مەكتەپ جاسىنداعى بالالاردى ەرتە جاستان دامىتۋ بويىنشا ءبىزدىڭ الدىمىزعا ۇلكەن مىندەت قويىلىپ وتىر. بۇل ماسەلەنى اتا-انالار دا كوتەرىپ جۇرگەن. وسى ماسەلە بويىنشا ءبىز ءتيىستى وقۋ باعدارلامالارىنا وزگەرىستەر ەنگىزۋىمىز كەرەك. سونىمەن قاتار, ەرتە وقۋ, ەرتە جازۋ, جان-جاقتى دامىتۋ بويىنشا تالاپتاردى كۇشەيتەمىز. ول ءۇشىن, ارينە ءبىز مۇعالىمدەردىڭ ساناتتارىن ارتتىرىپ, بىلىكتىلىگى مەن ءبىلىمىن شىڭداۋ ماقساتىندا جۇمىس ىستەۋىمىز كەرەك. وقۋ ادىستەمەلىك بازاسىن جاڭعىرتۋىمىز قاجەت. وسى تۇرعىداعى جۇمىستاردى مينيسترلىك باستاپ كەتتى.
كەلەسى ءبىر ماسەلە – وقۋشىلاردىڭ وقۋ جۇكتەمەسىن ازايتۋ. بۇل ماسەلە دە كۇزدەن باستاپ وتە قىزۋ تالقىلانعان تاقىرىپتاردىڭ ءبىرى بولدى. اتا-انالار تاراپىنان ءبىزدىڭ مينيسترلىككە كوپتەگەن حاتتار كەلىپ ءتۇستى. ەلباسىنىڭ بيىلعى جولداۋىندا دا بۇل ماسەلە قوزعالدى. مينيسترلىكتىڭ الدىنا, جالپى ءبىلىم سالاسىناڭ الدىنا بىرقاتار ماقسات-مىندەتتەر قويىلدى. شىنىندا دا جۇكتەمە وتە كوپ. باسقا مەملەكەتتەرمەن سالىستىرساق تا, تمد ەلدەرى بولسىن قاي-قايسىمەن سالىستىرساق تا قازاقستان مەكتەپتەرىنىڭ وقۋ جۇكتەمەسى وتە ۇلكەن. سوندىقتان دا بۇگىنگى تاڭدا قىسقارتۋ جۇمىسى بويىنشا ماسەلە قاراستىرىلىپ, قازىر شەشىم قابىلداۋعا دايىنداپ جاتىرمىز. ءبىز وقۋ جۇكتەمەسىن قىسقارتقاندا ەڭ ءبىرىنشى ساراپشىلارمەن, پەداگوگتارمەن, اتا-انالارمەن كەلىسىپ, اقىلداسىپ سودان كەيىن عانا شەشىم شىعاراتىن بولامىز. بۇل ءبىر جاقتان قابىلداناتىن ماسەلە ەمەس. سوندىقتان وسىنداي تارتىپپەن شەشىم قابىلداناتىن بولادى. ءبىز ويلاستىرىپ جاتقان تاعى ءبىر ماسەلە بار. بۇل ورايدا مەكتەپتەر وزدەرى تاڭدايتىن بىرنەشە وقۋ جوسپارىن ۇسىناتىن بولامىز», دەدى ول.
سونداي-اق ءبىلىم جانە عىلىم ۆيتسە-ءمينيسترى بيبىگۇل اسىلوۆا قازىرگى ۋاقىتتا ەلىمىزدە 125 جەكەمەنشىك مەكتەپ جۇمىس ىستەيتىنىن, ولاردىڭ جۇكتەمەسى 60 پايىزعا جۋىق ەكەنىن تىلگە تيەك ەتتى.
«بىزدە مەملەكەتتىك تاپسىرىستى ورنالاستىرۋعا قور بار جانە بۇل مەملەكەتتىك مەكتەپتەردىڭ جۇكتەمەسىن ازايتادى. قازىرگى كۇنى مەملەكەتتىك مەكەمەلەر بولىپ تابىلاتىن مەكتەپتەردىڭ باسقارۋشىلىق-قارجىلىق دەربەستىگىن كەڭەيتۋ ماقساتىندا مەكتەپتەردىڭ جاڭا ۇيىمداستىرۋشىلىق-قۇقىقتىق فورماسىن ەنگىزۋ, شارۋاشىلىق جۇرگىزۋ قۇقىعىنداعى مەملەكەتتىك كاسىپورىندارعا اينالدىرۋ جوسپارلانۋدا. بۇل ءۇردىس ساتىلاپ جانە مەكتەپتەردىڭ ەركى بويىنشا جۇزەگە اسىرىلاتىن بولادى. بيىلدان باستاپ وسى باعىتتا زاڭنامانى جەتىلدىرۋ ۇيعارىلۋدا.
مينيسترلىك مۇعالىمدەردىڭ جالاقىسىنا قاتىستى ءنورماتيۆتى-قۇقىقتىق اكتىلەرگە ەنگىزىلەتىن تۇزەتۋلەردى دايىندادى جانە ولار بۇگىنگى كۇنى مەملەكەتتىك ورگاندارعا كەلىسىلۋگە بەرىلدى. مەملەكەتتىك ورگاندارمەن كەلىسىلگەن جانە رەسپۋبليكالىق بيۋدجەتتىك كوميسسيامەن قاراستىرىلعان سوڭ وسى تۇزەتۋلەر ۇكىمەتكە بەكىتۋگە ۇسىنىلاتىن بولادى. جالپى, جۋىرداعى 3 جىلدا مۇعالىمدەردىڭ جالاقىسىن وسىرۋگە رەسپۋبليكالىق بيۋدجەتەن 378 ملرد تەڭگە قارالاتىن بولادى, ونىڭ 67 ملرد-ى وسى جىلى ءبولىندى. سونىمەن قاتار مۇعالىمدەر ءۇشىن بىلىكتىلىك دەڭگەيىن ەسەپكە الاتىن جاڭا قوسىمشا تولەۋ جۇيەسى ەنگىزىلمەك. ساناتتار ۇلتتىق بىلىكتىلىك تەستى ارقىلى بەرىلەدى جانە دالەلدەنگەن بىلىكتىلىككە بايلانىستى مۇعالىمنىڭ جالاقىسى ورتا ەسەپپەن 20 پايىزدان 50 پايىزعا دەيىن ارتادى», دەدى ول.
راۋان قايدار,
«ەگەمەن قازاقستان»
