ولاردىڭ سوزىنشە, بۇل – ازيا قۇرلىعى ديزاينەرلەرىنىڭ ەڭ ءساندى كيىمدەرىن تاماشالاۋ ءۇشىن كوپتەگەن ءسان بىلگىرلەرىنىڭ باسىن قوساتىن ەڭ مارتەبەلى ءىس-شارا بولماق. «رۋحاني جاڭعىرۋ» باعدارلاماسى اياسىندا وتەتىن وسى ءسان كورسەتىلىمىندە ءوز كيىمدەر توپتاماسىن Aida KaumeNOVA, Naiyl Baikuchukov, Bibisara, Dinara Satzhan سىندى قازاقستاندىق ديزاينەرلەر ۇسىنادى.
دينارا ءساتجاننىڭ ايتۋىنشا, وتاندىق ديزاينەرلەر وسىمەن ەكىنشى رەت توپتاسىپ شەتەلدە كورسەتىلىمگە شىعادى. وتكەن جىلدىڭ قازان ايىندا ديزاينەرلەر Mercedes-Benz Fashion Week Russia اياسىندا رەسەيدىڭ تورىندە ءوز جۇمىستارىن تابىستى تۇردە كورسەتكەن بولاتىن.
ايدا قاۋمەنوۆا قازاقستاندىق ديزاينەرلەر ءسان ارقىلى ۇلتتىق كودتى جەتكىزە الاتىنىن العا تارتتى.
«بۇل – ءوز ەلىن وزگە مەملەكەتتەردە لايىقتى تۇردە تانىستىرا الاتىن ديزاينەرلەردىڭ جەكە باستاماسى بولىپ وتىر», دەدى ول.
نايل بايكۋچۋكوۆ بولسا پاريج ساxناسىندا ۇلكەن اسەر تۋعىزاتىندىعىنا سەنىمدى. ويتكەنى ءاربىر ديزاينەر كورسەتىلىمگە ارنايى توپتاما ازىرلەۋدە. ماسەلەن, ايدا قاۋمەنوۆا پاريجدەگى كورسەتىلىمدە ءسان ءۇيىنىڭ ديزاينەرلەرى ارنايى ازىرلەگەن ەكسكليۋزيۆتى اۆتورلىق ورنەگى بار بارقىت توپتاماسىن ۇسىنادى. توپتامانىڭ نەگىزگى بۇيىمى – قازاقتىڭ ەجەلگى ۇلتتىق كيىمى شاپان-سىرماق بولماق. ال نايل بايكۋچۋكوۆ پاريجدە ليۋنەۆيل كەستەلى توپتاماسىن دايىندايدى. بۇل ەرتەگى الەمىندەگىدەي اسەر قالدىراتىن تيۋل مەن شيفوننان تىگىلگەن كويلەكتەر. ولاردىڭ سوزىنشە ءسان كورسەتىلىمىنە بارلىعى 80 ديزاينەر قاتىسادى.
راۋان قايدار,
«ەگەمەن قازاقستان»
