ, ۇتىمدى ۇيىمداستىرۋدىڭ ارقاسىندا بەرەشەكتەن تولىق قۇتىلىپ, ەندى ەگىنشىلىكپەن قاتار ەتتى مال شارۋاشىلىعىن دا وركەندەتۋگە بەت بۇرعان. سوعان وراي شارۋاشىلىقتىڭ 40 ميلليون تەڭگە قاراجاتىنا شىعىس قازاقستان, قوستاناي وبلىستارىنان 230 باس قازاقتىڭ اقباس سيىرىن اكەلگەن. ولاردى اۋكتسيون ارقىلى ساتىپ الىنعان كانادالىق ەتتى گەرەفورد بۇقالارىمەن شاعىلىستىرماق. ونداعى ماقسات – ەتتى مال باسىن 400-گە دەيىن جەتكىزىپ, اسىل تۇقىمدى رەپرەدۋكتور شارۋاشىلىق مارتەبەسىن يەلەنۋ. مۇندا قۇنارلى جەم-ءشوپ قورىن جاساۋ ءىسى دە مۇقيات ەسكەرىلگەن. 300 گەكتار جەرگە كوپجىلدىق ءشوپ ەگىلەدى.
مال شارۋاشىلىعى ءۇشىن قىتايدان جۇك تيەگىش, اقش-تان وراما ءشوپ تايلاعىش جەتكىزىلگەن. فرانتسياعا «مانيتۋ» اتتى ونداعان وپەراتسيانى ءبىر ءوزى اتقاراتىن تەحنيكاعا تاپسىرىس بەرىپ قويىپتى. ءبىرجان اتبەگىلىكپەن دە اينالىسادى. سەرىكتەستىكتەگى ارعىماقتاردىڭ دەنى – اعىلشىندىق تۇقىمدار. ايمان اتتى جەلمەن جارىسقان سايگ ۇلىك تالاي بايگەلەردە توپ جارىپ, 11 جەڭىل كولىك پەن 3 ميلليون تەڭگە ۇتىپ العان. مىنە, قالاداعى جىلى ورنىن اۋىلعا اۋىستىرعان ول ءبىر كەزدەردەگى قيىندىقتاردى ەڭسەرىپ, بۇگىندە ەل ازاماتىنا لايىق ءوز ورنىن تاپقان.
ماتەريالداردى ۇيىمداستىرعان «ەگەمەن قازاقستان» گازەتىنىڭ سولتۇستىك قازاقستان وبلىسىنداعى مەنشىكتى ءتىلشىسى ءومىر ەسقالي.
