اشىلۋ سالتاناتىندا كورەي سوعىسىنا قاتىسىپ, كىشكەنتاي كورەي قىزىن قۇتقارىپ قالعان تۇرىك وفيتسەرى تۋرالى باياندايتىن «ايلا» اتتى كوركەم فيلم كورسەتىلسە, جابىلاتىن كۇنى «تاۋ 2» اتتى كوركەم فيلم ۇسىنىلدى. مادەنيەتتە ەلەۋلى ماڭىزى بار شارانى تابىستى اياقتاعان سوڭ قازاقستان جانە تۇركيا كينوگەرلەرى «قازاقفيلمدە» باس قوسىپ, كەزدەسۋ بارىسىندا ەكى ەلدىڭ كينو ماماندارى بىرلەسكەن جوبالاردى ءتۇسىرۋ مۇمكىندىگىن تالقىلادى.
– مەن سىزدەرمەن تانىسىپ, كينوستۋديانى كورگەنىمە قۋانىشتىمىن. ءبىزدىڭ ورتاق مادەنيەتىمىز, تاريحىمىز, ورتاق سەنىمىمىز, ماقساتىمىز بار. قوجا احمەت ياساۋي, كوروعلى, قورقىت اتا سەكىلدى ورتاق تۇلعالارىمىز بار. ولار قازاقتىڭ نە تۇرىكتىڭ عانا ەمەس, بۇكىل تۇركى الەمىنىڭ تۇلعاسى. وسىنداي كەيىپكەرلەرىمىز باردا, ورتاق تاريحىمىز تۇرعاندا, بىرلەسىپ فيلم تۇسىرسەك ەكى ەلدىڭ مادەنيەتى مەن ونەرى ءۇشىن ۇلكەن ولجا بولادى دەپ ەسەپتەيمىن. بۇل ماقسات ءۇشىن ەكى مەملەكەت تە مۇددەلەستىك تانىتسا, ورىندالۋى ونشا قيىنعا سوقپايدى. ورتاق فيلمدەر ءتۇسىرىپ, بۇكىل الەمگە تۇركى الەمىنىڭ بەيبىت حالىق ەكەنىن پاش ەتسەك, دەدى كەزدەسۋ كەزىندە تانىمال تۇرىك رەجيسسەرى ونەر كىلىچ.
«قازاقفيلمنىڭ» قىزمەتكەرلەرى تۇركيالىق قوناقتارعا – رەجيسسەر ونەر كىلىچقا, پروديۋسەر احمەت ەدەبالىعا, رەجيسسەر مۇستافا ۋگۋر ياعدجىوعلۋعا جانە جۋرناليست بەدىر اچارعا كينوستۋديا اۋماعىن ارالاتىپ, وندىرىستىك مۇمكىندىكتەرىمەن تانىستىردى. كەزدەسۋ سوڭىندا ەكى تاراپ بولاشاقتا بىرلەسىپ تۇسىرەتىن جوبالاردىڭ ستسەناريلەرىمەن الماستى.
سوڭعى جىلدارى «قازاقفيلم» بيۋدجەت قارجىسىن ۇنەمدەۋ جانە حالىقارالىق پروكاتقا شىعۋ ماقساتىندا شەتەلدىك سەرىكتەستەرمەن كينووندىرىستى قارقىندى تۇردە دامىتۋدى قولعا الدى (بارلىق بىرلەسكەن جوبالار ورتاق قارجىلاندىرۋ شارتى بويىنشا جۇزەگە اسادى). وسى ورايدا رەسەيمەن بىرلەسىپ ءتۇسىرىپ, پروكاتى ۇلكەن تابىسپەن وتكەن «28 پانفيلوۆشى» ءفيلمىن, پروكاتقا ەندى عانا شىققان, ۇندىستانمەن بىرلەسكەن «تۋعان ءۇيىم – تىرەگىم» («Love you family») ءفيلمىن جانە اياقتالۋعا جاقىن قالعان «امىرە» (امىرە قاشاۋباەۆ تۋرالى) اتتى قازاق-امەريكان ءفيلمىن, ءتۇسىرىلىم كەزەڭىندە تۇرعان قازاق-قىتاي جوباسى «كومپوزيتور» (سي سينحاي مەن باقىتجان بايقاداموۆتىڭ دوستىعى تۋرالى) ءفيلمىن اتاۋعا بولادى.
ايگۇل احانبايقىزى,
«ەگەمەن قازاقستان»
الماتى
