وڭىردەگى ءىرى كاسىپورىنداردىڭ سالىق تولەۋشىلەرىنە, شاعىن جانە ورتا بيزنەس وكىلدەرىنە, قوعامدىق بىرلەستىكتەر مەن باسقا دا ۇيىمدارعا ارنالعان سەميناردى اشقان كىرىسپە سوزىندە وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ جاڭا كودەكس ادال سالىق تولەۋشىنىڭ مۇددەسىن قورعاۋعا باعىتتالعانىن, بۇدان بىلاي بارلىق تۇسىنىسپەۋشىلىكتەر سالىق تولەۋشىلەردىڭ پايداسىنا شەشىلەتىنىن اتاپ ءوتتى.
سەميناردا ءسوز العان ۇلتتىق ەكونوميكا ءمينيسترىنىڭ ءبىرىنشى ورىنباسارى رۋسلان دالەنوۆ «جاڭا سالىق كودەكسىندەگى جاڭا ساياسات» اتتى بايانداماسىندا كودەكستەگى وزگەرىستەردى جان-جاقتى ءتۇسىندىردى. «بۇل سالىق كودەكسىنىڭ بۇرىنعىلاردان وزگەشىلىگى, ارتىق كەدەرگىلەردەن ارىلىپ, قاراپايىم حالىق مۇددەسىن قورعاۋعا باسىمدىق بەرىلۋىندە. ءسوزىم دالەلدى بولۋ ءۇشىن ءبىر-ەكى مىسال كەلتىرەيىن. ماسەلەن, بۇعان دەيىن 2017 جىلدىڭ م ۇلىك جانە كولىك سالىقتارىن سول جىلدىڭ 1 قازانىنا دەيىن تولەۋ كەرەك بولاتىن. ەندى جىل قورىتىندىسى بويىنشا تولەيسىز. بۇدان بولەك قارىزدى كەشىرۋ كەزىندە جەكە تابىس سالىعى الىنىپ تاستالدى. ەگەر بانك ازاماتقا قارىزىن ەسەپكە جاتقىزسا, وندا ەسەپكە جاتقىزعان سومادان بيۋدجەتكە 10% سالىق ۇستاۋ قاجەت ەمەس», دەدى ول.
قازاقستاننىڭ سالىق تولەۋشىلەر قاۋىمداستىعى باسقارۋشى كەڭەسىنىڭ ءتورايىمى جاننات ەرتىلەسوۆا جۇرگىزگەن سەمينار بارىسىندا قارجى مينيسترلىگى مەملەكەتتىك كىرىستەر كوميتەتىنىڭ قىزمەتكەرلەرى سالىق ساياساتىنىڭ ەرەكشەلىكتەرى مەن جەر قويناۋىن پايدالانۋشىلارعا سالىق سالۋ, ارنايى سالىق رەجىمىن جەتىلدىرۋ, ققس قايتارۋدى اكىمشىلەندىرۋ جانە جاڭا سالىق كودەكسىنىڭ باسقا دا جاڭاشىلدىقتارىن مۇقيات ءتۇسىندىرىپ, سالىق تولەۋشىلەر مەن بۋحگالتەرلەر تاراپىنان قويىلعان بارلىق ساۋالدارعا جاۋاپ بەردى.
ازامات قاسىم,
«ەگەمەن قازاقستان»
وسكەمەن
