الدىمەن كوممەرتسيالىق ەمەس ۇيىمداردىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ جونىندەگى زاڭ جوباسى تۋرالى ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بايانداما جاسادى. مەملەكەتتىك الەۋمەتتىك تاپسىرىستى ىسكە اسىرۋدىڭ تيىمدىلىگى مەن اشىقتىعىن ارتتىرۋ ارقىلى سالالىق زاڭنامانى جەتىلدىرۋ ماقساتىندا ازىرلەنگەن زاڭ جوباسىنىڭ نورمالارىندا وزىق ۇلگىدەگى الەمدىك تاجىريبەلەر الىنعان. «اتاپ ايتقاندا, ۇلىبريتانيا, كانادا, اقش, پولشا, فرانتسيا مەن حورۆاتيا سياقتى ەلدەردىڭ حالىقارالىق تاجىريبەسى زەردەلەندى. سونداي-اق مۇندا ماقساتتى توپتاردىڭ قاجەتتىلىكتەرىنە تالداۋ جاساۋ, زەردەلەۋ جانە ۇكىمەتتىك ەمەس ۇيىمداردىڭ ۇسىنىستارى نەگىزىندە مەملەكەتتىك الەۋمەتتىك تاپسىرىستى قالىپتاستىرۋ پروتسەسىنىڭ بىرىڭعاي تاسىلدەرى بەلگىلەندى. سونىمەن قاتار مەملەكەتتىك الەۋمەتتىك تاپسىرىس ناتيجەلەرىن باعالاۋدى ەنگىزۋ جولدارى دا جوسپارلاندى. بۇل ءادىس حالىققا كورسەتىلگەن قىزمەت ساپاسىنا قاناعاتتانۋ دەڭگەيى مەن جوبا تيىمدىلىگىن انىقتاۋعا مۇمكىندىك بەرەدى», دەدى ن.ەرمەكباەۆ.
ءمينيستردىڭ ايتۋىنشا, اتالعان زاڭ جوباسى اياسىندا ۇكىمەتتىك ەمەس ۇيىمدار كورسەتەتىن مەملەكەتتىك الەۋمەتتىك تاپسىرىستىڭ ساپاسى مەن شارتىنا, مازمۇنىنا بىرىڭعاي تالاپتار كۇشەيتىلىپ, ستاندارتتارىن بىرىزدەندىرۋ كوزدەلگەن. سول سياقتى مەملەكەتتىك الەۋمەتتىك تاپسىرىستى ىسكە اسىرۋ, گرانتتاردى ۇسىنۋ جانە سىيلىقاقىلاردى بەرۋ باعىتتارى دا ناقتىلانعان.
وتىرىستا ءماجىلىس سپيكەرى اۋىلدىق جەرلەردەگى ۇكىمەتتىك ەمەس ۇيىمدار مەن ءىرى قالالارداعى ۇيىمدار دەڭگەيىنىڭ ايىرماشىلىعى بار ەكەنىنە نازار اۋدارىپ, ارنايى كونكۋرستاردا اۋىلداعى ۇكىمەتتىك ەمەس ۇيىمداردىڭ گرانتتى دا, مەملەكەتتىك الەۋمەتتىك تاپسىرىستى دا جەڭىپ الۋى وڭايعا تۇسپەيتىندىگىن تىلگە تيەك ەتتى. «جوعارىدا اتاپ وتكەن الەۋمەتتىك ستاندارتتار دايىندالعان كەزدە مىندەتتى تۇردە اۋىلدىڭ جاعدايىن ەسكەرۋ كەرەك. سەبەبى اۋىلدىڭ دا, قالانىڭ دا ءوز ەرەكشەلىكتەرى بار. سوندىقتان ستاندارتتاردى ەنگىزگەندە وسى ەرەكشەلىكتەرگە قاراي ءتيىستى جاعداي جاسالۋى قاجەت», دەدى ن.نىعماتۋلين.
ال بۇل ماسەلەگە قاتىستى قوسىمشا باياندامانى ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى ساۋىتبەك ابدراحمانوۆ جاسادى. جالپى اتالعان زاڭ جوباسىمەن جۇمىس ىستەۋ بارىسىندا قوسىمشا «اكىمشىلىك قۇقىق بۇزۋشىلىق تۋرالى» كودەكس پەن «تۇتىنۋشىلاردىڭ قۇقىقتارىن قورعاۋ تۋرالى», «مەملەكەتتىك كورسەتىلەتىن قىزمەتتەر تۋرالى» جانە «مەملەكەتتىك جاستار ساياساتى تۋرالى» زاڭدارعا ءبىرشاما تۇزەتۋلەر ەنگىزىلگەنى ايتىلدى.
سونىمەن قاتار وتىرىس بارىسىندا ۇلتتىق ەكونوميكا ءمينيسترى تيمۋر سۇلەيمەنوۆتىڭ تانىستىرۋىمەن «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋى تۋرالى 2014 جىلعى 23 جەلتوقساندا قول قويىلعان شارتتىڭ جەكەلەگەن ەرەجەلەرىن قولدانۋ تۋرالى حاتتامانى راتيفيكاتسيالاۋ تۋرالى» زاڭ جوباسى دەپۋتاتتار تاراپىنان قولداۋعا يە بولدى. ءمينيستردىڭ مالىمدەۋىنشە, بۇل زاڭ جوباسى 2017 جىلعى 11 ساۋىردە ماسكەۋدە جاسالىپ, حاتتامانى راتيفيكاتسيالاۋعا باعىتتالعان. «ايتا كەتەيىن, وداققا ارمەنيا مەن قىرعىزستاننىڭ كىرۋىنە بايلانىستى, ەۋرازيالىق ەكونوميكالىق وداققا مۇشە ءاربىر مەملەكەتكە كەدەندىك كىرىس باجدارىنىڭ سومالارىن نورماتيۆكە سايكەس ۇلەستىرۋگە ارنالعان حاتتامانى راتيفيكاتسيالاۋ بۇگىن قارالىپ وتىرعان زاڭ جوباسىنىڭ باستى ماقساتى بولىپ تابىلادى. سوندىقتان دا قۇجات ەۋرازيالىق ەكونوميكالىق وداق تۋرالى شارتتىڭ شەڭبەرىندە ءبىزدىڭ مەملەكەتىمىز العان بىرقاتار مىندەتتەمەلەردىڭ ورىندالۋىن قامتاماسىز ەتۋ ءۇشىن قاجەت. زاڭ جوباسىمەن ۇسىنىلىپ وتىرعان حاتتاما ەكونوميكاداعى ينتەگراتسيالىق ۇدەرىستەردى دامىتۋعا جانە قاتىسۋشى-مەملەكەتتەردىڭ ارالارىندا ءوزارا ءتيىمدى سەرىكتەستىك قارىم-قاتىناستاردى ورناتۋعا مۇمكىندىك جاسايدى», دەدى ت.سۇلەيمەنوۆ.
ماجىلىستەگى ەكونوميكالىق رەفورما جانە وڭىرلىك دامۋ كوميتەتىنىڭ دەرەگىنە سۇيەنسەك, حاتتامادا ەۋرازيالىق وداققا مۇشە ءاربىر مەملەكەت ءۇشىن كەدەندىك اكەلۋ باجدارىنىڭ سومالارىن ءبولۋدىڭ نورماتيۆتەرىنە قاتىستى ەرەجەلەر قامتىلعان.
كۇن تارتىبىنە شىعارىلعان ماسەلەلەر قارالىپ بولعان سوڭ, حالىق قالاۋلىلارى ءتيىستى ۆەدومستۆو باسشىلارىنىڭ اتىنا دەپۋتاتتىق ساۋالدارىن جولدادى. ايتالىق, دەپۋتات گۇلنار بيجانوۆا حالىقتى جۇمىسپەن قامتۋدىڭ مەملەكەتتىك باعدارلاماسى اياسىندا ستارتاپ جوبالاردىڭ جۇزەگە اسۋىنا قاتىستى پروبلەمانى كوتەرسە, دەپۋتات ماگەررام ماگەرراموۆ ۇكىمەت نازارىن مامانداندىرىلعان مەكتەپتەردە نەمەسە مۇگەدەك بالالارعا ارنالعان سىنىپتاردا ساباق بەرەتىن مۇعالىمدەر ماسەلەسىنە اۋداردى. «نەگىزگى ماسەلە اتالعان ءبىلىم بەرۋ ورىندارىندا وقىتۋ پروتسەسىنە ارنالعان قاجەتتى وقۋ قۇرالدارى, سونداي-اق مۇعالىمدەر, باسقا دا ماماندار جەتىسپەيدى. ول ازداي, مۇگەدەك بالالاردىڭ ۇيىنە بارىپ وقىتاتىن مۇعالىمدەر جول شىعىندارىن ءوز قالتاسىنان تولەۋگە ءماجبۇر بولىپ كەلەدى» دەدى دەپۋتات. ال دەپۋتات كارىباي مۇسىرمان پرەمەر-مينيستر ورىنباسارى اسقار جۇماعاليەۆتىڭ اتىنا جولداعان ساۋالىندا ەل تۇرعىندارىن «ەلەكتروندى ۇكىمەت» ۆەب-پورتالىمەن جۇمىس ىستەۋگە جاپپاي ۇيرەتۋ قاجەت دەگەن ۇسىنىسىن ءبىلدىردى.
نۇرلىبەك دوسىباي,
«ەگەمەن قازاقستان»
