پرەمەر-ليگادا وينايتىن 12 كلۋبىمىز بار. سولاردىڭ ىشىندە تەك تورتەۋى عانا باپكەر اۋىستىرعان جوق. 2018 جىلدىڭ باسىندا ستانيمير ستويلوۆ «استانادان» كەتىپ قالۋى دا عاجاپ ەمەس ەدى. الايدا بولگار باپكەرى ءوز ورنىندا قالدى. ەكىنشىسى – «قايراتتى» وتكەن جازدا قابىلداعان يسپان مامانى كارلوس الوس جانە «قايسار» باپكەرى ستويچو ملادەنوۆ. سونىمەن قاتار «اقتوبە» وتكەن جىلعى باپكەرى ۆلاديمير مۇقانوۆقا سەنىم ارتىپ وتىر. ال قالعان 9 كوماندامىز تۇگەلىمەن باپكەر اۋىستىردى.
ەندى مىنا قىزىققا قاراڭىز, 12 كلۋبتىڭ تەك 3-ەۋىندە عانا قازاقستاندىق باپكەر. قوستانايدىڭ «توبىلىندا» ۆلاديمير نيكيتەنكو, «اتىراۋدا» ۆاحيد ماسۋدوۆ, تالدىقورعاندىق «جەتىسۋدا» دميتري وگاي. قالعان 9 كوماندادا تۇگەل سىرتتان كەلگەن شەتەل ازاماتتارى. ول ول ما دەرسىز, جالپى 12 كوماندامىزداعى باس باپكەرلەردىڭ 4-ەۋى بولگاريالىق. ولار, ارينە, جالعىز ەمەس, قاستارىنا كەم دەگەندە 3 كومەكشىدەن ەرتىپ كەلگەن. پەتروپاۆلدىڭ «قىزىلجارىندا» نيكولا سپاسوۆ, قىزىلوردالىق «قايساردا» ستويچو ملادەنوۆ, شىمكەنتتىك «ورداباسىدا» گەورگي دەرمەندجيەۆ, «استانادا» ستانيمير ستويلوۆ. قايتا پاۆلودارلىق «ەرتىستىڭ» باپكەرى ديميتار ديميتروۆ وتانىنا قايتىپ كەتتى, ايتپەسە بۇل ءتىزىمىمىزدىڭ سانى 5-ەۋ بولۋشى ەدى. مىنە, وسىلايشا قازاقستان فۋتبولى قازىر بولگاريالىق تاسىلمەن تىنىستاپ تۇر دەسەك, ارتىق ەمەس. بولگاريا چەمپيوناتىنىڭ كولەڭكەسىنە اينالدىق. ەندى اقىرى باستادىق قوي, قالعاندارىن دا ايتا كەتەيىك, كىمدەر ەكەنىن. «ەرتىستى» يسپانيالىق جاس مامان جەرار نۋس قابىل الدى. بۇل باپكەر دە بوروديۋك سەكىلدى ۇنەمى اسسيستەنتتىك قىزمەتتە ءجۇرىپتى. جەكە-دارا باپكەر رەتىندە شەشىم قابىلداۋى قالاي ەكەنىن العاشقى تۋرلاردان بايقايمىز. جالپى, ەشكىمگە تانىس ەمەس, جۇمباق ادامداردى ءبىزدىڭ كلۋبتاردىڭ باسشىلارى كوزدى جۇمىپ تۇرىپ جۇمىسقا الا بەرە مە دەپ ويلايمىز. تاڭعالاتىن تۇگى جوق. تالايىن كوردىك. قايسىبىر جىلدارى الاياق باپكەرلەردى دە كوزىمىز شالدى. كلۋبتى بەلشەسىنەن قارىزعا باتىرىپ, شەتەلگە كلۋبتىڭ تەلەفونىمەن قوڭىراۋ سوعىپ, كەيىننەن ايلىعىمدى تۇگەل بەرمەدى دەپ سوتقا بەرىپ, ۋەفا-عا شاعىمدانىپ, كۇللى ەل فۋتبولىنا قارا كۇيە جاعىپ كەتكەندەر بولدى.
قاراعاندىنىڭ «شاحتەرى» ءوز دەڭگەيىنە سايكەس باپكەر العان سەكىلدى. بەلارۋس ەلىنىڭ 6 دۇركىن چەمپيونى بولعان ۆلاديمير جۋراۆەلدىڭ جەتىستىكتەرى جامان ەمەس. پرەمەر-ليگادا ءىلىنىپ-سالىنىپ جۇرگەن «كەنشىلەر» ءۇشىن بۇل باپكەر ءبىرشاما كومەك بولۋى ىقتيمال. ورالدىڭ «اقجايىعىن» الايىق, ولار باپكەردى ۋكراينادان الدىرتتى. ەسىم-سويى تاعى دا ەشكىمگە بەلگىسىز ۆلاديمير مازيار جاس كەزىندە ءبىر ماۋسىم «دينامو» (كيەۆ) ساپىندا ونەر كورسەتىپتى. كەيىننەن قوسالقى قۇرامنىڭ «پاتشاسى» بولىپ, كوپتەگەن جىلدار بويى نەگىزگى قۇرامنان ورىن الا الماعان. باپكەرلىك قىزمەتكە اۋىسىپ, مۇندا دا ءاربىر 2 جىل سايىن قىزمەت الماستىرىپ وتىرعان. بىلىكتىلىگى ۇلكەن كۇمان تۋدىرتاتىن ۋكراينالىق «اقجايىق» ساپىندا 2 جىل ۋاقىت جۇرە الماس دەپ وتىرمىن. پرەمەر-ليگا باستالىسىمەن العاشقى 5-6 تۋردا باپكەرىن قىزمەتتەن قۋاتىن كلۋبتار دا بار. سونىڭ قاتارىندا «اقجايىق» بولسا, ەش تاڭعالمايمىن. ەكىنشى جاعىنان كىم بىلەدى, بالكىم كوپ جەردە جولى بولماعان 40 جاسقا تولعان باپكەر بيىل جايىقتا «قامال الاتىن» شىعار؟
وتكەن جىلعى ماۋسىم تۋرا وسىلاي اينا-قاتەسىز باستالعان. بىراق بەس تۋردان كەيىن العاشقى «وتستاۆكالار» باستالدى. بىرىنشىلىك بەل ورتاسىنا تاقاعاندا «قايرات», «ەرتىس», «توبىل», «شاحتەر», «اتىراۋ», «اقتوبە», «وقجەتپەس» سەكىلدى كوماندالار باپكەرلەرىن اۋىستىرىپ ۇلگەردى. جالپى العاندا, ءبىزدىڭ فۋتبولشىلار ما, جوق الدە كلۋبتارىمىزدىڭ پرەزيدەنتتەرى مە, ايتەۋىر باپكەر شىداتپايمىز. بۇرىندارى ماسەلە كوتەرىپ ءوزىمىزدىڭ باپكەرلەردى ۇمىتپايىق دەپ جۇرەتىن شەنەۋنىكتەر بولۋشى ەدى. قازىر فۋتبولدىڭ باسىنداعى كىسىلەر بۇل ماسەلەگە كوڭىل اۋدارۋدى دا قويدى. ايتپەسە قازاقستاندا بىلىكتى باپكەرلەر قاپتاپ ءجۇر عوي. تالعات بايسۋفينوۆ, نۇركەن مازباەۆ, الماس قۇلشىنباەۆ, اسحات قادىرقۇلوۆ, سەرگەي تيموفەەۆ, سۇلتان ابىلداەۆ, اسقار قوجابەرگەنوۆ سەكىلدى ءوزىمىزدىڭ بىلىكتى ماماندارىمىز بارشىلىق. بارلىعى دا ەل فۋتبولىن تاماشالاپ, قاشان بىزگە ۇسىنىس تۇسەر دەپ كۇتىپ ءجۇر. الايدا شەتەلدىك باپكەرلەرمەن بىرگە قارجى جىمقىرىپ ۇيرەنگەن كلۋب باسشىلارى پاتريوتتىق سەزىمدى كەيىنگە ىسىرىپ قويعان سەكىلدى. قىسقاسى, قازاقستاندىق فۋتبول فۋنكتسيونەرلەرى باپكەرلەر لەگيونىن جاساقتاۋعا قۇشتار-اق.
ەرمۇحامەد ماۋلەن,
«ەگەمەن قازاقستان»
