العاش رەت ناعاشى اعاسىنىڭ فوتواپپاراتقا اۋەستىگى بالالىق قيالىن وياتا ءبىلدى. ول كىسى كەزىندە سوعىسقا قاتىسقان, پولكوۆنيك شەنىندەگى اسكەري ادام بولاتىن. شاعىن فوتواپپاراتىنىڭ ءجون-جوسىعىن ۇيرەتىپ, ارمانشىل جاستى بولاشاققا ماشىقتاندىرىپ, ۇلكەن ىسكە باعىت سىلتەگەندەي ەدى. الابۇرتقان بالا كوڭىل اينالاداعى تابيعاتتىڭ تاڭعاجايىپ تىلسىمىن موينىنا اسقان كىشكەنتاي «زەنيتى» ءۇيىرىپ اكەلىپ الدىنا تاستايتىن تاڭعاجايىپ ساتتەرىنەن باستاپ كەيىنگى ساپالى دا ءساندى EOS 5D Mark 11 اپپاراتىن قولداناتىن كەزەڭگە دەيىنگى ۋاقىت ارالىعىنداعى ۇزاق جىلدار الەتىندە ءومىر يىرىمدەرى نە كورسەتپەدى. العاش 1970 جىلى قاراعاندى قالاسىنداعى فوتوگرافتار دايىندايتىن ۋچيليششەنى ءبىتىرىپ, ەڭبەككە ارالاسقان جىلدارى جاستىقتىڭ جالىنىمەن ارمانشىل جاس الماتى كينو تەحنيكۋمىن اياقتايدى. وسى تەحنيكۋمنىڭ زەرتحاناسىندا مەڭگەرۋشى بولىپ قىزمەت اتقارادى. سودان كەيىن پاۆلودارداعى پەداگوگيكالىق ينستيتۋتىنىڭ فيلولوگيا فاكۋلتەتىندە وقىپ, ءفوتوتىلشى قىزمەتىنە بەلسەنە كىرىستى, كەشەگى جوعارعى كەڭەستە, الماتىداعى پارلامەنت فوتوستۋدياسىندا شەتەلدەرمەن بايلانىستاعى «دوستىق» قوعامىندا, «حابار» تەلەارناسىندا, «تۇركىستان», «ەگەمەن قازاقستان» گازەتتەرىندە ءفوتوتىلشى بولىپ, تۋعان جەردىڭ ءتوسىن شارلادى. «1991 جىلى توقتار اۋباكىروۆ عارىشقا ۇشقان كەزدە تۇڭعىش عارىشكەرىمىزدىڭ كوككە كوتەرىلۋ ساتىنە كۋا بولعانىمدى وزىمە ەرەكشە ماقتانىش كورەمىن, – دەيدى جاقسىلىق اعا ايرىقشا تولقىعان سەزىممەن. – تاريحىنا, مادەنيەتىنە ۇڭىلگەن ادام عانا ەلدىڭ رۋحانياتىن كوتەرەدى. 1995 جىلى سەمەيگە جول ءتۇسىپ, اباي جەرىندە ۇلى اقىننىڭ 150 جىلدىق مەرەكەسىن كوزبەن كورىپ, سالتاناتتىڭ ايرىقشا ساتتەرىن سۋرەتكە ءتۇسىرىپ كورسەتۋ مۇمكىندىگى تۋعانىنا قۋانامىن. كەيىننەن پاريجدە بولعان ساپارىمدا مۇحتار اۋەزوۆتىڭ 100 جىلدىق مەرەيتويىنا قاتىسقانىمدا, سول دەلەگاتسيانىڭ قۇرامىندا ايتۋلى اعالار بولعانى ۇمىتىلمايتىن كەزدەر دەر ەدىم. ماسەلەن, شىڭعىس ايتماتوۆ, ءابدىجامىل نۇرپەيىسوۆ, ولجاس سۇلەيمەنوۆ, ساكەن ءجۇنىسوۆ, ايمان مۇساقوجاەۆا, مۇرات اۋەزوۆ, قارشىعا احمەدياروۆتاردىڭ بولۋى, ارقايسىسىنىڭ ىلكىم ساتتەرىن سۋرەتتەرىمدە بەينەلەي الۋ دا مەن ءۇشىن ايتىپ جۇرەتىن سىرلى ساتتەر بولىپ قالا بەرەدى.سول كەزدە يۋنەسكو-نىڭ شتاب-پاتەرىندە ارنايى فوتورەپورتاجدار ءتۇسىردىم». بۇگىندە بۇل جۇمىستار مۇحتار اۋەزوۆ مۋزەي-ۇيىندە ساقتاۋلى تۇر.
تاۋەلسىزدىكتىڭ 20 جىلدىعى قارساڭىندا استاناداعى تاۋەلسىزدىك سارايىندا ۇلكەن كورمە, سونداي-اق وسىدان ءۇش جىل بۇرىن, 1 جەلتوقسان – تۇڭعىش پرەزيدەنت كۇنىنە وراي الماتىداعى رەسپۋبليكا سارايىندا ەلباسىنا ارنالعان ارنايى كورمە وتكىزدى. ۋىزداي ىنتىقتىرعان ورنەكتەر الەمى جاقسىلىقتى جاقسى ىزدەنىستەرگە باستاي بەرەتىندەي.
ساپارباي پارمانقۇل,
«ەگەمەن قازاقستان»
الماتى
