جيىن بارىسىندا سپيكەر ەلباسىنىڭ نيۋ-يورك پەن ۆاشينگتونعا جاساعان ساپارى قازاقستانداعى عانا ەمەس, اقش-تاعى ساياسي ماۋسىمنىڭ شىمىلدىعىن اشقان ساپار بولعانىن تىلگە تيەك ەتتى.
«سەبەبى ەلباسى ساپارى 2018 جىلعى اقش استاناسىنا شەتەل كوشباسشىلارى تاراپىنان جاسالعان العاشقى ساپار بولىپ تابىلادى. ساپار بارىسىندا ن.نازارباەۆتىڭ جۇمىس باعدارلاماسى تىعىز بولدى. وزدەرىڭىزگە ءمالىم, پرەزيدەنت اقش باسشىسىمەن جەكە كەزدەسۋمەن قاتار, كەڭەيتىلگەن قۇرامداعى كەلىسسوزدەر وتكىزدى. بۇل ساپار – قازاقستان – اقش قارىم-قاتىناسى تاريحىنداعى بەتكە ۇستار ەلەۋلى وقيعالاردىڭ ءبىرى. نەگە دەسەڭىزدەر, ەكىجاقتى كەزدەسۋ ناتيجەسى بويىنشا قابىلدانعان بىرلەسكەن مالىمدەمە – بۇل قازاقستان مەن اقش-تىڭ ءححى عاسىرداعى كەڭەيتىلگەن ستراتەگيالىق ارىپتەستىگى جونىندەگى ماڭىزدى قۇجات. بىرلەسكەن مالىمدەمەدە ەكىجاقتى قارىم-قاتىناستاردىڭ وزەكتى ماسەلەلەرىمەن قاتار, كوپتەگەن حالىقارالىق پروبلەمالار قامتىلدى. الداعى ۋاقىتتا قارىم-قاتىناسىمىز قارقىندى داميتىنىنا سەنىمدىمىن», دەدى ەرجان اشىقباەۆ.
جۋرناليستەردىڭ قويعان سۇراعىنا وراي سپيكەر ەكى ەل اراسىنداعى ۆيزالىق جەڭىلدىكتەر ماسەلەسىنە دە توقتالىپ ءوتتى.
«ۆيزالىق جەڭىلدىكتەر بويىنشا ايتار بولساق, قازىرگى تاڭدا قازاقستان ازاماتتارى امەريكا قۇراما شتاتتارىنا 10 جىلدىق ۆيزالار الۋعا قۇقىلى. ءبىز امەريكالىق ارىپتەستەرمەن 2016 جىلدان باستاپ ەكىجاقتى نەگىزدە 10 جىلدىق ۆيزالار بەرۋ جونىندە ۋاعدالاستىققا قول جەتكىزگەن بولاتىنبىز. بۇل تۇرعىداعى باسىمدىق قازاقستاندىق بيزنەس وكىلدەرىنە, وقۋشىلارعا, تۋريستەرگە بەرىلەدى», دەدى سىرتقى ىستەر ءمينيسترىنىڭ ورىنباسارى.
سونىمەن قاتار ەرجان اشىقباەۆ اۋعانستاننىڭ كابۋل قالاسىندا بولعان تەررورلىق شابۋىلعا قاتىستى پىكىر ءبىلدىردى.
«كابۋلداعى «ينتەركونتينەنتال» قوناق ۇيىنە جاسالعان تەرروريستەردىڭ شابۋىلىنان قازاقستان ازاماتى قازا بولدى. 1978 جىلى تۋعان استانا قالاسىنىڭ تۇرعىنى اۋعانستاندا ىسكەرلىك ماقساتىمەن, دالىرەك ايتساق, تەلەكوممۋنيكاتسيا سالاسىندا جۇمىس ىستەپ جاتقان ءبىر اۋعان كومپانياسىنىڭ شاقىرتۋىمەن بارعان. قازىرگى تاڭدا ءبىزدىڭ ديپلوماتتارىمىز مەرت بولعان ازاماتىمىزدىڭ دەنەسىن قازاقستانعا جەتكىزۋ ماسەلەسىمەن اينالىسۋدا. ءبىزدىڭ اقپارات بويىنشا, ول كىسى اۋعانستانعا قازان نە, قاراشا ايىندا بارعان», دەدى ول.
راۋان قايدار,
«ەگەمەن قازاقستان»
