تاربيە جۇمىسىن جاقسارتۋ, اسكەري ءتارتىپ پەن قۇقىق ءتارتىبىن نىعايتۋ, اسكەري قىزمەتشىلەردىڭ جانە ولاردىڭ وتباسى مۇشەلەرىنىڭ الەۋمەتتىك-قۇقىقتىق قورعانىسى ءۇشىن جاۋاپكەرشىلىكتى كوتەرۋ ماقساتىندا قۇرىلعان بۇل قۇرىلىم بۇگىندە جەكە قۇرامدى وقىتۋ مەن پاتريوتتىق تاربيەلەۋ جۇيەسىندە ماڭىزدى ورىنعا يە. ارمياداعى وتكىزىلەتىن تاربيە جۇمىسىنىڭ ساپاسى مەن دەڭگەيىنە ارقاشان دا قاتاڭ تالاپتار قويىلىپ كەلەدى. ويتكەنى تاربيە جۇمىسى ورگاندارىن قۇرۋ قارۋلى كۇشتەردىڭ قالىپتاسۋ ءداۋىرىنىڭ اجىراماس بولىگى.
قۇرىلعان ساتتەن باستاپ تاربيە قۇرىلىمدارىنىڭ وفيتسەرلەرى كومانديرلەرمەن جانە شتابتارمەن بىرلەسە وزدەرىنىڭ ماقساتتى قىزمەتىمەن اسكەري ۇجىمداردى بىرىكتىرۋگە, اسكەري قىزمەتتىڭ بەدەلى مەن ءيميدجىن نىعايتۋعا باعىتتالعان مىندەتتەردى ىسكە اسىرۋ سالاسىندا اۋقىمدى جۇمىستار اتقاردى. تاربيەشى-وفيتسەرلەر بۇگىنگى كۇندە اقپاراتتىق-تاربيە, يدەولوگيالىق, مادەني-دەمالىس, بۇقارالىق-سپورتتىق جانە اسكەري-الەۋمەتتىك جۇمىس جۇيەسى ارقىلى جاۋىنگەرلىك جارىستى ۇيىمداستىرۋعا جانە اسكەري ۇجىمداردى جۇمىلدىرۋعا بەلسەنە اتسالىسادى. ارينە, قارۋلى كۇشتەردىڭ قالىپتاسۋى مەن دامۋىنىڭ ەڭ قيىن كەزەڭدەرىندە قىزمەتتى تاستاپ كەتپەگەن اسا قۇرمەتتى ارداگەرلەرىمىزدىڭ ەسىمى ەرەكشە اتاپ وتۋگە لايىق. ولاردىڭ قاتارىندا ناعىز گەنەرالدار مەن وفيتسەرلەر, ادال پاتريوتتار, ءوز ءىسىنىڭ حاس شەبەرلەرى بار. ماسەلەن, گەنەرال ايتقالي ەسەنعۇلوۆ, مارات ناعۇمانوۆ, ۆلاديمير بوندارەنكو, پولكوۆنيك مەلس شامپيەۆ, قايىرجان بايجىگىتوۆ, گالي گابدۋللين, قازبەك مامسۇروۆ, باستيمي دۇيسەمباەۆ, بولات ءنازىروۆ, امانگەلدى ىبىراەۆ, سەرىكقان قايىرقانوۆ سىندى ەلىمىزدىڭ قورعانىس قابىلەتىن نىعايتۋعا ۇلكەن ۇلەس قوسقان ارداگەرلەر. گەنارال-لەيتەنانت مۇرات جالەل ۇلى مايكەەۆ قورعانىس ءمينيسترىنىڭ ءبىرىنشى ورىنباسارى – قك باس شتابىنىڭ باسشىسى رەتىندە وسى لەكتى جالعاستىرىپ كەلەدى.
بۇگىنگى تاڭدا پاتريوتيزم ولشەمدەرى جالپىۇلتتىق مىندەتتەر قاتارىندا. سوندىقتان دا تاربيە قۇرىلىمدارى وفيتسەرلەرىنىڭ باستى مىندەتتەرىنىڭ ءبىرى – جەكە قۇرامعا ەلباسىنىڭ «رۋحاني جاڭعىرۋ» باعدارلاماسىن ءتۇسىندىرۋ بولىپ تابىلادى.
سونىمەن قاتار بيىلعى جولداۋىندا مەملەكەت باسشىسى ءبىزدىڭ قوعامنىڭ يدەالى ءوز تاريحىن, ءتىلىن, مادەنيەتىن بىلەتىن, الدىڭعى قاتارلى جانە جاھاندىق كوزقاراسى بار قازاقستاندىق بولۋى ءتيىس ەكەنىن اتاپ ءوتتى.
وسى ورايدا بۇگىنگى كۇنى قارۋلى كۇشتەردە تاربيە جانە يدەولوگيالىق جۇمىس ورگاندارى قۇرىلىمى قۇرىلدى. ولاردىڭ مارتەبەسى جوعارىلادى, قارۋلى كۇشتەردىڭ بارلىق تۇرلەرىندە, وڭىرلىك قولباسشىلىقتاردا باس قولباسشىلاردىڭ جانە قولباسشىلاردىڭ ءتيىستى ورىنباسارلارى باسقاراتىن تاربيە جانە يدەولوگيالىق جۇمىستار باسقارمالارى, بولىمدەرى قىزمەت اتقارادى. قارۋلى كۇشتەردە پسيحولوگيالىق جانە الەۋمەتتىك جۇمىستى جاقسارتۋ, اسكەري بولىمدەر مەن مەكەمەلەردە اسكەري ءتارتىپ پەن قۇقىق ءتارتىبىن قامتاماسىز ەتۋ ءۇشىن اسكەري بولىمدەر مەن باتالونداردىڭ پسيحولوگى لاۋازىمى ەنگىزىلدى. سول سياقتى يدەولوگيالىق جۇمىس بەلسەندىلىگىن ارتتىرۋ مەن ارميا ورتاسىنا سىڭارجاق يدەيالاردى كىرگىزبەۋ جونىندەگى جۇمىستى ۇيىمداستىرۋ ءۇشىن يدەولوگيالىق جۇمىس جانە ارنايى ناسيحات جونىندەگى وفيتسەرلەر لاۋازىمى تاعايىندالدى.
بۇگىندە تاربيە جۇمىسى ورگاندارىنىڭ وزەكتى ماسەلەلەرىنىڭ ءبىرى اسكەري قىزمەتشىلەردىڭ وتباسىلارىندا مورالدىق-ونەگە جاعدايىن قۇرۋ بولىپ تابىلادى. ول جەكە قۇرامنىڭ مىندەتتەردى ورىنداۋىنا اسەر ەتەتىنى ءسوزسىز. وسىعان بايلانىستى قورعانىس ءمينيسترى, گەنەرال-پولكوۆنيك ساكەن جاسۇزاقوۆتىڭ باستاماسى بويىنشا اسكەري باسقارۋ ورگاندارىندا, اسكەري بولىمدەردە اسكەري قىزمەتشىلەردىڭ وتباسىلارىمەن جۇمىس جونىندەگى لاۋازىم (ايەلدەر كەڭەسى), ارداگەرلەرمەن جۇمىس جاساۋ جونىندە ءبولىم ەنگىزىلدى, اسكەري بولىمدەر مەن مەكەمەلەردە العاشقى ارداگەرلەر ۇيىمى قۇرىلدى. مۇنىڭ ءبارى دە ءارتۇرلى ماسەلەلەردى بىرلەسە شەشۋ ارقىلى ۇرپاقتاردىڭ ساباقتاستىعىن قامتاماسىز ەتەدى, ونسىز قارۋلى كۇشتەردىڭ ودان ءارى دامۋىن ەلەستەتۋ قيىن. اسكەري-پاتريوتتىق تاربيەلەۋدەگى باي تاجىريبەنىڭ قاينار كوزى رەتىندە ارداگەرلەرىمىز اسكەري ۇجىمداردىڭ قوعامدىق ومىرىنە بەلسەندى قاتىسۋدا.
سونىمەن قاتار تاربيە جۇمىسى ورگاندارى قىزمەتىنىڭ باسىم باعىتتارىنىڭ ءبىرى اسكەري قىزمەتشىلەر مەن وسكەلەڭ ۇرپاقتى «ماڭگىلىك ەل» جالپىۇلتتىق يدەياسى رۋحىندا تاربيەلەۋ بولىپ تابىلادى.
جاستار ۇيىمدارى, اسكەري-پاتريوتتىق كلۋبتاردىڭ قىزمەتىن ۇيلەستىرۋ ماقساتىندا ۇلتتىق اسكەري-پاتريوتتىق ورتالىقتىڭ بازاسىندا بارلىق وڭىرلەردەگى فيليالدارىمەن ەلىمىزدەگى اسكەري-پاتريوتتىق قوزعالىستىڭ ورتالىق ورگانى بولعان «جاس سارباز» رەسپۋبليكالىق بالالار مەن جاسوسپىرىمدەر اسكەري-پاتريوتتىق قوزعالىسى قۇرىلدى. بۇگىندە ۇيىم قاراماعىنداعى كلۋبتاردىڭ سانى 2 828 دەيىن ءوستى, ال بالالاردى قامتۋى 73 164-كە جەتتى جانە اسكەري بولىمدەر جانىندا 150 كلۋب قۇرىلىپ, ونىڭ اياسىندا 4 361 بالا قامتىلدى. «جاس سارباز» قوزعالىسى باسقا مەملەكەتتىك ورگاندارمەن جانە قوعامدىق قوزعالىستارمەن بىرلەسە رەسپۋبليكا اۋقىمىندا جاستاردى اسكەري-پاتريوتتىق تاربيەلەۋ بويىنشا 130-دان استام ءتۇرلى ءىس-شارا ۇيىمداستىردى. سونداي-اق مەكتەپتەردە پاتريوتتىق تاربيە بەرۋ ءىسىن ۇيىمداستىرۋ جەلىسى كەڭەيتىلدى. وسىلايشا, اسكەري-پاتريوتتىق كلۋبتاردىڭ ءاربىر ءتورتىنشى تاربيەلەنۋشىسى ءوز ءومىرىن اسكەرمەن بايلانىستىرادى دەۋگە نەگىز بار. كورسەتىلگەن ءىس-شارالار اسكەري ۇجىمداردا مورالدىق-پسيحولوگيالىق جاعدايدى ساۋىقتىرۋعا, اسكەرگە دەيىنگى جاستاردى اسكەري-پاتريوتتىق تاربيەلەۋگە سەبەپشى بولدى.
مۇحامەدجان تالاسوۆ,
قازاقستان قارۋلى كۇشتەرى باس شتابى باستىعىنىڭ ورىنباسارى, گەنەرال-مايور
