ەل نامىسىن قورعاعان 17 سپورتشىنىڭ ون ەكىسى «قازاقستان توپ تيم» كلۋبىنىڭ وكىلدەرى. برازيليالىق دجيۋ-دجيتسۋ جانە گرەپپلينگتەن ەل فەدەراتسياسىنىڭ اتقارۋشى ديرەكتورى ميگەل مامىرباەۆتىڭ ايتۋىنشا, بۇل تۋرنير اۋقىمدى ءارى بەدەلدى سپورتتىق شارالاردىڭ ءبىرى سانالادى.
سپورتشىلارىمىز ەل قورجىنىنا 3 التىن, 4 كۇمىس جانە 2 قولا مەدال سالىپ جارىس قورىتىندىسى بويىنشا جوعارى ناتيجەدەن كورىنگەن. ايدار تۇلەيباەۆ, يادگار قاسىموۆ, ميگەل مامىرباەۆتار جەڭىس تۇعىرىنان كورىنىپ چەمپيون اتانسا, ارلان شابدارباەۆ, ەرجان ەستانوۆ, مۇحامەديار قۇدايقۇلوۆ جانە وسمانجان قاسىموۆ كۇمىس مەدالدى ەنشىلەدى. ال تولەگەن قۇماروۆ پەن باتىر مۇرات ۇلى قولانى قاناعات تۇتىپ جارىس جۇلدەگەرى اتاندى.
– تۋرنير كەرەمەت ءوتتى, بارلىعى جاقسى ۇيىمداستىرىلعان. بار كۇش-جىگەرىمىزدى سالدىق. دەگەنمەن تورەشىلەر تاراپىنان بولعان ادىلەتسىزدىكتەردى دە ايتپاي كەتۋگە بولماس. ءبىزدىڭ كوماندا كىل مىقتىلاردان قۇرالعان. سوندىقتان, ولاردىڭ ادىلەتسىزدىگى بوز كىلەم قوجايىندارى مەن ءبىزدىڭ سپورتشىلاردىڭ بەلدەسۋى كەزىندە بايقالدى. جالپى, كورسەتكەن ناتيجەمىز جامان ەمەس, – دەيدى ءتۋرنيردىڭ كۇمىس جۇلدەگەرى وسمانجان قاسىموۆ.
ايتا كەتەر جايت, Grand Slam حالىقارالىق ءتۋرنيرىنىڭ كەلەسى كەزەڭى ناۋرىز ايىنىڭ 10-ى مەن 11-ءى كۇندەرى لوندوندا وتەدى.
ارمان وكتيابر,
«ەگەمەن قازاقستان»
الماتى
