ەشكىمنىڭ قىسقى وليمپياداعا جولدامانى تەگىن تاراتپايتىنى تۇسىنىكتى. ەكى ليتسەنزيا. تىكەلەي تۇرسىنباەۆانىڭ ارقاسىندا. بىلتىر حەلسينكيدە وتكەن الەم بىرىنشىلىگىندە ەليزابەت جاقسى ونەر كورسەتتى. وزىنە عانا ەمەس, ەلىنە دە جولدامانى ج ۇلىپ الىپ بەردى. بۇل سپورت تۇرىنەن بىزدە بۇرىن-سوڭدى بولماعان جەتىستىك. تاريحي. مىقتىلارمەن سايىستى. بۇرىن وزگەلەردىڭ ونەرىن كورىپ, تەلەديدارعا تەلمىرىپ وتىرۋشى ەدىك. ەندى تۇرسىنباەۆاعا جانكۇيەر بولامىز. تاعى ءبىر قىزىمىز پحەنچحانعا بارادى.
تۇرسىنباەۆا ماسكەۋدە تۋىپ- وسكەن. مۇز ايدىنىنداعى العاشقى قادامدارى رەسەي استاناسىمەن بايلانىستى. العاشقى باپكەرى – يرينا ستراحوۆا. سىرعاناۋدىڭ سىرلارىن ۇيرەتكەندەردىڭ قاتارىندا ناتاليا دۋبينسكايا مەن الەكساندر شۋبين بار. كەيىنىرەك ەليزابەت ەتەري تۋتبەريدزەدەن ءتالىم الدى. تۋتبەريدزە – تالاي مىقتىلاردى تاربيەلەگەن تالىمگەر. تاجىربيەلى مامان قازاق قىزىنىڭ دا بيىكتەردەن كورىنۋىنە كوپ تەر توكتى. 2013 جىلى جاسوسپىرىمدەر اراسىندا ماسكەۋ بىرىنشىلىگىندە ەليزابەت تۇرسىنباەۆا جەڭىمپاز اتاندى. وڭاي بولعان جوق. ماسكەۋ بىرىنشىلىگىندە چەمپيون بولۋ الەم بىرىنشىلىگىندە جەڭىسكە جەتۋمەن پارا-پار. سول جىلى مينسكىدە وتكەن گران-پري جارىسىندا جۇلدەگەر بولدى. ماسكەۋدىڭ مانەرلەپ سىرعاناۋ مەكتەبىنەن وتكەن قازاق قىزىنىڭ جەڭىستى جولى جالعاسا بەردى.
رەسەي ۇلتتىق قۇراماسىنا شاقىرتۋ الدى. اكەسىنىڭ ارمانى باسقا بولاتىن. بايتاق تۇرسىنباەۆ قىزىنىڭ تاريحي وتانىنىڭ نامىسىن قورعاعانىن قاتتى قالادى. 2014 جىلدان باستاپ ەليزابەت حالىقارالىق جارىستاردا قازاقستاننىڭ اتىنان شىعا باستادى. ەليزابەتتى ەلگە الدىرۋدا قىزىلوردا وبلىسىنىڭ اكىمى قىرىمبەك كوشەرباەۆتىڭ كۇش سالعانىن اتاپ ايتقان ءجون. قىرەكەڭ كوپ قولداۋ كورسەتكەن. قارجىلىق, باسقا دا قيىندىقتاردىڭ شەشىلۋىنە اتسالىسىپتى. ىشكى بىرىنشىلىكتەردە سىر ەلىنىڭ اتىنان شىعىپ ءجۇر.
2014-2017 جىلدارى مانەرلەپ سىرعاناۋدان قازاقستان بىرىنشىلىگىنىڭ جەڭىمپازى اتاندى. ەلىمىزدە قىزداردان تۇرسىنباەۆاعا تەڭ كەلەتىن سىرعاناۋشى ازىرگە جوق. 2016 جىلى ليللەحامەر قالاسىندا وتكەن جاسوسپىرىمدەر اراسىندا الەم چەمپيوناتىنىڭ قولا جۇلدەگەرى بولدى. 2017 جىلعى ازيا چەمپيوناتىنىڭ قولا جۇلدەگەرى. ازىرگە قولانى قاناعات تۇتىپ ءجۇرمىز. بىلتىر حەلسينكيدە وتكەن الەم بىرىنشىلىگىندە ەركىن باعدارلامادا 126,51 ۇپاي ەنشىلەپ, قوسسايىس قورىتىندىسى بويىنشا 191,99 ۇپايمەن 9-ورىنعا يە بولدى. پحەنچحانعا ەكى جولدامانى سوندا جەڭىپ العان.
ەلىن عانا ەمەس, اتا-اناسىن دا قاتتى قۋانتتى. سەنىمىن اقتادى. جولداما الۋ جولىندا تالاي قيىندىقتان ءوتتى. حالىقارالىق جارىستارعا تۇراقتى قاتىسۋ ءۇشىن قوماقتى قارجى عانا ەمەس, قاسىڭدا جانكەشتى قولداۋشىڭ بولۋ كەرەك. اتا-اناسى قىزدارىن جارىستاردا جالعىزسىراتپاپتى. «جەتىستىكتەرىمنىڭ بارلىعى – اتا-انامنىڭ قولداۋىنىڭ ناتيجەسى», دەيدى ەليزابەت.
بۇگىندە تۇرسىنباەۆا تورونتا قالاسىندا اتاقتى باپكەر برايان ورسەرانىڭ قول استىندا جاتتىعىپ ءجۇر. كانادالىق باپكەر بۇعان دەيىن 2 وليمپيادا چەمپيونىن تاربيەلەدى. ەندىگى باستى ماقسات – پحەنچحاندا ەل نامىسىن ابىرويمەن قورعاۋ. سۇحباتتارىنىڭ بىرىندە قارشاداي قىز «ارمانىم وليمپيادا, الەم بىرىنشىلىكتەرىندە توپ جارۋ» دەگەن بولاتىن. قىسقى وليمپيادادا قازاق قىزى تۇعىرعا قونسا دەگەن ارمانىمىزدى جوعارىدا ايتتىق. سول كۇن الىس ەمەس سياقتى. ءساتىن سالعاي دەيمىز.
ەركەبۇلان جومارت,
«ەگەمەن قازاقستان»
