پرەمەر ماريو مونتي باستاعان يتاليا مينيسترلەر كابينەتى زاڭ شىعارۋشىلاردىڭ شەشۋشى قولداۋىنا يە بولدى.
بەيسەنبى كۇنى جاڭا تەحنوكراتتىق ۇكىمەتكە پارلامەنتتىڭ جوعارعى پالاتاسى – سەنات سەنىم كورسەتسە, جۇما كۇنى تومەنگى پالاتا ول ءۇشىن ءوز داۋىستارىن بەرمەك. سەناتتا ءسوز سويلەگەن ماريو مونتي ءوزىنىڭ داعدارىسقا قارسى رەفورمالار باعدارلاماسىن جاريالاي وتىرىپ, ەۋرونىڭ بولاشاعىنىڭ وسى باعدارلاما تابىستىلىعىنا بايلانىستى بولاتىنىن ەسكەرتتى. يتاليا زاڭنامالارىنا سايكەس ماريو مونتي كابينەتىن بەكىتۋ تومەنگى پالاتا دەپۋتاتتارىنىڭ داۋىس بەرۋىمەن اياقتالادى.
ەكى ايلىق ەرەۋىلمەن اتاپ ءوتىلدى
«ۋولل-ءستريتتى باسىپ الايىق» قارسىلىق اكتسياسىنىڭ ەكى ايلىعىنا وراي ونداعان مىڭ ادام نيۋ-يورك كوشەلەرىنە شىقتى.
اقش-تىڭ ەكونوميكالىق ساياساتىنا قارسى بەلسەندىلەر قوزعالىسىنىڭ كۇرەس جۇرگىزىپ جاتقانىنا ءدال ەكى اي تولىپ وتىر. ميتينگىلەر, مارشتار مەن ەرەۋىلدەر بارىسىندا نيۋ-يوركتە 300 ادام, لوس-اندجەلەستە – 72, چيكاگودا 40 ادام ۇستالعان. نيۋ-يوركتە بەلسەندىلەر پوليتسياعا قارسى بوس شولمەكتەر مەن باسقا دا قوقىستار لاقتىرىپ, ولارعا بۇرىشتى گاز شاشقان. 10 ەرەۋىلشى مەن 7 پوليتسەي زارداپ شەكتى دەگەن مالىمەت بار.
اق ءۇيدى اتقان ادام تۇتقىندالدى
اقش-تا ايداحو شتاتىنىڭ 21 جاسار تۇرعىنى وسكار ورتەگا-ەرناندەسكە سوت اقش پرەزيدەنتى باراك وبامانى ولتىرمەك بولدى دەگەن ايىپ تاقتى.
ايىپتاۋ نۇسقاسى بويىنشا و.ورتەگا-ەرناندەس 2011 جىلدىڭ 11 قاراشاسىندا اق ۇيگە قاراي ەكى رەت وق اتقان. ناتيجەسىندە ءبىر وق بروندى اينەككە تيسە, ەكىنشىسى قابىرعاعا تيگەن. ول ۋاقىتتا ب.وبامانىڭ ءوزى دە, ونىڭ زايىبى ميشەل دە اق ۇيدە بولماعان كورىنەدى. اتىلعان وقتان ەشكىم زارداپ شەككەن جوق.
سيرياعا قارسى جاڭا شەشىم
اراب مەملەكەتتەرى ليگاسىنا كىرەتىن ەلدەردىڭ راباتتا وتكەن سىرتقى ىستەر مينيسترلەرى ماجىلىسىندە سيرياعا قارسى جاڭا شەشىم قابىلداندى.
ءىس جۇزىندە سيريا باسشىلىعىنا 3 كۇن مەرزىم ىشىندە ءوز اۋماعىنا قۇقىق قورعاۋشىلار عانا ەمەس, سونىمەن بىرگە, اسكەريلەر ۇسىنعان 500 باقىلاۋشىنى دا جىبەرۋ تۋرالى ۋلتيماتۋم قويىلىپ وتىر. ولار «اساد رەجىمىنىڭ قاراپايىم ازاماتتارعا قارسى كۇش كورسەتۋدى توقتاتۋىنا» باقىلاۋ جاساۋى ءتيىس. مۇنىڭ ءوزى سيريا ەگەمەندىگىنە اشىق تۇردە قىسىم جاساۋ بولىپ تابىلادى. سوندىقتان داماسكىنىڭ وعان كەلىسە قويۋى كۇماندى.
پاپانى جارنامالاۋعا تىيىم سالىندى
ۆاتيكاننىڭ قىسىمىمەن يتاليالىق كيىم شىعارۋشى Benetton كومپانياسى پاپا بەنەديكت حVI مەن ەگيپەتتىڭ ءال-ازحار مەشىتى يمامىنىڭ ءسۇيىسىپ تۇرعان سۋرەتىن جارنامادا پايدالانۋدى توقتاتتى.
وتكەن سارسەنبى كۇنى ۆاتيكان دىنگە سەنۋشىلەردىڭ سەزىمدەرىن قورلايتىن فوتومونتاجدى جارنامالىق ناۋقان ءۇشىن پايدالانۋعا قارسىلىق بىلدىرگەن بولاتىن. پونتيفيكتىڭ وكىلى كاردينال فەدەريكو لومباردي سۋرەتتى پاپا قاسيەتىن ورەسكەل قورلاۋشىلىق جانە قاراپايىم ادەپتىلىك ەرەجەلەرىن بۇرمالاۋشىلىق دەپ باعالادى. يتاليانىڭ كاتوليكتىك قوعامداستىعى وكىلدەرى دە نارازىلىق ءبىلدىرىپ وتىر. ازىرگە مۇسىلمان الەمى داۋلى جارناماعا قاتىستى ءتىس جارعان جوق. اراب الەمى يتاليالىق كاتوليكتەرگە قاراعاندا توزىمدىرەك بولىپ شىقتى.
گرۋزيا رەسەي تىلەگىن قاناعاتتاندىردى
گرۋزيا پرەزيدەنتى ميحايل سااكاشۆيلي رەسەيدىڭ بۇكىلالەمدىك ساۋدا ۇيىمىنا وتۋىنە بايلانىستى گرۋزيا مەن رەسەي ۇكىمەتتەرى اراسىنداعى كەلىسىمدى بەكىتتى.
9 قاراشا كۇنى رەسەي مەن گرۋزيا جەنەۆادا شۆەيتساريانىڭ ارااعايىندىعىمەن رەسەيدىڭ بسۇ-عا وتۋىنە ەڭ سوڭعى كەدەرگىنى جوياتىن ۇكىمەتارالىق كەلىسىمدەر پاكەتىنە قول قويعان بولاتىن. ولاردىڭ ءبىرى ابحازيا مەن وڭتۇستىك وسەتيا اۋماقتارى بويىنشا تاۋار اينالىمىنا حالىقارالىق مونيتورينگ جۇرگىزۋگە قاتىستى. ەكىنشى ماسەلەگە سايكەس مونيتورينگ جۇرگىزەتىن كومپانيا بەيتاراپ جاق – شۆەيتسارياعا ەسەپ بەرەتىن بولادى.
توننەلدەن تابىلعان ماريحۋانا
پوليتسيا امەريكانىڭ كاليفورنيا شتاتى مەن مەكسيكانىڭ تومەنگى كاليفورنيا شتاتىن جالعايتىن ءىرى توننەلدى انىقتاعان.
وندا كەم دەگەندە 15 توننا بولاتىن ماريحۋانا تابىلعان كورىنەدى. اقش-تىڭ كوشى-قون جانە كەدەن پوليتسياسى وكىلىنىڭ ايتۋىنشا, 370 مەترلىك توننەل امەريكانىڭ سان-ديەگو قالاسى ماڭىنداعى قويمانى مەكسيكانىڭ تيحۋانا قالاسىنداعى قويمامەن جالعاستىرعان. توننەل جەلدەتكىش جۇيەسىمەن جانە جارىقپەن جاراقتاندىرىلعان كورىنەدى.
پرەزيدەنت سايلاۋى وتپەيتىن بولدى
مولدوۆادا وسىعان دەيىن جوسپارلانعان ەل پرەزيدەنتى سايلاۋى وتپەيتىن بولدى.
وعان پارلامەنت دەپۋتاتتارىنىڭ مەملەكەت باسشىسى كانديداتۋراسىن بەلگىلەۋدە ءوزارا كەلىسە الماۋى سەبەپكەر بولىپ وتىر. ازىرگە مۇمكىن دەگەن كانديداتتاردىڭ ءبىر دە ءبىرى سايلانۋ ءۇشىن قاجەتتى داۋىس جيناي الماعان. وسىلايشا مەملەكەت باسشىسىن سايلايتىن كۇن جاڭادان تاعايىندالماق. مولدوۆانىڭ پرەزيدەنتسىز ءومىر ءسۇرىپ جاتقانىنا 11 قىركۇيەكتە 2 جىل تولدى. بۇل الەمدىك رەكورد بولىپ سانالادى.
شوپينگ ءۇشىن ۇزدىك قالا اتاندى
كيەۆ ەۋروپاداعى شوپينگ-ءتۋريزمنىڭ ەڭ ۇزدىك قالالارى رەيتينگىنە ەندى.
زەرتتەۋ جۇرگىزىلگەن 33 تانىمال قالالاردىڭ ىشىندە كيەۆ 26-شى ورىن العان. ول ءتىپتى ۆارشاۆا مەن سانكت-پەتەربۋرگ سياقتى قالالاردى دا ارتتا قالدىرعان. تەك 19-شى ورىن العان ءماسكەۋ عانا كيەۆتەن وزىپ تۇر. كيەۆ دۇكەندەرىنىڭ ۇزاق جۇمىس ىستەۋى جانە جەڭىلدىكتەردىڭ كوپ بولۋى ارقىلى وسىنداي ناتيجەگە جەتكەن.
ينتەرنەت ماتەريالدارى نەگىزىندە ازىرلەندى.
