اۋىل تۇرعىنى ينديرا جانىبەكوۆا رەسپۋبليكالىق تەلەارنالاردىڭ بىرىنە بەرگەن سۇحباتىندا 2017 جىلى 14 جەلتوقساندا كوز جۇمعان 11 جاستاعى قىزى اۋدان دارىگەرلەرىنىڭ سالعىرتتىعىنان اۋرۋىن اسقىندىرىپ الىپ, وسى اۋرۋدان قايتىس بولعانىن ايتقان ەدى.
ءۇرجار اۋداندىق اۋرۋحاناسىنىڭ باس دارىگەرى جەكسەنباي تىلەۋبەرلين قايعىلى وقيعادان كەيىن اۋىلداعى 139 وقۋشىعا ەكپە جاسالعانىن, 800-گە جۋىق تۇرعىننان ساراپتاما الىنعانىن, بۇل اۋرۋمەن 49 ادام تىركەلىپ, ولاردىڭ 25-ءى اۋرۋحانادا ەم قابىلداعانىن, بالانىڭ ولىمىنە بايلانىستى قىلمىستىق ءىس قوزعالعانىن جەتكىزگەن ەدى.
الايدا 16 قاڭتار كۇنى وسى جاعدايعا بايلانىستى ارنايى بريفينگ وتكىزگەن وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى رايفا سافيوللينوۆا ا ۆيرۋستىق گەپاتيتى 49 بالادا انىقتالدى دەگەن دەرەكتى جوققا شىعارىپ, كوز جۇمعان وقۋشى جوعارىدا اتالعان ۆيرۋستىق سىرقاتتان ەمەس, باۋىر نەكروزىنان قايتىس بولعانىن مالىمدەدى.
«بارلىعى 46 بالا تەكسەرۋدەن وتكەن, ونىڭ 25-ءى دياگنوستيكادان ءوتۋ ءۇشىن ءۇرجار اۋداندىق اۋرۋحاناسىنىڭ جۇقپالى اۋرۋلار بولىمىنە جاتقىزىلعان. سونىڭ تەك 12-سىندە اتالعان دياگنوز دالەلدەنگەن. ونىڭ 11-ءى - وقۋشى, بىرەۋى ءۇش جاستاعى بالا. ا ۆيرۋستىق گەپاتيتى 2017 جىلدىڭ قىركۇيەك ايىنان بەرى ءارتۇرلى ايلاردا ارا-تۇرا تىركەلىپ وتىرعان. اۋىرعان ادامدارمەن بايلانىس جاساعان بالالاردىڭ بارلىعىنا ۆاكتسيناتسيا جاسالىپ, شولپان اۋىلىندا 140 ادامعا ەكپە سالىندى. مەكتەپتە, ءۇي وشاقتارىندا زالالسىزداندىرۋ جۇمىستارى جۇرگىزىلدى», دەدى باسقارما باسشىسىنىڭ ورىنباسارى.
ازامات قاسىم,
«ەگەمەن قازاقستان»
شىعىس قازاقستان وبلىسى
