ماڭعىستاۋ وبلىسىنىڭ ەكونوميكالىق دامۋىنىڭ باسىم باعىتتارى: كولىك جانە لوگيستيكا, قۇرىلىس, تۋريزم, اگروونەركاسىپ كەشەنى, سونداي-اق تەڭىز باعىتىنىڭ دامۋىندا جەتەكشى ءرول اتقاراتىن مۇناي كەن ورىندارىنىڭ قىزمەت كورسەتۋ سالاسى. ءوندىرىستى قۇرۋ جانە ىسكە قوسۋ ءۇشىن بارلىق جاعداي جاسالعان جانە وڭىردە «اقتاۋتەڭىزپورتى» اەا جۇمىس ىستەيدى. يندۋستريالدى ايماق قۇرىلعان.
تاراپتار ماڭعىستاۋ وبلىسىنداعى اقتاۋ ەكوقالاشىعىنىڭ ءىرى جوباسىن ازىرلەۋ ءۇشىن قۇرىلىستىڭ باس مەردىگەرىن جانە قارجىلاندىرۋ قۇرىلىمىن تاعايىندايدى. كەلىسىمگە سايكەس, ينۆەستيتسيا كولەمى ۇلىبريتانيا تاراپىنان 2,1 ملرد. اقش دوللارى كولەمىندەگى جوبانىڭ 100% -ىن, ال قىتايلىق تاراپ 400 ميلليون دوللارعا بانكتىك كەپىلدىكتى قامتاماسىز ەتەدى. جوبانى جۇزەگە اسىرۋ ءۇشىن ماڭعىستاۋ وبلىسىنىڭ اكىمدىگى وبلىس ورتالىعىنىڭ سولتۇستىك بولىگىنەن 865 گەكتار جەر بولەدى. مۇندا قولجەتىمدى باسپانا, كوممەرتسيالىق جانە ساۋدا ورتالىقتارى, مەكتەپتەر, بالاباقشالار مەن مەديتسينالىق ورتالىقتار سالىنادى.
سونىمەن قاتار, IT پارك, قوناق ءۇي برەندتەرى, سپورتتىق ستاديوندار, ويىن-ساۋىق مەكەمەلەرى جانە ءتۇرلى مەملەكەتتىك قىزمەتتەر, زاماناۋي ەنەرگەتيكالىق/ەكولوگيالىق تازا تەحنولوگيالارمەن تاسىمالداۋ قىزمەتتەرى كورسەتىلەتىن ەكوقالاشىق الەمدىك ساياسي ارەنادا ەلىمىزدىڭ بەدەلىن وسىرگەن «ەكسپو-2017» حالىقارالىق كورمەسىنىڭ جالعاسى بولماق. اقتاۋ قالاسىنىڭ اكىمدىگى ينفراقۇرىلىمدى, ونىڭ ىشىندە جولداردى, ەنەرگيامەن جابدىقتاۋدى, كارىزدى جانە سۋمەن قامتاماسىز ەتۋدى ءوز مىندەتىنە الادى. جاڭا جوبا ءۇشىن كەلىسىم ۇلىبريتانيالىق «Global Project Capital Ltd» كومپانياسىنىڭ باس ديرەكتورى كەننەت فۋلتون جانە AAG Corporate Services Ltd ( ۇلىبريتانيا) كومپانياسىنىڭ باس ديرەكتورى ريچارد بالاەس, China Road and Bridge Corporation (CRBC) (قحر جانە گونكونگ) باس ديرەكتورى جانگ دجۋن, سونداي-اق ماڭعىستاۋ وبلىسىنىڭ اكىمدىگى اراسىندا جاسالدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
