«SPORT» گازەتى. كەشە, بۇگىن جانە ەرتەڭ

قازاق ەلىنىڭ تاۋەلسىزدىگىنە 20 جىل تولىپ وتىرعان تولايىم كۇندەرى ءار ءىستىڭ, ءار سالانىڭ تاريحىنىڭ ەسكە ورالاتىنى زاڭدى قۇبىلىس. سونداي ۇمىتىلماس ىستەردىڭ ءبىرى – قازاقستان سپورت ءباسپاسوزىنىڭ تۇڭعىشى – رەسپۋبليكالىق «سپورت» گازەتىنىڭ دۇنيەگە كەلۋى. الداعى ەسىك قاعىپ تۇرعان 2012 جىلدىڭ 1 قاڭتارىندا بۇل وقيعاعا تۋرا 53 جىل تولادى. وسى جارتى عاسىردان اسقان ۋاقىت اياسىندا قازاق سپورتتىق ءباسپاسوزى ۇلكەن وزگەرىستەرگە ۇشىرادى. ەلىمىزدە سپورتتىق باسپاسوزدەر قاتارى ءوستى, ولار الۋان تۇردە ءوز وقىرمان, تىڭدارمان, كورەرمەندەرىنە جەتىپ تە جاتىر. بىراق سول بۇكىل ءىستىڭ التىن باستاۋى بولعان تۇڭعىش سپورتتىق ءباسپاسوزىمىز – «سپورت» گازەتىنىڭ ءجونى باسقا. راس, اراداعى 53 جىلدا «سپورت» گازەتى دە كوپتەگەن ساپالىق, ماز­مۇندىق وزگەرىستەرگە ۇشىرادى: گازەتتىڭ كولەمى ءوستى, اتى, قۇرىل­تاي­شىلارى وزگەردى... بىراق گازەتتىڭ جان-جۇرەگى, ءومىر-وزەگى بولار وقىر­مانى, سىزدەر وزگەرگەن جوقسىزدار! گازەتتەر نەبىر قيىن كەزەڭدى باسىنان وتكىزدى. تاۋەلسىزدىك العان جىلداردىڭ باسىندا قيىن ەكونوميكالىق جاعدايعا وراي گازەتتەردىڭ جىلداپ شىقپاي قالعان دا كەزدەرى بولدى. ودان بەرگى ارالىقتا دا گازەتىمىز قامقورلىقسىز قالىپ, سىزدەرمەن ۋاقىتشا قاۋىشپاعان ساتتەرى بولدى. بىراق, ءبىر جاقسىسى, ءبارى ارتتا قالدى. اسىرەسە, قازاق تىلىندەگى «سپورت ايدىنى» اتالعان گازەتىمىزدىڭ 2010 جىلدىڭ باسىنان 2011 جىلدىڭ ەكىنشى جارتىسىنا دەيىن شىقپاي قالۋى ەلىم, ۇلتىم دەگەن سەزىمى بار ءاربىر باسشى ازاماتقا سىن بولعانىن جاسىرماي ايتامىز. سپورت گازەتى جاڭاشا بوي تۇزەپ, الماتىدان استاناعا كوشىپ, اتتارىن وزگەرتىپ, ەندى قايتا توقتاماستاي بولىپ شىعىپ جاتىر, قادىرلى وقىرمان. گازەتىمىزدىڭ قازاق تىلىندەگى اتاۋىن دا سپورت قويىپ, تەك ونى لاتىن قارىپتەرىمەن ورنەكتەدىك, ياعني اتى – «Sport». ماقساتىمىز سول باياعى ۇلتتىق سەزىمگە بايلاۋدى – قازاق وقىرمانىنا, قازاق بالاسىنا ەل, الەم سپورتى قۇپيالارىن جەتكىزىپ, جەتكىنشەك ۇرپاقتىڭ قيالىن وياتۋ, تاربيە بەرىپ, سپورت الەمىنە شاقىرۋ. گازەتىمىزدە ۇلتىمىزدىڭ ساڭلاق سپورتشىلارى, الەم سپورتىنىڭ جۇلدىزدارى جايلى قىزىقتى ماقالالار جاريالانباق, نەبىر قىزىقتى ۇيىمداستىرۋ شارالارى بولماق. مىسالى, كەلەسى جىلى گازەت ۇزاق جىل جۇرگىزىپ كەلگەن «ءبىر اتانىڭ بالالارى فۋتبول وينايدى» اتتى وتباسىلىق شاعىن فۋتبول تۋرنيرلەرى ءوز جالعاسىن تاپپاق, گازەت اتىنان وزگە دە جارىستار وتكىزىلمەك. ءبىز ءوز نازارىمىزدى اسىرەسە قازاق ۇلتى كوبىرەك شوعىرلانعان اۋىلدىق جەرلەرگە بۇرماقپىز. سوندىقتان دا سىزدەردىڭ شاڭىراقتارىڭىزدا كەلەسى جىل بويى «Sport» گازەتى جاتسا دەگەن ارمان بار بىزدە. ول ءۇشىن سىزدەر «Sport» گازەتىن رەسپۋبليكالىق كاتالوگتىڭ 59-شى بەتىنەن تاۋىپ الىپ ءبىر جىلعا جازىلۋلارىڭىز كەرەك. كاتولوگتىڭ بەتىنە دەيىن ايتىپ, تاپتىشتەپ جاتقانىمىز – گازەت 2 جىلداي شىقپاي قالدى, سوندىقتان رەسپۋبليكالىق كاتالوگتەن ءتۇسىپ قالدى, سىزدەر دە ول ءجىپتىڭ ۇشىن تاپپاي قالاسىزدار ما دەگەن الاڭداۋ. ءبىزدىڭ رەسپۋبليكالىق كاتالوگتەگى يندەكسىمىز 64190 جانە 14190 (ۇجىمدار ءۇشىن). نەسىپ جۇنىسباەۆ, «Sport» گازەتىنىڭ باس رەداكتورى, قازاقستان رەسپۋبليكاسىنىڭ ەڭبەك سىڭىرگەن قايراتكەرى.