وبلىستىق دەنساۋلىق ساقتاۋ باسقارماسىنىڭ باس مامانى ءاليا ورازالينانىڭ ەسەبىنە قاراعاندا, «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى بويىنشا نىسانداردى جوندەۋ جۇمىستارىنا 452 ميلليون, ماتەريالدىق-تەحنيكالىق بازانى نىعايتۋعا 1 ميلليارد 225 ميلليون تەڭگە بولىنگەن.
ناتيجەسىندە 13 جوبا جۇزەگە اسىرىلىپ, 20 نىسان قالپىنا كەلتىرىلگەن. 21 سانيتارلىق, 5 جەڭىل كولىك, 136 بىرلىك مەديتسينالىق قۇرال-جابدىقتار ساتىپ الىنعان. كارديولوگيالىق ورتالىق كارتوگرافيالاۋ جانە ەلەكتروفيزيولوگيالىق جۇيەلەۋ اپپاراتتارىمەن, شالعاي ەلدى مەكەندەر ەكگ قۇرىلعىلارىمەن تولىققان.
الايدا تىندىرىلعان ىستەرگە قاراماستان, وتىرىستا ورىن العان بىرقاتار ولقىلىقتار دا اتاپ ءوتىلدى. وبلىستىق ءماسليحاتتىڭ دەپۋتاتى, كوميسسيا جەتەكشىسى يۋري بەلونوگتىڭ ايتۋىنشا, قىزىلجار اۋداندىق ورتالىق اۋرۋحاناسىنا جوندەۋ شارالارىنىڭ گرافيكتەن كەشەۋىلدەۋى بايقالعان. وسى اۋداندا 2016 جىلى اكەلىنگەن مەديتسينالىق جابدىق ارادا ءبىر جىل وتكەن سوڭ عانا ىسكە قوسىلعان. ءبىرىنشى قالالىق اۋرۋحاناعا 40 ميلليون تەڭگەنىڭ ۋزي اپپاراتى ورناتىلعانىمەن, تولىق قۋاتىندا جۇمىس ىستەمەيدى. باعاسى قىمبات. ودان ەكى ەسە ارزانىن الۋعا بولاتىنى ەسكەرىلمەگەن.
ەمدەۋ مەكەمەلەرىنىڭ وكىلدەرى مامانداردىڭ جەتىسپەۋشىلىگىن, تاپشىلىعىن قانشا العا تارتسا دا, بۇل ۋاجبەن كەلىسپەگەن كوميسسيا مۇشەلەرى مەن حالىق قالاۋلىلارى كەمشىلىكتەردى شۇعىل تۇزەتۋدى تالاپ ەتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
