ۇكىمەتتىڭ ءباسپاسوز ورتالىعىندا ۇيىمداستىرىلعان جيىندا ەنەرگەتيكا مينيسترلىگىنىڭ وتكەن جىلعى دامۋ قورىتىندىلارى جانە الداعى جوسپارلارى تۋرالى ايتىلعان بولاتىن. مينيستر وندا پاۆلودار مۇناي-حيميا زاۋىتىندا جاڭعىرتۋ جوباسى جۇزەگە اسىرىلعانىن, سونداي-اق اتىراۋ مۇناي وڭدەۋ زاۋىتىن جاڭعىرتۋ جوبالارىنىڭ قۇرىلىسى اياقتالعانىن, قازىرگى ۋاقىتتا زاۋىتتا ىسكە قوسۋ-جوندەۋ جۇمىستارى ءجۇرىپ جاتقانىن اتاپ ءوتتى.
«2017 جىلى وتىن-ەنەرگەتيكا سەكتورىنىڭ سالالارى رەكوردتىق كورسەتكىشتەرگە قول جەتكىزدى دەۋگە بولادى», دەدى مينيستر.
ق.بوزىمباەۆتىڭ ايتۋىنشا, وتكەن جىلدا گاز ءوندىرۋ كولەمى شامامەن 53 ملرد تەكشە مەتر نەمەسە جوسپاردىڭ 110 پايىزىن قۇراعان. وعان قوسا 2017 جىلى 102,3 ملرد كۆساع ەلەكتر ەنەرگياسى, 106,7 ملن توننا كومىر وندىرىلگەن. 2017 جىلدىڭ قورىتىندىسى بويىنشا گازداندىرۋ دەڭگەيى – 47,38 پايىز.
بريفينگتە ق.بوزىمباەۆ مەملەكەت باسشىسىنىڭ جولداۋدا بەلگىلەگەن مىندەتتەرىن ەسكەرە وتىرىپ, 2018 جىلعا جوسپارلار تۋرالى دا ايتىپ بەردى. ءمينيستردىڭ ايتۋىنشا, پرەزيدەنتتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىنا سايكەس ەنەرگەتيكا مينيسترلىگىنىڭ نەگىزگى تاكتيكالىق مىندەتتەرىنىڭ ءبىرى رەسۋرستىق الەۋەتتى ودان ءارى دامىتۋ بولىپ تابىلادى. ول ءۇشىن باستى قۇرال – جەر جانە جەر قويناۋىن پايدالانۋ تۋرالى كودەكس, ونىڭ نورمالارى 2018 جىلعى شىلدەدەن باستاپ كۇشىنە ەنەدى. قازىر زاڭعا سايكەس بارلىق نورماتيۆتىك-قۇقىقتىق بازا پىسىقتالۋدا.
«جەر قويناۋىن پايدالانۋ سالاسىندا سالىق ساياساتى جەتىلدىرىلدى. بيىلعى جىلدىڭ 1 قاڭتارىنان باستاپ جاڭا سالىق كودەكسى كۇشىنە ەندى. كودەكستەردى قابىلداۋ جانە بارلىق قاراستىرىلعان نورمالاردى ىسكە اسىرۋ مۇناي-گاز كەشەنىنىڭ ستراتەگيالىق ماڭىزىن ساقتاپ قالۋعا مۇمكىندىك بەرەدى», دەدى مينيستر. سونىمەن قاتار ول بيىل سۇيىلتىلعان مۇناي گازى نارىعىندا شەكتىك باعانى مەملەكەتتىك رەتتەۋدەن كەزەڭ-كەزەڭمەن شىعارۋ ءۇشىن ەلەكتروندى ساۋدا الاڭىن ەنگىزۋ جوسپارلانعانىن اتاپ ءوتتى. بۇل باعا بەلگىلەۋ جانە سۇيىلتىلعان مۇناي گازىن ءبولۋ تەتىگىن جەتىلدىرۋگە مۇمكىندىك بەرمەك. قاجەتتى زاڭنامالىق نورمالار 2018 جىلعى جەلتوقسانعا دەيىن پىسىقتالادى.
«استانانى گازداندىرۋ ماسەلەسى وتە وزەكتى, سوندىقتان قارجىلاندىرۋ ۇلگىسى مەن كوزىن پىسىقتاۋ جالعاسادى. مۇناي-گاز سالاسىندا پوليپروپيلەن ءوندىرىسى جوباسى بويىنشا قۇرىلىس جۇمىستارى باستالادى, دەدى مينيستر.
ەلەكتر ەنەرگەتيكاسى سالاسىندا «100 ناقتى قادام» ۇلت جوسپارىنىڭ 51-قادامىندا سەنىمدىلىك پەن ەنەرگيامەن قامتاماسىز ەتۋ سىزباسىن جەڭىلدەتۋ ماقساتىندا وڭىرلەردە ەنەرگيا جەتكىزۋشى ۇيىمداردى ىرىلەندىرۋ قاراستىرىلعان.
بۇل رەتتە ق.بوزىمباەۆ 2018 جىلى 15 ەنەرگيا جەتكىزۋشى ۇيىم ءوز قىزمەتتەرىن توقتاتۋى تيىستىگىن, جالپى ەنەرگيا جەتكىزۋشى ۇيىمداردىڭ سانى 2022 جىلعا قاراي 30 پايىزعا, ياعني 160-تان 110-عا دەيىن قىسقارادى دەپ كۇتىلۋدە ەكەندىگىن اتاپ ءوتتى.
مالىمەتكە سۇيەنسەك, «نۇرلى جول» باعدارلاماسى اياسىندا سەمەي – اقتوعاي – تالدىقورعان – الماتى ورامىنداعى ءشۇلبى گەس-ءنىڭ 500 كۆ جەلىسى قۇرىلىسىنىڭ ءىى كەزەڭى اياقتالادى. وسىلايشا «سولتۇستىك – شىعىس – وڭتۇستىك» وڭىرارالىق جوباسى 2018 جىلدىڭ سوڭىنا قاراي تولىعىمەن ىسكە قوسىلادى. جوبا شقو مەن الماتى وبلىسىنىڭ ەلەكتر ەنەرگياسى تاپشىلىعىن قامتۋعا جانە ەنەرگەتيكالىق تاۋەلسىزدىكتى نىعايتۋعا باعىتتالعان.
دينارا بىتىك,
«ەگەمەن قازاقستان»
