وڭتۇستىك كورەيانى بۇلاي ايتۋىمىزدىڭ سەبەبى, كورەيالىقتار 30 جىلدان بەرى الەمدىك دودادا وزگە ەلدىڭ سپورتشىلارىنا جۇلدە بەرمەي ءجۇر. بۇگىنگە دەيىن بۇل ەل قىسقى وليمپيادادا 26 التىن مەدال السا, سونىڭ 21-ءىن شورت-ترەكتەن جەڭىپ العان. مۇنان بولەك 12 كۇمىس جانە 9 قولا جۇلدەسى تاعى بار. ال الەم چەمپيوناتىندا 90 التىن, 71 كۇمىس جانە 62 قولا مەدال العان. بۇل – تەك قىسقى وليمپيا ويىندارى مەن الەم چەمپيوناتىنداعى العان مەدال سانى. ءبىز بۇل تىزىمگە ازيا ويىندارى مەن ۋنيۆەرسيادانىڭ مەدالدارىن قوسقان جوقپىز.
وڭتۇستىك كورەيا 1948 جىلى سانكت-موريتستە وتكەن قىسقى وليمپياداعا تۇڭعىش رەت قاتىستى. بىراق بۇل ەلدىڭ سپورتشىلارى جۇلدەگەرلەر قاتارىنا ىلىگەمىن دەگەنشە ارادا 44 جىل ۋاقىت ءوتىپ كەتتى. 1992 جىلى فرانتسيانىڭ البەرۆيلە قالاسىندا ۇيىمداستىرىلعان قوو-دا وڭتۇستىككورەيالىق كونكيشى كيم يۋن مان 1000 مەتر قاشىقتىقتا كۇمىس مەدال يەگەرى اتاندى. بۇل كورەيا ءۇشىن تاريحي كۇن بولاتىن. ودان كەيىنگى وليمپيا ويىندارىنا شورت-ترەك سپورتى قوسىلىپ, وڭتۇستىك كورەياعا مەدال «جاۋا باستادى». 1992 جىلى كورەيا شورت-ترەكتەن ەكى التىن جانە ءبىر قولا مەدالدى يەلەنىپ, العاش رەت اق وليمپيادانىڭ جۇلدەگەرلەرى قاتارىنا قوسىلىپ, سول ۋاقىتتان بەرى ۇزدىكتەر ساپىنان تۇسكەن ەمەس.
وڭتۇستىك كورەياعا جوعارىدا ايتقان مەدالداردىڭ ۇشتەن ءبىر بولىگىن الەمگە ان حەن سۋ دەگەن ەسىممەن تانىمال بولعان سپورتشى اپەرگەن. 2006 جىلى تۋرين وليمپياداسىنا قاتىسىپ, ءۇش التىن (1000, 1500 مەتر جانە ەستافەتا), سونىمەن قاتار 500 مەتر قاشىقتىقتا قولا جۇلدەنى يەمدەندى. الەم چەمپيوناتتارىندا العان جۇلدە بويىنشا دا ان حەن سۋدىڭ باعى جانىپ تۇر. وڭتۇستىككورەيالىق شورت-ترەكشى 18 مارتە الەم چەمپيونى, سەگىز مارتە كۇمىس جانە ءتورت مارتە قولا جۇلدەگەر اتاندى. مۇنان بولەك ازيا ويىندارىندا بەس التىن, ءبىر كۇمىس جانە ۋنيۆەرسيادادا ءۇش التىن, ءبىر قولا مەدال جەڭىپ العان. ەگەر ان 2011 جىلى رەسەي قۇراماسىنا اۋىسپاعاندا, كورەيا قۇراماسىنا بۇدان دا كوپ جۇلدە اپەرەر ەدى.
تۋريندەگى وليمپيادادان كەيىن ان جاتتىعۋ بارىسىندا تىزەسىن قاتتى جاراقاتتاپ الىپ, ءتورت رەت وتا جاساتتى. جاراقاتىن ەمدەپ, 2009 جىلى ۆانكۋۆەر وليمپياداسىنا جولداما بەرۋشى جارىستا 9-ورىنعا يە بولىپ, ۇلتتىق قۇراما ساپىنان شىعىپ قالعان. ال 2010 جىلعى ەلىشىلىك ىرىكتەۋدە جەتىنشى ورىن الىپ, بۇل جولى الەم چەمپيوناتىنان تىس قالدى.
سپورتشى جاتتىعاتىن كوماندا تابا الماي, ابدەن اۋرە-سارساڭعا ءتۇسىپ جۇرگەندە انعا رەسەي اتىنان سىنعا تۇسۋگە ۇسىنىس بولادى. ان ويلانۋعا ۋادە بەرگەنىمەن, وڭتۇستىك كورەيانىڭ وليمپيادا قۇراماسىنا ەنۋ ءۇشىن سوڭعى مۇمكىندىكتى پايدالانىپ كورۋدى ويلاپ, ەلىشىلىك ىرىكتەۋ تۋرنيرىنە قاتىسۋعا بەل بۋادى. دەگەنمەن ول ىرىكتەۋدە تەك بەسىنشى ورىن الىپ, تاعى دا قۇرامادان شەت قالدى. ءۇش جىل بويى كورەيا قۇراماسىنا ىلىگە الماي جۇرگەن شورت-ترەكشىنىڭ سوچيدە وتەتىن وليمپياداعا قاتىسۋعا كەپىلدىك بەرىپ, قارجىلاي قولداۋ كورسەتەتىنىن جانە بولاشاقتا جاتتىقتىرۋشىنىڭ ورنىن ۇسىنىپ وتىرعان رەسەي قۇراماسىنىڭ ۇسىنىسىن قابىلداۋدان باسقا امالى قالمايدى. اننىڭ بۇل شەشىمگە كەلۋدەگى باستى ماقساتى – تاعى دا وليمپيادا ويىندارىندا جەڭىسكە جەتۋ ەدى. «سپورتشى ءۇشىن قاي ەلدىڭ اتىنان جەڭىسكە جەتكەنىڭ اسا ماڭىزدى ەمەس, ماڭىزدىسى – ناتيجە», دەدى ول.
ان حەن سۋ رەسەي قۇراماسىنا اۋىسقان سوڭ سول ەلدىڭ ازاماتتىعىن الىپ, اتى-ءجونىن ۆيكتور ان دەپ وزگەرتەدى. رەسەيگە كەلگەن سوڭ اننىڭ ەكىنشى تىنىسى اشىلىپ, ەندى الەمگە ۆيكتور ان رەتىندە تانىلا باستادى. ول رەسەي قۇراماسىندا ءجۇرىپ ءۇش رەت وليمپيادانىڭ التىنىن جانە ءبىر قولا مەدالىن يەلەندى. سونداي-اق الەم چەمپيوناتىندا ەكى التىن, ەكى كۇمىس جانە ءبىر قولا مەدال جەڭىپ الدى. ال ەۋروپا چەمپيوناتىندا سەگىز رەت توپ جارىپ, ءۇش كۇمىس مەدالعا قول جەتكىزدى.
ان كورەي ازاماتتىعىنان باس تارتىپ, رەسەي ازاماتتىعىن العان سوڭ: «كورەي فەدەراتسياسىندا جاعىمپازدىق پەن تامىر-تانىستىقتىڭ ارقاسىندا عانا ۇلتتىق قۇراماعا ىلىگە الاسىڭ. مەنىڭ ەلدەن كەتۋىمنىڭ باستى سەبەپتەرىنىڭ ءبىرى وسى», دەپ مالىمدەدى.
اننىڭ سوچيدەگى تاڭعالارلىق جەتىستىگى مەن وڭتۇستىك كورەيانىڭ شورت-ترەك سپورتىنان مەدالسىز قالعانى ەلدە ۇلكەن داۋ تۋدىرىپ, ول ءتىپتى ەل پرەزيدەنتى پاك كىن حەگە دەيىن جەتەدى. پرەزيدەنت ان سەكىلدى دارىندى سپورتشىنىڭ نەگە شەتەلگە كەتىپ قالعانىن انىقتاۋدى تاپسىرادى. داۋدىڭ سوڭى 2010 جىلى ۆانكۋۆەر وليمپياداسىنا ان حەن سۋدىڭ ورنىنا بارعان لي چجون سۋ مەن كۆاك يۋن گيدىڭ ء ۇش جىلعا سپورتتان شەتتەتىلۋىمەن اياقتالدى. كەيىنىرەك حالىقتىڭ ءوتىنىشى بويىنشا مەرزىمدەرى التى ايعا دەيىن قىسقاردى. لي چجون سۋ وسى وقيعادان كەيىن كونكيمەن جۇگىرۋ بويىنشا باعىن سىناپ كورۋگە نيەتتەنگەن, بىراق قازىعىنان ۇزاپ كەتە الماي, شورت-ترەككە قايتا ورالدى. قازىر ەكى سپورتشى دا ءوز ەلدەرىندە وتەتىن وليمپيا ويىندارىنا قاتىسۋعا ۇمىتكەر سپورتشىلاردىڭ تىزىمىندە ءجۇر.
ۆيكتور ان سوچي وليمپياداسىندا چەمپيون اتانعان سوڭ, الەۋمەتتىك جەلى ارقىلى الداعى جوسپارى تۋرالى ايتىپ, ءالى دە رەسەي ءۇشىن مەدالعا تالاساتىنىن جەتكىزدى. «مەن قازىر سپورتتان كەتە المايمىن. وليمپيادادان كەيىن رەسەيدە شورت-ترەكپەن اينالىساتىن جاس سپورتشىلاردىڭ سانى كۇرت ارتتى. مەن ءالى سپورتتى دامىتۋدى جالعاستىرۋىم كەرەك. بۇل مەنىڭ سوڭعى وليمپيادام ەمەس جانە رەسەي ءۇشىن ءالى تالاي باسەكەدە توپ جاراتىنىما, مەدالعا قول جەتكىزەتىنىمە سەنىمدىمىن!», دەدى سپورتشى.
التى دۇركىن وليمپيادا چەمپيونى ۆيكتور ان جاسى 32-گە كەلسە دە وڭتۇستىك كورەيادا وتەتىن قىسقى وليمپيا ويىندارىنا قاتىسىپ, جۇلدەلەر سانىن ەسەلەگىسى كەلەدى. «ەگەر رەسەي وليمپياداعا بويكوت جاريالاماسا, مەن بەيتاراپ تۋدىڭ استىندا قاتىسۋعا دايىنمىن. مەن بۇل وليمپياداعا ءتورت جىل دايىندالدىم, سوندىقتان وڭاي بەرىلگىم كەلمەيدى», دەيدى ول.
ۆيكتور اننىڭ جەتىستىكتەرى ەستىگەن جاندى تاڭ قالدىرماي قويمايدى. ان سەكىلدى الەمنىڭ ۇزدىك شورت-ترەكشىسىن تاربيەلەگەن كورەيادا جىل سايىن مىڭداعان بالا سپورتتىڭ وسى تۇرىمەن اينالىسادى. ماقسات – قالىپتاسقان ءۇردىستى ءۇزىپ الماۋ. وڭتۇستىك كورەيادا اۋدان چەمپيوناتىنا قاتىسۋشىلاردىڭ سانى قازاقستان چەمپيوناتى قاتىسۋشىلارىنىڭ سانىنان كوپ. وسى كۇندەرى شورت-ترەكتەن قازاقستان چەمپيوناتىنا 56 سپورتشى قاتىسىپ جاتىر. ءبىزدىڭ سپورتشىلار مۇزدا سىرعاناۋدى ەندى ۇيرەنىپ جاتقاندا, كورەيالىقتار قارسىلاستى باسىپ وزۋ مەن تاكتيكالىق شەبەرلىكتى اقىلمەن پايدالانۋ كەرەكتىگىن يگەرەدى.
شورت-ترەك وڭتۇستىك كورەيادا وتە تانىمال بولعاندىقتان, قارجىنىڭ نەگىزگى بولىگى وسى سپورت تۇرىنە بولىنەدى. سوندىقتان بۇل ەلدە قۇراما ساپىنا ىلىگۋ ءۇشىن باسەكە وتە تارتىستى وتەدى. وسىدان كەيىن كورەيالىق ورەندەر جۇلدە الىپ, كوزگە تۇسپەگەندە قايتسىن! ان سياقتى سپورتشىلاردىڭ جەتىستىگى مەن ەرلىگىن كورىپ وسكەن وعلاندار سوعان قاراپ بوي تۇزەيتىنى انىق. «شورت-ترەكشىلەر پاتشالىعىنداعى» ءاربىر بالا ان سياقتى الدىنا قارا سالمايتىن جۇيرىك بولعىسى كەلەدى. ويتكەنى ول شورت-ترەك پاتشاسى عوي!
ءالي بيتورە,
«ەگەمەن قازاقستان»
