چەمپيون باسقارما باستىعىنىڭ مەنشىگى مە؟

ەرتەگىدەگى تولاعايدىڭ ءتىرى بەينەسى يليا يلين ءوزىن-ءوزى ءدا­لەلدەدى. جاھاندا ازىرگە وزىنە تەڭ كەلەر سپورتشى جوعىنا جۇرت­تىڭ كوزىن جەتكىزدى. الەم بىرىنشىلىگىن ۇتىپ, بيىك ساتىعا كوتە­رى­لىپ, ءانۇران ويناعاندا باتىر جىگىت نەگە جىلادى؟ اركىم ءار ساققا جۇگىرتەدى. ءبىز بىلاي ويلايمىز. بەيجىڭ وليمپياداسىنان كەيىن چەمپيوننىڭ ءبىرشاما بو­ساڭ­سىعانى انىق. ەركەلىك تە بول­عان شىعار. قازاقتىڭ مارا­پا­تى مەن قوشەمەتىنىڭ ءوزى ادام ولتىرەرلىكتەي ەكەنى تاعى بار. وسى تۇستا يلين شەتقاقپاي كور­دى. ماسەلەسى جوعارى ورىن­دار­دا قارالىپ, ۇلتتىق قۇراما­نىڭ ساپىنان شىعارىپ تاستاۋ قاۋپى دە بولدى. كەشە عانا قۇ­شاعىنا قىسىپ, ارقاسىنان قا­عىپ, بار جاقسى ءسوزىن ارناپ ءجۇر­گەندەر ءبىر كۇندە جونىن توس­تى. ونى ايتاسىز, قاسكويلەر پى­شاقتاپ تا كەتتى. يليانىڭ سپورتتىق ومىرىنە نۇكتە قوي­عان­دار دا كوپ بولدى. سول كەزدە كوك جاشىكتەن باتىر بالانىڭ ءسوزىن ەستىگەنبىز. – مەن ەندى نە ىستەيىن؟ ەلدەن كەتەيىن بە؟ بىراق مەن تۋعان جەرىمدى تاستاپ كەتە المايمىن عوي. مەن ءوز ەلىمنىڭ پاتريوتى ەمەسپىن بە؟ قالاي كەتەم؟ جاس جىگىتتىڭ جانايقايى ەدى بۇل. وسىلاي دەپ ىشقىنعان جىگىت باپكەرىن اۋىستىرىپ, جاتتىعۋعا تىڭعىلىقتى كىرىستى. ناتيجەسى بەل­گىلى. ءۇش دۇركىن الەم چەم­پيو­نى اتاندى. سول كەزدە وسىعان دەيىن كوكىرەكتە شەمەن بولىپ قات­قان شەر كوزدەن ىستىق جاس بوپ اعىلدى. ەندى ءبىر كەزدەرى ارقاسىن بەرگەن پەندەلەر بۇگىندە چەمپيون­نىڭ اينالاسىنا قايتا جينالا باستادى. جولاتپايدى. جەكەمەنشىگى سياقتى تاپ ءبىر. يەلەنىپ ال­عان. ماسەلەنىڭ ءمان-جايىن انىق­تاپ ايتايىق. بۇگىندە چەمپيون تۋعان جەرى قىزىلوردادا تۇرمايدى. پاريجدەگى جەڭىسىنەن كەيىن يلين ەلگە كەلدى. قاراپايىم قاراشانىڭ با­تىر بالاعا دەگەن قۇرمەتى الابوتەن. توبەلەرىنە كوتەرىپ جاتىر. اكىمدىك تاراپىنان سىي-سياپات تا جاسالدى. كۇندە قولعا تۇسپەيتىن جەڭىمپازبەن سۇحباتتاسىپ قالۋدى ءاربىر جۋرناليست وزىنە مىندەت ساناسا كەرەك. ءبىز دە سويتتىك. نارتاي بەكەجانوۆ اتىنداعى تەاتردا ءاڭ­گىمەگە تارتۋدىڭ رەتى كەلمەدى. سونان سوڭ باپكەرىمەن كەلىسىپ, اكىم­دىكتە سويلەسەتىن بولىپ شەشتىك. اكىمدىكتەن شارۋالارىن بىتىرگەن چەمپيوندى سۇحباتقا شاقىرعالى تۇرعاندا سادىق مۇستافاەۆ كيلىگە كەتتى. سادىق مۇستافاەۆ – وب­لىس­تىق سپورت جانە تۋريزم باس­قار­ماسىنىڭ باستىعى. «سۇحبات المايسىڭ», دەيدى وكتەم ءۇن­مەن. «نە ءۇشىن؟» دەيمىز ءبىز. «مە­نەن نەگە رۇقسات سۇرا­ماي­سىڭدار؟ مەن وسى جەردە قوي باعىپ ءجۇر­مىن بە, نە؟» باس­قار­ما باستىعىنىڭ جاۋابى وسى بول­دى. ودان ارعى اڭگىمەگە با­لا­عات سوزدەر ارا­لاسىپ كەتتى. سونان سوڭ يليا­نىڭ باپكەرىنەن ۋادەسىن سۇرا­عان­بىز. ول: «ءبىز ءۇشىن جازا­سىڭ با؟» دەپ قاراپ تۇر. ءاسىلى, باس­قارما باس­تىعىنان اسا الماسا كەرەك. سونىمەن سۇحبات بولمادى. ال ەندى دەيمىز عوي, كەشە يلين تەپەرىش كورىپ جاتقاندا وسى مۇستافاەۆ قايدا ەدى؟ نەگە قازىرگىدەي جانىنان شىر اينالىپ شىقپاي, قورعاشتاپ جۇرمەدى؟ بۇگىن كەلىپ يەلىك ەتەتىندەي ول كىم؟ ءجۋرناليستىڭ جولىنا بوگەت بولاتىن قۇقىق­تى وعان كىم بەردى؟ وسىنداي سۇراقتار سانانى شيمايلايدى. جاۋابىن ءوزىڭىز دە ءبىلىپ وتىرعان شىعارسىز. «چەمپيون مەملەكەتتىڭ قا­راۋىندا بولۋى كەرەك», دەگەن قاعيدانى ۇستاناتىنداردىڭ قا­تا­رىنانبىز. ەل نامىسىن الەمدىك دەڭگەيدە قورعاپ ءجۇر­گەن جىگىتتەرگە ەرەكشە قامقور­لىق كەرەك-اق. بىراق جۋرناليستپەن جولىقتىرماۋ دەگەن نە سۇمدىق؟ ازعانتاي بيلىككە مالدانعانداردىڭ ءىسى شىعار. دەگەنمەن, «كوپ اسقانعا ءبىر توسقاننىڭ» بولاتىنىن دا ەستەن شىعارماۋ كەرەك. ەرجان بايتىلەس. قىزىلوردا.